އިޓާލިއަން ސެރިއާގައި ބޮޑު ތަފާތަކުން ޖެނޯއާ ބަލިކޮށް ޔުވަންޓަސް ޕޮއިންޓް ތާވަލުގައި 11 ޕޮއިންޓްގެ ލީޑެއް ނަގައިފި އެވެ.
އާދީއްތަ ދުވަހުގެ ރޭ ކުޅުނު މެޗު ޖެނޯއާއާ ވާދަކޮށް ޔުވަންޓަސް އިން މެޗު ކާމިޔާބުކުރީ 0-4 ގެ ތަފާތުބޮޑު ނަތީޖާއަކުންނެވެ.
ޔުވަންޓަސް ދަނޑުގައި ކުޅުނު މި މެޗު ފެށިގެން ބޯޅަ ކޮންޓްރޯލްކޮށްގެން ރަގނަޅަށް ކުޅެފައިވަނީ އެޓީމުންނެވެ. އެގޮތުން 17 ވަނަ މިނެޓުގައި ޔުވަންޓަސް އިން ވަނީ މެޗުގެ ލީޑު ނަގާފައެވެ. މި ލަނޑަކީ ޖެނޯއާގެ މުނޯޒް އަތުން ބައިކޮޅަށް ވަތް ލަނޑެކެވެ.
އޭގެ މިނެޓެއް ފަހުން ޔުވަންޓަސް އަށް މެޗުގެ ލީޑު ފުޅާކޮށްދިނީ ފަހަކަށް އައިސް މޮޅު ކުޅުމެއް ދައްކާ ގިނަ ކްލަބްތަކުގެ ޝައުގުވެރިކަން ހޯދަމުން އަންނަ ޑީބަލާ އެވެ.
މީގެއިތުރުންވެސް ޔުވަންޓަސް އިން ވަނީ ޖެނޯއާގެ ހާފަށް ބާރުބޮޑުކޮށް ފުލުފުލުގައި ގިނަ ހަމަލާތައް ފޮނުވާލާފައެވެ. ޔުވަންޓަސް އިން މެޗުގައި ކާމިޔާބުކުރި ތިންވަނަ ލަނޑު 41 ވަނަ މިނެޓުގައި އެޓީމަށް ކާމިޔާބުކޮށްދިނީ މާރިއޯ މަންޒުގިޗް އެވެ.
ފުރަތަމަ ހާފް ނިމުނީ 0-3 ގެ ނަތީޖާއިން ޖެނޯއާގެ މައްޗަށް ޔުވަންޓަސް ކުރީގައި އޮވެގެންނެވެ.
MARIO MANDZUKIC, MARIO MANDZUKIC, MARIO MANDZUKIC, MARIO MANDZUKIC #FINOALLAFINE #FORZAJUVE #JUVEGENOA [3-0] pic.twitter.com/NFkXuw5SGF
— JuventusFC (@juventusfcen) April 23, 2017
ދެވަނަ ހާފް ފެށިގެންވެސް ރަނގަޅަށް ކުޅެފައިވަނީ ޔުވަންޓަސް އެވެ. އެގޮތުން ލަނޑު ޖެހުމަށް އެޓީމުން ވަނީ ގިނަ ފުރުސަތުތަކެއް ތަނަވަސްކޮށްފައެވެ. ޔުވަންޓަސް އިން މެޗުގައި ކާމިޔާބުކުރި ހަތަރުވަނަ ލަނޑު 64 ވަނަ މިނެޓުގައި އެޓީމަށް ކާމިޔާބުކޮށްދިނީ ލިއޮނާޑޯ ބޮނުޗީ އެވެ.
މީގެއިތުރުންވެސް އެޓީމަށްވަނީ ލީޑު ފުޅާކުރަން ހުސް ގިނަ ފުރުސަތުތަކެއް ލިބިފައެވެ. އެހެނެނަމަވެސް ޖެނޯއާ އިން މެޗުގެ ފަހު 20 މިނެޓު ތެރޭގައި ކުރި މޮޅު ޑިފެންސާއެކު ޔުވަންޓަސް އަށް ލީޑު އިތުރަށް ފުޅާކުރެވޭ ގޮތް ވަނީ ނުވެފައެވެ.
މި ނަތީޖާއާއެކު ޔުވަންޓަސް އޮތީ ކުޅުނު 33 މެޗުން ލިބުނު 83 ޕޮއިންޓާއެކު ޕޮއިންޓް ތާވަލުގެ އެއްވަނައިގައެވެ. މެޗުން ބަލިވި ޖެނޯއާ އޮތީ ކުޅުނު 33 މެޗުން ލިބުނު 30 ޕޮއިންޓާއެކު ޕޮއިންޓް ތާވަލުގެ 16 ވަނައިގަ އެވެ.
