ބަންގްލަދޭޝްގެ ކުރީގެ ލީޑަރު ޝެއިޚް ހަސީނާ އަށް މަރުގެ އަދަބު ދިނުމަށް އެދިއްޖެ

ބަންގްލަދޭޝްގެ ކުރީގެ ލީޑަރު ޝެއިޚް ހަސީނާ އަށް މަރުގެ އަދަބު ދިނުމަށް ޕްރޮސެކިއުޓަރުން އެދިއްޖެ އެވެ.

މިދިޔަ އަހަރު ހަސީނާ ވެރިކަމުން ވެއްޓެން ދިމާވި ބަންގްލަދޭޝްގެ ދަރިވަރުން އިސްނަގައިގެން ހިންގި އިހުތިޖާޖުތައް ހުއްޓުވަން އެޅި ހަރުކަށި ފިޔަވަޅުތަކުގެ ސަބަބުން އެތައް ބަޔަކު މަރުވުމާ ގުޅިގެން އޭނާގެ މައްޗަށް ހިނގަމުންދާ ޝަރީއަތުގައި ޕްރޮސެކިއުޓަރުން އެދޭ ގޮތް ހާމަ ކުރަމުން ޗީފް ޕްރޮސެކިއުޓަރ ބުނެފައިވަނީ އެނާގެ މައްޗަށް މަރުގެ ހުކުމް ކަނޑައެޅުމަށް އެދޭ ކަމުގައެވެ.

އިންޑިއާ އަށް ފިލައިގެން ދިޔަ ހަސީނާ އަކީ އިންސާނިއްޔަތާ ޚިލާފު ކުށްތަކުގެ ތުހުމަތުގައި ޝަރީޢަތް ހިނގަމުންދާ މީހެކެވެ. ލީކްވެފައިވާ އޯޑިއޯ ކްލިޕެއްގައިވާ ގޮތުން، އޭނާ ވަނީ ސެކިއުރިޓީ ބާރުތަކަށް އިހުތިޖާޖުކުރާ މީހުންނާ ދެކޮޅަށް "ފުރާނަ އަށް ނުރައްކާވާ" ހަތިޔާރު ބޭނުން ކުރުމަށް އަމުރުކޮށްފައެވެ. ހަސީނާ މި ދަޢުވާތައް ދޮގުކުރެއެވެ.

ހަސީނާގެ 15 އަހަރުގެ ވެރިކަން ނިމުމަކަށް ގެނައި ހަމަނުޖެހުންތަކުގައި 1,400 އަށް ވުރެ ގިނަ މީހުން މަރުވިއެވެ. މިއީ ބަންގްލަދޭޝްގެ 1971 ގެ މިނިވަންކަމުގެ ހަނގުރާމައަށް ފަހު އެ ޤައުމުގައި ފެނިފައިވާ އެންމެ ނުރައްކާތެރި ހާދިސާ އެވެ.

ޗީފް ޕްރޮސެކިއުޓަރު ތާޖުލް އިސްލާމް ބުނެފައިވަނީ ހަސީނާ އަށް 1,400 ފަހަރު މަރުގެ އަދަބު ދިނުމަށް އޭނާ އެދޭ ކަމަށެވެ. "އެއީ އިންސާނެއްގެ މައްޗަށް ތަންފީޒު ކުރެވޭނެ އަދަބަކަށް ނުވާތީ، އަޅުގަނޑުމެން އެދެނީ މަދުވެގެން އެއް ފަހަރު [މަރުގެ އަދަބު ދިނުމަށް]،" އޭނާ ބުންޏެވެ.

"[ހަސީނާގެ] މަޤްޞަދަކީ އޭނާ އާއި އޭނާގެ އާއިލާ އަށް ތާއަބަދަށް ވެރިކަން ދެމެހެއްޓުން،" އިސްލާމް ބުރާސްފަތި ދުވަހު ކޯޓުގައި ބުންޏެވެ.

"އޭނާ ވަނީ ކުށްވެރިއަކަށް ބަދަލުވެފައި އަދި އޭނާ ހިންގި އަނިޔާވެރިކަމަށް އެއްވެސް ހިތާމައެއް ނުކުރޭ،" އޭނާ ބުންޏެވެ.

ޖުލައި 2024 ގައި މި އިހުތިޖާޖުތައް ފެށުނީ 1971 ގެ ހަނގުރާމާގައި ބައިވެރިވި މީހުންގެ ގާތްތިމާގެ މީހުންނަށް ސިވިލް ސަރވިސްގެ ވަޒީފާތަކަށް ކަނޑައަޅާފައި އޮންނަ ކޯޓާ ދިނުމާ ދެކޮޅަށެވެ. ނަމަވެސް އެ އިހުތިޖާޖުތައް އިސާހިތަކު ބަދަލުވެގެން ދިޔައީ ހަސީނާ ވައްޓާލުމުގެ ބޮޑު ހަރަކާތަކަށެވެ.

އެންމެ ލޭއޮހޮރުވުން ބޮޑު މަންޒަރުތައް ފެނުނީ 5 އޯގަސްޓުގައެވެ. އެއީ ހަސީނާ ހެލިކޮޕްޓަރުގައި ފިލައިގެން ދިޔަ ދުވަހެވެ. އޭގެ ފަހުން ޑާކާގައި ހުރި އޭނާގެ ގެއަށް މީހުން އަރައިގަތެވެ.

އެ ދުވަހު ޑާކާގައި މަދުވެގެން 52 މީހުންން ފުލުހުންގެ ހަމަލާތަކުގައި މަރުވިއެވެ. މިއީ ބަންގްލަދޭޝްގެ ތާރީޚުގައި ފުލުހުންގެ އެންމެ އަނިޔާވެރި ޢަމަލުތަކުގެ ތެރެއިން އެއް ޢަމަލެވެ.

ހަސީނާގެ ފަރާތުން ދިފާޢީ ވަކީލު ބުނާ ގޮތުގައި އިހުތިޖާޖުކުރި މީހުންގެ އަނިޔާވެރި ޢަމަލުތަކުގެ ސަބަބުން ބަޑި ޖަހަން ފުލުހުންނަށް މަޖުބޫރުވީއެވެ.

ހަސީނާގެ އިތުރުން އޭނާގެ ކުރީގެ ދާޚިލީ ވަޒީރު އަސަދުއްޒަމާން ޚާން ކަމާލް އަދި ކުރީގެ ފުލުސް އޮފީހުގެ އިސްވެރިޔާ ޗައުދުރީ އަބްދުﷲ އަލް-މަމޫން ގެ މައްޗަށް ވެސް ވަނީ ދައުވާ އުފުލާފައެވެ.

ޕްރޮސެކިއުޓަރުން ވަނީ ފިލައިގެން އުޅޭ ކަމާލް އަށް ވެސް މަރުގެ އަދަބު ދިނުމަށް އެދިފައެވެ. ޗައުދުރީ ވަނީ ޖުލައި މަހު ކުށަށް އިޢުތިރާފުވެފައެވެ. ނަމަވެސް އޭނާއަށް އަދި ޙުކުމެއް އިއްވާފައެއް ނުވެއެވެ.

ހަސީނާ އަށް ވަނީ ކުރިން ކޯޓުގެ އަމުރަށް ނުކިޔަމަންތެރިވުމުގެ ކުށުގައި 6 މަސްދުވަހުގެ ޖަލު ޙުކުމެއް އިއްވާފައެވެ. އަދި އޭނާގެ މައްޗަށް ވަކިން ކޮރަޕްޝަންގެ ދަޢުވާތަކެއްވެސް އުފުލިފައިވެއެވެ.

ބަންގްލަދޭޝްގެ ދެން އޮތް އިންތިޚާބު ބޭއްވުމަށް ހަމަޖެހިފައި ވަނީ ފެބްރުއަރީ މަހުގައެވެ. މި އިންތިޚާބުގައި ހަސީނާގެ ވާދަވެރި ޕާޓީ ބީ.އެން.ޕީ އިން ބޮޑު ކާމިޔާބެއް ހޯދާނެ ކަމަށް ބެލެވެއެވެ. ހަސީނާގެ ޕާޓީ އަވާމީ ލީގަށް ވަނީ އިންތިޚާބުގައި ބައިވެރިވުމާއި ސިޔާސީ ހަރަކާތް ހިންގުން މަނާ ކޮށްފައެވެ.