އަވާމީ ލީގުން އދގެ އޮފީސް ކުރިމަތީ މުޒާހަރާ ކޮށްފި

ވެރިކަމުން ދުރުކޮށްފައިވާ ބަންގްލަދޭޝްގެ ކުރީގެ ބޮޑުވަޒީރު ޝައިޚް ހަސީނާގެ އަވާމީ ލީގުން، ޖެނީވާގައި ހުންނަ އދގެ އޮފީހުގެ ކުރިމަތީ ގައި މުޒާހަރާ ކޮށްފި އެވެ.

އދ.ގެ އިންސާނީ ހައްޤުތަކާ ބެހޭ މަޖިލީހުގެ 60 ވަނަ ސެޝަން ކުރިއަށް ދަނިކޮށް ކުރި މި މުޒާހަރާ އަކީ ބަންގްލަދޭޝް ހިންގުމާ ހަވާލުވެ ހުންނެވި މުޙައްމަދު ޔޫނުސްގެ ވެރިކަމުގައި އެ ގައުމުގައި ހިންގާ ކަމަށް ތުހުމަތު ކުރެވޭ އިންސާނީ ހައްގުތަކާ ހިލާފު އަމަލުތައް ދުނިޔޭގެ ސަމާލު ކަމަށް ގެނައުމަށް ބޭއްވި މުޒާހަރާ އެކެވެ.

ފޯނުން ގުޅުއްވައިގެން މުޒާހަރާގެ ބައިވެރިންނާ ޝައިޚް ހަސީނާ ވަނީ މުޚާޠަބު ކުރައްވައި ވާހަކަ ދައްކަވާފައި އެވެ. މުޒާހަރާގެ ބައިވެރިން ތުހުމަތު ކުރާ ގޮތުގައި ބަންގްލަދޭޝްގެ ވަގުތީ ސަރުކާރުން ވަނީ އެތައް ބަޔަކު މެރުމާއި ގެއްލުވާލުމުގައި ބައިވެރިވެފަ އެވެ.

އަދި ސިޔާސީ އިދިކޮޅު ފަރާތްތަކުގެ މައްޗަށް ދޮގު ތުހުމަތުތައްކޮށް، މައްސަލަތައް ކުރިއަށްދާ ކަމަށް ވެސް މުޒަހަރާގެ ބައިވެރިން ތުހުމަތު ކުރި އެވެ. މުޒާހަރާގެ ބައިވެރިން ގެންގުޅުނު ބެނާ ތަކުގައި ޔޫނުސްގެ އިސްތިއުފާ އަށް ގޮވާލާފައިވާއިރު، އޭނާ އަށް ލިބިވަޑައިގެންނެވި ނޮބެލް ސުލްހައިގެ އިނާމު އަތުލުމަށް ވެސް އެމީހުން ގޮވާލި އެވެ.

ޖެނީވާގައި ކުރިއަށްދާ އދގެ އިންސާނީ ހައްޤުތަކާއި ބެހޭ މަޖިލީހުގެ 60 ވަނަ ސެޝަންގެ ހަވާސާގައި، ބަންގްލަދޭޝްގެ އިންސާނީ ހައްޤު ތަކުގެ ދެރަ ޙާލަތާ ބެހޭ ބައްދަލުވުމެއް ވެސް ވަނީ ބާއްވާފައި އެވެ.