އިހުތިޖާޖު ކުރުމުގެ ގޮތުން އިންޑިއާ ގައި ހުންނަވާ ބަންގްލަދޭޝްގެ ސަފީރު އިންޑިއާ ގެ ފޮރިން މިނިސްޓްރީ އަށް ހާޒިރު ކޮށްފި

ބަންގްލަދޭޝް ގެ ޑާކާގައި ހުންނަ އިންޑިއާ ގެ ހައިކޮމިޝަން އަށް ނުރައްކާ ވަމުން ދާތީ، އެކަމާ އިހުތިޖާޖު ކުރުމުގެ ގޮތުން އިންޑިއާ ގައި ހުންނަވާ ބަންގްލަދޭޝްގެ ސަފީރު އިންޑިއާގެ ފޮރިން މިނިސްޓްރީ އަށް ހާޒިރު ކޮށްފި އެވެ.

ބުދަ ދުވަހު، ބަންގްލަދޭޝްގެ ސަފީރު ރިޔާޒް ހަމީދުﷲ ހާޒިރުކޮށް، ބައެއް "ހައްދުފަހަނަ އެޅި މީހުންގެ" އަމަލުތަކުގެ ސަބަބުން ހުރި ސަލާމަތީ ކަންބޮޑުވުންތައް ހިއްސާކުރި ކަމަށް އެ ވުޒާރާ އިން ބަޔާނެއްގައި ބުނެފައިވެއެވެ.

އިންޑިއާ ގެ ބަޔާނުގައި ވަނީ ބަންގްލަދޭޝް ގައި ހުންނަ އިންޑިއާގެ މިޝަންގެ ސަލާމަތާ ރައްކައުތެރިކަން ބަންގްލަދޭޝް ގެ ވަގުތީ ސަރުކާރުން ކަށަވަރު ކޮށްދޭނެ ކަމަށް އުއްމީދު ކުރާ ކަމުގައެވެ.

އިންޑިއާ އިން ބަންގްލަދޭޝް ގެ ސަފީރު ހާޒިރު ކުރީ ބަންގްލަދޭޝްގެ ބަޔަކު އިންޑިއާގެ ހައިކޮމިޝަން ކައިރި އަށް އެއްވެ، އިންޑިއާ ގައި ހުރި ބަންގްލަދޭޝްގެ ކުރީގެ ބޮޑު ވަޒީރު ޝެއިޚް ހަސީނާ ބަންގްލަދޭޝް އަށް ފޮނުވާލުމަށް ގޮވާލާ މުޒާހަރާ ކުރުމާ ގުޅިގެންނެވެ. 

ހަސީނާ ގެ ވެރިކަން ވެއްޓެން މެދުވެރިވި ދަރިވަރުންގެ މުޒާހަރާތަކާ ގުޅިގެން އޭނާ ވަނީ ފިލައިގެން އިންޑިއާ އަށް ދަތުރު ކޮށްފަ އެވެ. އަދި މިހާރު އޭނާ ދިރިއުޅެމުން ގެންދަނީ އިންޑިއާ ގަ އެވެ.

އިންޑިއާ ގެ ކަންބޮޑުވުން ތަކަށް ބަންގްލަދޭޝް އިން އަދި ވަކި އެއްޗެއް ބުނެފަ އެއް ނުވެ އެވެ.

އަނެއްކޮޅުން މިދިޔަ އާދީއްތަ ދުވަހު، ބަންގްލަދޭޝުން ޑާކާގައި ހުންނަ އިންޑިއާ ގެ ސަފީރު ވަނީ އެ ގައުމުގެ ފޮރިން މިނިސްޓްރީ އަށް ހާޒިރު ކޮށްފައެވެ. އޭނާ ހާޒިރު ކުރީ އިންޑިއާ ގައި ހުރެގެން ކުރިއަށް އޮތް ބަންގްލަދޭޝް ގެ އާންމު އިންތިޚާބަށް ހުރަސް އެޅޭ ގޮތައް ދެއްކި ވާހަކަތަކަށް އިހުތިޖާޖު ކުރުމުގެ ގޮތުން ކަމަށް ރިޕޯޓުތައް ބުނެއެވެ.

ބަންގްލަދޭޝް ގައި ފެބްރުއަރީ 12 ގައި އިންތިހާބު ބާއްވަން ހަމަޖެހިފައި ވަނީ، ހަސީނާ އޯގަސްޓް 2024 ގައި އިންޑިއާ އަށް ދިޔުމަށްފަހު އެ ގައުމުގެ ވެރިކަމާ ހަވާލުވި ނޮބެލް އިނާމް ލިބިފައިވާ މުހައްމަދު ޔޫނުސްގެ ވަގުތީ ސަރުކާރުގެ ބެލުމުގެ ދަށުންނެވެ.

ބަންގްލަދޭޝް އިން ކުރި އިހުތިޖާޖު ބަލައި ނުގަންނަ ކަމަށް އިންޑިއާ އިން ވަނީ ބުނެފަ އެވެ.

ބޮޑު ހަމަނުޖެހުންތަކަކާ ގުޅިގެން އިންޑިއާ އަށް ހަސީނާ ދިޔުމަށްފަހު ދެގައުމުގެ ގުޅުން ވަރަށް ބޮޑަށް ވަނީ ގޯސްވެފަ އެވެ. އޭނާ ހިންގި ކަމަށް ތުހުމަތު ކުރެވޭ ކުށްތަކުގެ ޝަރީއަތާ ކުރިމަތިލުމަށް ގައުމަށް ފޮނުވުމަށް ބަންގްލަދޭޝް އިން ވަނީ އިންޑިއާ ގައި އެދިފަ އެވެ.

ފާއިތުވި މަހު، ބަންގްލަދޭޝްގެ ކޯޓަކުން ހަސީނާގެ މައްޗަށް ވަނީ މަރުގެ ހުކުމް އިއްވާފަ އެވެ. އޭނާ ގެ މައްޗަށް ސާބިތުވި ދައުވާ އަކީ މުޒާހަރާކުރާ މީހުންނާ ދެކޮޅަށް ފުރާނަ އަށް ނުރައްކާވާ ފަދަ ބާރުގެ ބޭނުން ކުރުމަށް ހުއްދަ ދިނުމެވެ. ހަސީނާގެ ވެރިކަން ވެއްޓުނު މުޒާހަރާ ތަކުގައި މަދުވެގެން 1،400 މީހުން މަރުވިއެވެ.