އިޓާލިއަން ސެރީއޭގައި އޭސީ މިލާން ކުޅުނު މެޗުން ބަލިވިއިރު އިންޓަ މިލާންއާ ޔުވެންޓަސްއިން ކުޅުނު މެޗުތަކުން އެ ޓީމުތަށް މޮޅުވެއްޖެއެވެ.  

ލާޒިއޯއާ ދެކޮޅަށް ކުޅުނު މެޗުން އޭސީ މިލާން ބަލިވެފައިވަނީ 4-1 ގެ ތަފާތު ބޮޑު ނަތީޖާއަކުންނެވެ. ލާޒިއޯގެ އަމިއްލަ ދަނޑުގައި ކުޅުނު މި މެޗުގައި އޭސީ މިލާންގެ ޒުވާން ޓީމަށް މާ އެދެވޭ ކުޅުމެއް ދެއްކިފައެއްނުވެއެވެ. މި މެޗުގެ ފުރަތަމަ ލަނޑު 38 ވަނަ މިނުޓުގައި ލިބުނު ޕެނަލްޓީއަކުން ލާޒިއޯއަށް ކާމިޔާބު ކޮށްދިނީ މި މެޗުގައި މޮޅު ކުޅުމެއް ދެއްކި އެ ޓީމުގެ ފޯވާޑް ސިރޯ އިމޯބިލޭއެވެ. އޭގެ ފަސް މިނުޓު ފަހުން އޭނާވަނީ ހިތްގައިމު ގޯލެއް ކާމިޔާބު ކޮށްދީ ލާޒިއޯގެ ލީޑު އިތުރަށް ފުޅާ ކޮށްދީފައެވެ.

ފުރަތަމަ ހާފު ނިމިގެން ދިޔައީ 2-0 ގެ ނަތީޖާއަކުން އޭސީ މިލާންގެ މައްޗަށް ލާޒިއޯ ކުރީގަ އޮވެގެންނެވެ.

ދެވަނަ ހާފު ފެށިގެން ތިން ވަނަ މިނުޓުގައި އިމޯބިލޭވަނީ ލާޒިއޯއަށް އިތުރު ގޯލެއް ކާމިޔާބު ކޮށްދީ އޭނާގެ ހެޓްރިކް ފުރިހަމަ ކޮށްފައެވެ. އަދި ހަމަ އޭގެ މިނުޓެއް ފަހުން ލާޒިއޯގެ ފޯވާޑް ލުއިޒް އަލްބާޓޯވަނީ އެ ޓީމުގެ ހަތަރުވަނަ ގޯލު ކާމިޔާބު ކޮށްދީފައެވެ. މެޗުގެ 56 ވަނަ މިނުޓުގައި މިލާންއަށް މެޗުގެ ނަތީޖާގެ ފަރަގު ކުޑަކޮށްދިނީ ތަޖުރިބާކާރު މިޑްފީލްޑާ ރިކާޑޯ މޮންޓޮލީވޯއެވެ.

އިންޓަ މިލާނުން ވަނީ ސެރީއޭ އަށް އަލަށް ޕްރޮމޯޓްވި ސްޕަލް 2-0 ގެ ނަތީޖާއަކުން ބަލިކޮށްފައެވެ. އިންޓަގެ އަމިއްލަ ދަނޑުގައި ކުޅުނު މި މެޗުގައި އެ ޓީމުގެ ފަރާތުން މޮޅު ކުޅުމެއް ފެނިގެން ދިޔައިރު އެ ޓީމުން ވަނީ ފުރަތަމަ ހާފުގެ 27 ވަނަ މިނުޓުގައި މެޗުގެ ލީޑު ނަގާފައެވެ. މި ލަނޑު ލިބުނު ޕެނަލްޓީއަކުން އެ ޓީމަށް ކާމިޔާބުކޮށްދިނީ ކެޕްޓަން މައުރޯ އިކާޑިއެވެ. މި މެޗުގައި އިންޓައިން ކާމިޔާބުކުރި ދެވަނަ ލަނޑު 87 ވަނަ މިނުޓުގައި އެ ޓީމަށް ކާމިޔާބު ކޮށްދިނީ ކްރޮއޭޝިއާގެ މިޑްފީލްޑާ އިވާން ޕެރިސިޗްއެވެ.

 މިދިޔަ ސީޒަނުގައި ސެރީއޭގެ ޗެމްޕިއަންކަން ހޯދި ޔުވެންޓަސްއިންވަނީ އަމިއްލަ ދަނޑުގައި ކިއޭވޯ ވެރޯނާ 3-0 އަކުން ބަލިކޮށްފައެވެ. މެޗުގެ 17 ވަނަ މިނުޓުގައި ޔުވެންޓަސްއަށް މެޗުގެ ލީޑު ލިބުނީ ކިއެވޯގެ ކުޅުންތެރިޔެއްގެ އަތުން ބައިކޮޅަށް ވަން ލަނޑަކުންނެވެ. އިތުބާރު ފޯވާޑް ގޮންޒާލޯ ހިގުއައިން ވަނީ މެޗުގެ 58 ވަނަ މިނުޓުގައި ލަނޑެއް ޖަހާ ޔުވެންޓަސްގެ ލީޑު ފުޅާކޮށްދީފައެވެ. އަދި މެޗު ނިމެން ހަތް މިނުޓަށްވެފައި ވަނިކޮށް ޒުވާން ފޯވާޑް ޕައުލޯ ޑިބާލާ ވަނީ ލަނޑެއް ކާމިޔާބުކޮށް ޔުވެންޓަސްއަށް ތިން ޕޮއިންޓް ކަށަވަރު ކޮށްދީފައެވެ.

މި މޮޅާއެކު ޔުވެންޓަސް އޮތީ ކުޅުނު ތިން މެޗު ވެސް ކާމިޔާބުކޮށް 9 ޕޮއިންޓާއެކު ތާވަލުގެ އެއްވަނައިގައެވެ. ހަމައެހެންމެ އިންޓަމިލާން އޮތީ 9 ޕޮއިންޓް ލިބި ލަނޑުގެ ތަފާތުން ތާވަލުގެ ތިންވަނައިގައެވެ. ބޮޑު ތަފާތަކުން ބަލިވި ނަމަވެސް އޭސީ މިލާން އޮތީ 6 ޕޮއިންޓާއެކު ތާވަލުގެ ހަތް ވަނައިގައެވެ.