ރައީސް ސޯލިހް, ރައީސް ނަޝީދު އާ ބައްދަލު ކުރައްވަނީ
ރައީސް ސޯލިހް ކުޑަހުވަދޫގައި އެމްޑީޕީ މެމްބަރުންނާ ބައްދަލުކުރައްވައި ލޯކަލް ކައުންސިލް އިންތިޚާބުގެ ޕްރައިމަރީ ނިމުމާއެކު ހުރިހާ ފަރާތްތަކުން ގުޅިގެން އިންތިޚާބު ކާމިޔާބު ކޮށްދިނުމަށް ގޮވާލައްވައިފިއެވެ. ދަތުރުފުޅު ނިމުމާއެކު ރައީސް ނަޝީދު އާ ބައްދަލުކުރައްވައި ދެބޭފުޅުން އެކުގައި މަސައްކަތް ކުރައްވާތަން ރައްޔިތުންނަށް ފެންނާނެ ކަމަށް ވިދާޅުވިއެވެ. ޕާޓީ އެއްބައިވަންތަކަން ވަރުގަދަ ކުރަން ކުރެއްވެން އޮތް ހުރިހާ މަސައްކަތެއް ކުރައްވާނެ ކަމުގެ ޔަގީންކަން ސަޕޯޓަރުންނަށް ދެއްވި.
ރައީސް ނަޝީދު އާއި ރައީސް ސޯލިހް
ރައީސް އިބްރާހިމް މުހައްމަދު ސޯލިހް ރައީސް މުހައްމަދު ނަޝީދު އާ ވަރަށް އަވަހަށް ބައްދަލު ކުރައްވާ ލޯކަލް ކައުންސިލް އިންތިޚާބު ކާމިޔާބު ކުރެއްވުމަށް ގުޅިގެން މަސައްކަތް ފައްޓަވާނެ ކަމަށް ވިދާޅުވެއްޖެ އެވެ.
ރައީސް ސޯލިހް މިހެން ވިދާޅުވީ، ހޯމަ ދުވަހު ކުޑަހުވަދޫގެ އެމްޑީޕީ މެމްބަރުންނާ ބައްދަލު ކުރައްވާ ދެއްކެވި ވާހަކަ ފުޅުގަ އެވެ.
ރައީސް ސޯލިހް ކުޑަހުވަދޫ އަށް ވަޑައިގަތީ ތ. ހިރިލަންދޫ އަށް ކުރައްވާ ދަތުރުފުޅެއްގަ އެވެ.
ކުޑަހުވަދޫ ގައި ރައީސް ސޯލިހް ދެއްކެވި ވާހަކަފުޅުގައި ލޯކަލް ކައުންސިލް އިންތިޚާބުގެ ޕްރައިމަރީ ނިމުމާއެކު ހުރިހާ ފަރާތްތަކުން ގުޅިގެން އެމްޑީޕީ އަށް އިންތިހާބު ކާމިޔާބު ކޮށްދިނުމަށް މަސައްކަތްކުރުމަށް ވަނީ ގޮވާލައްވާފަ އެވެ. އަދި ގުޅިގެން މަސައްްކަތް ކުރެވިއްްޖެ ނަމަ ހުރިހާ ދާއިރާ އަކުން ވެސް ރަނގަޅު ނަތީޖާ އެއް ހޯދޭނެ ކަން ފާހަގަ ކުރައްވި އެވެ.
ރައީސް ޞޯލިހް ވަނީ ޕާޓީގެ އެއްބައިވަންތަކަން ވަރުގަދަ ކުރަން އެމަނިކުފާނަށް ކުރެއްވެން އޮތް ހުރިހާ މަސައްކަތެއް ކުރައްވާނެ ކަމުގެ ޔަގީންކަން އެމްޑީޕީ ގެ ސަޕޯޓަރުންނަށް ދެއްވާފަ އެވެ.
ކުޑަހުވަދޫ ގެ އެމްޑީޕީ ސަޕޯޓަރުންނާ ދެއްކެވި ވާހަކަފުޅުގައި ރައީސް ސޯލިހް ވިދާޅުވީ، މިހާރުވެސް ރައީސް ނަޝީދު އާ މަޝްވަރާތައް ކުރައްވަމުން ގެންދަވާ ކަމަށާއި، މި ދަތުރުފުޅު ނިމުމާއެކު ރައީސް ނަޝީދު އާ ބައްދަލު ކުރައްވާ ދެ ބޭފުޅުން އެކުގައި މަސައްކަތް ކުރައްވާތަން ރައްޔިތުންނަށް ފެންނާނެ ކަމަށެވެ.
ކުޑަހުވަދޫގައި ހުންނެވި އެމްޑީޕީގެ ކުޑަހުވަދޫ ދާއިރާގެ ރައީސް ޝާތިރު އަބްދުއް ރަހުމާނު ވިދާޅުވީ، ރައީސް ސޯލިހް ދެއްކެވި ވާހަކަފުޅަކީ އެމްޑީޕީ މެމްބަރުންގެ އުއްމީދު ވަރަށް ބޮޑަށް އާވެގެން ދިޔަ ވާހަކަފުޅެއް ކަމަށާއި، ދެ ރައީސުން އެކުގައި މަސައްކަތް ފެއްޓެވުމަކީ ކުރިއަށް ހުރި އިންތިޚާބުތައް ކާމިޔާބު ކުރުމަށް ލިބޭނެ ވަރަށް ބޮޑު ބާރަކަށް ވާނެ ކަމުގައެވެ. އިތުރަށް ޝާތިރު ވިދާޅުވީ، ޕާޓީ އެކަތިގަނޑަކަށް ހެއްދެވުމަށް ރައީސް ސޯލިހް ކުރައްވަމުން ގެންދަވާ މަސައްކަތް ކުޑަހުވަދޫ ދާއިރާގެ އެމްޑީޕީ މެމްބަރުން ވަރަށް އުފަލާ އެކު ބަލައިގަންނަ ކަމަށެވެ.
