އިނގިރޭސި ޕްރިމިއަރ ލީގުގައި ކްރިސްޓަލް ޕެލަސްއާ ދެކޮޅަށް ކުޅުނު މެޗުން ލިބުނު މޮޅަކީ، މި ސީޒަންގެ މިހާތަނަށް ލިބުނު އެންމެ މުހިންމު މޮޅު ކަމަށް އާސެނަލްގެ ކޯޗު މިކޭލް އާޓެޓާ ބުނެފި އެވެ.

އާސެނަލްގެ އަމިއްލަ ދަނޑުގައި ކުޅުނު މެޗުގައި އެ ޓީމުން ވަނީ 1-0 އިން ޕެލަސްގެ މައްޗަށް ކުރި ހޯދައިފަ އެވެ. އެ މޮޅާ އެކު އާސެނަލް އިން ވަނީ ލީގު ތާވަލްގެ އެއް ވަނައިގައި ހަތަރު ޕޮއިންޓުގެ ލީޑެއް ނަގައިފަ އެވެ.

ޕެލަސް މެޗަށް ފަހު ނޫސްވެރިންނާ ވާހަކަ ދައްކަމުން އާޓެޓާ ބުނެފައި ވަނީ، ޕެލަސް އަތުން ލިބުނު މޮޅަކީ މި ސީޒަންގައި އާސެނަލް އަށް ލިބުނު އެންމެ މުހިންމު މޮޅު ކަމަށެވެ. އެކަން ކުޅުންތެރިންގެ ގާތުގައި ވެސް ބުނެފައިވާނެ ކަމަށާއި، ކޮންމެ ތިން ދުވަހަކުން ކަހަލަ ގޮތަކަށް މެޗުތައް ކުޅެން ޖެހުމަކީ އުނދަގޫ ކަމެއް ކަމަށް އާޓެޓާ ބުންޏެވެ.

އާޓެޓާ ބުނީ ރޭވުންތެރިކަމާއި، ކުޅުމުގެ ވައްޓަފާޅި އަށް ބަލާއިރު މި ފަހުން އެންމެ ރަނގަޅު ޓީމު ތަކުގެ ތެރޭގައި ޕެލަސް ހިމެނޭ ކަމަށެވެ. އެގޮތުން އެ ޓީމާ ދެކޮޅަށް ކުޅެން އުނދަގޫ ވާނެކަން ކުރިން ވެސް އިނގޭ ކަމަށް އާޓެޓާ ބުންޏެވެ. އޭނާ ބުނީ އެ މެޗަށް ނިކުތްއިރު ވެސް އާސެނަލް އަށް ވަރަށް ބޮޑު ފުރުސަތެއް އޮތް ކަމަށާއި، ކުޅުންތެރިން އެކަމުގެ ފައިދާ ނެގުމުން ވަރަށް ރަނގަޅު އިޙުސާސެއް ކުރެވޭ ކަމަށެވެ.

މީގެ އިތުރުން އާޓެޓާ ބުނީ މެޗުގައި އާސެނަލްގެ ކުޅުންތެރިން ކުޅުނީ ވަރަށް ހަމަ ޖެހިގެން ކަމަށާއި، އާސެނަލް އިން ބޭނުންވާ ވައްޓަފާޅީގައި ކުޅެވުނު ކަމަށެވެ. މެޗުގެ ފުރަތަމަ ހާފަށް އިޝާރާތް ކުރަމުން އާޓެޓާ ބުނީ، އެ ހާފުގައި ބައެއް ކަހަލަ އުނދަގޫ ތަކެއް ކުރިމަތިވި ނަމަވެސް، ފަހުން ކުޅުންތެެރިން އެކަން ވަރަށް ބޮޑަށް ރަނގަޅު ކުރި ކަމަށެވެ. ޚާއްސަކޮށް ދެ ވަނަ ހާފުގައި އާސެނަލް އިން ވަރަށް ބޮޑަށް އެޓޭކަށް އިސްކަން ދީގެން ކުޅުނު ކަމަށް އޭނާ ބުންޏެވެ.

އާސެނަލް އިން ލީގު ތާވަލްގެ އެއް ވަަނައިގައި އޮތްއިރު، އާޓެޓާ ބުނީ ކުރިއަށް ދާން ޖެހޭނީ ވިސްނުންތެރިކަމާ އެކު ކަމަށެވެ. ޚާއްސަކޮށް ކުރިއަށް ހުރި މެޗު ތަކުން ވެސް މޮޅުވާން މަސައްކަތް ކުރަން ޖެހޭ ކަމަށާއި، މިވަގުތު އޮތް ރޫޙުގައި އާސެނަލް އަށް އެކަން ކުރެވޭނެ ކަމަށް ޤަބޫލު ކުރާ ކަމަށް އޭނާ ބުންޏެވެ. އެގޮތުން ރަނގަޅު ކުރަން ހުރި ކަންކަމަށް ވިސްނައިގެން އާސެނަލް ކުރިއަށް ދާނެ ކަމަށާއި، ކުޅުންތެރިންގެ ފެންވަރު ވެސް ރަނގަޅު ވާނެ ކަމަށް އާޓެޓާ ވަނީ ބުނެފަ އެވެ.

މިހާތަނަށް ލީގުގައި ކުޅެފައިވާ ނުވަ މެޗުން 22 ޕޮއިންޓާ އެކު އާސެނަލް އޮތީ އެއް ވަނައިގަ އެވެ. މި ސީޒަންގެ ޕްރިމިއާ ލީގުގައި ހަތް މެޗުން އާސެނަލް ވަނީ މޮޅުވެފަ އެވެ. އެއް މެޗުން ބަލިވެފައިވާއިރު، އަނެއް މެޗުން ވަނީ އެއްވަރުވެފަ އެވެ. ލީގުގައި އާސެނަލް އަށް ދެން އޮންނާނީ ރަށުން ބޭރުގައި ބާންލީއާ ދެކޮޅަށް ކުޅޭ މެޗެވެ.