ހިރިލަންދޫ އިން ރައީސް ސޯލިހް އަށް ވަރަށް ފުރިހަމަ މަރުހަބާ އެއް ދަންނަވައިފި
ހޯމަ ދުވަހު މެންދުރު ރައީސް ޞާލިޙް ހިރިލަންދޫ އަށް ވަޑައިގަތުމުން އެމަނިކުފާނަށް މަރުހަބާ ދަންނަވަން، އެރަށު ކުދިބޮޑު ގިނަ އަދަދެއްގެ ރައްޔިތުން ބަނދަރު ސަރަހައްދަށް ޖަމާވެފަ. ހިރިލަންދޫ ކައުންސިލްގެ ޚާއްސަ ދައުވަތަކަށް ކުރައްވާ މި ދަތުރުފުޅުގައި އެރަށުގައި ތަރައްގީކޮށް ނިންމާފައިވާ "ހިރިވެލި ބީޗް" ސަރަހައްދު ހުޅުވުމުގެ ހަފްލާ ރައީސް ސޯލިހް ޝަރަފްވެރި ކޮށްދެއްވާނެ.
ރައީސް ސޯލިހް އަށް މަރުހަބާ ދެންނެވުމަށް ގިނަ އަދަދެއްގެ ރަައްޔިތުން ވަނީ ހިރިލަންދޫ ބަނދަރު ސަރަހައްދަށް ޖަމާވެފަ
ކުރީގެ ރައީސް އިބްރާހިމް މުހައްމަދު ސޯލިހް ތ.ހިރިލަންދޫ އަށް ވަޑައިގަތުމުން، އެރަށު ރައްޔިތުން އެމަނިކުފާނަށް ވަރަށް ފުރިހަމަ މަރުހަބާ އެއް ދަންނަވައިފި އެވެ.
ހޯމަ ދުވަހު މެންދުރު ރައީސް ސޯލިހް ހިރިލަންދޫ އަށް ވަޑައިގަތުމުން އެމަނިކުފާނަށް މަރުހަބާ ދަންނަވަން، އެ ރަށު ކުދިބޮޑު ގިނަ އަދަދެއްގެ ރައްޔިތުން ބަނދަރު ސަރަހައްދަށް ޖަމާވެފައިވެ އެވެ. ރައީސް ސޯލިހް އަށް މަރުހަބާ ދެންނެވުމުގައި ހިރިލަންދޫ ރަށު ކައުންސިލް ގެ މެންބަރުންނާއި މުއައްސަސާތަކުގެ އިސްވެރިން ވެސް ބައިވެރިވެ ވަޑައިގެންފައިވެ އެވެ.
ހިރިލަންދޫ ކައުންސިލް ގެ ޚާއްސަ ދައުވަތަކަށް ކުރައްވާ މި ދަތުރުފުޅުގައި އެރަށުގައި ތަރައްގީކޮށް ނިންމާފައިވާ "ހިރިވެލި ބީޗް" ސަރަހައްދު ހުޅުވުމުގެ ހަފްލާ ރައީސް ޞާލިޙް ޝަރަފްވެރި ކޮށްދެއްވާނެ އެވެ.
މި ދަތުރުފުޅުގައި ރައީސް ސޯލިހް ހިރިލަންދޫ ކައުންސިލާއި އެރަށު އެމްޑީޕީގެ މެންބަރުންނާ ބައްދަލުކުރައްވާނެ އެވެ. މީގެ އިތުރުން އެރަށު އިސްރަށްވެހިންނާއި މަސައްކަތްތެރިން ގެ ސައިޓްތަކަށް ޒިޔާރަތްކުރައްވަން ހަމަޖެހިފައިވެ އެވެ.
ރައީސް ސޯލިހްގެ ވެރިކަމުގައި ހިރިލަންދޫ ގައި ތަރައްގީ ގެ ގިނަ މަސައްކަތްތަކެއް ފައްޓަވައި ނިންމަވައިފައިވެ އެވެ. އެގޮތުން އެރަށުގެ ފެނާއި ނަރުދަމާ ޤާއިމުކުރުމާއި ފެނަކަ އައު އޮފީހެއް އިމާރާތްކުރުމާއި ހިރިލަންދޫ އައު އިންޖީނުގެ އިމާރާތްކުރުމުގެ މަސައްކަތް ފެށުން ހިމެނެ އެވެ. އަދި އިންޖީނުގެ އަށް 1000 ކިލޯވޯޓުގެ ދެ ޖެނެރޭޓަރ ސެޓް ފޯރުކޮށްދިނުމާއި ސޯލާ ޕީވީ ނިޒާމު ގާއިމުކުރުން ވެސް ހިމެނެ އެވެ.
މީގެ އިތުރުން ހިރިލަންދޫ ސްކޫލަށް ދިމާވެފައިވާ ޖާގައިގެ ދަތިކަން ހައްލުކުރުމުގެ ގޮތުން މަލްޓި ޕާޕަސް ހޯލަކާއެކު 8 ކްލާސްރޫމް ހިމެނޭ 3 ބުރީގެ އިމާރާތުގެ މަސައްކަތް ފަށައިފައިވެ އެވެ. ނަމަވެސް ވެރިކަން ބަދަލުވުމާއެކު މި މަޝްރޫއު ވަނީ ވަރަށް ބޮޑަށް މަޑުޖެހިފަ އެވެ.
ހިރިލަންދޫ ގައި ރައީސް ސޯލިހް ގެ ސަރުކާރުން ކުރެއްވި އެންމެ މުހިންމު ކަމެއްގެ ގޮތުގައި އެރަށު ރައްޔިތުން ފާހަގަކުރަނީ، ރަށުގެ ބިން ހިއްކުމެވެ. އެމްޑީޕީ ސަރުކާރުން 2022 ވަނަ އަހަރު ފެއްޓެވި މި މަސައްކަތުގެ ބޮޑު ބައެއް ވެރިކަން ބަދަލުވި އިރު ނިމިފައިވެ އެވެ.
ރައީސް ސޯލިހް ވަޑައިގެން ބޮޑު ހަފްލާއެއް ބާއްވައި ރިބަން ނުކެނޑިޔަސް، އެމަނިކުފާނުގެ ވެރިކަމުގައި ހިރިލަންދޫ ގައި ސެލްފް ސަރވިސް ބޭންކިންގ އޭޓީއެމް ސެންޓަރެއް ހުޅުވައިފައިވެ އެވެ.
ހިރިލަންދޫ އަށް ކުރައްވާ ދަތުރުފުޅު ނިންމާލެއްވުމަށްފަހު ރައީސް ސޯލިހް މާލެ ވަޑައިގަތުމަށް ހަމަޖެހިފައިވަނީ، އަންގާރަ ދުވަހުގެ ހަވީރު ގައި ކަމަށް މައުލޫމާތު ލިބެ އެވެ.
