ކުރީ ސަރުކާރުން އަޅަން ފެށި ފީއަލީގެ މެޖިސްޓްރޭޓް ކޯޓު، ވެރިކަން ބަދަލުވުމުން ހުއްޓުނު ގޮތަށް ވީރާނާވެ ދަނީ

ކުރީގެ ރައީސް އިބްރާހީމް މުޙައްމަދު ޞާލިޙުގެ ސަރުކާރުން ފ.ފީއަލީގައި އިމާރާތް ކުރަން ފެށި މެޖިސްޓްރޭޓް ކޯޓުގެ މަސައްކަތް، ވެރިކަން ބަދަލުވީ ފަހުން ހުއްޓުނު ގޮތަށް ވީރާނާވާން ފަށައިފި އެވެ.

ފީއަލީ ކައުންސިލްގެ ނައިބު ރައީސް މުޙައްމަދު ޖަލީލް ރާއްޖެ ޓީވީ އަށް ވިދާޅުވީ، އައު މެޖިސްޓްރޭޓް ކޯޓެއްގެ އިމާރާތަކީ ވަރަށް ބުރަ މަސައްކަތާ އެކު ސަރުކާރު ތެރެއިން ހޯދި މަސައްކަތެއް ކަމަށެވެ. މެޖިސްޓްރޭޓް ކޯޓުގެ މަސައްކަތް ފަށައި ވަކި ހިސާބަކަށް ދިޔަ ފަހުން ސަރުކާރު ބަދަލުވީ ކަމަށާއި، އޭގެ ފަހުން އެއްވެސް މަސައްކަތެއް ކުރިއަށް ނުދާ ކަމަށް ޖަލީލް ފާހަގަ ކުރެއްވި އެވެ.

ޖަލީލް ފާހަގަ ކުރެއްވީ މިހާރުގެ ސަރުކާރަށް ނިސްބަތްވާ ފީއަލީގެ ބައެއް ސިޔާސީ އިސްވެރިން، ކުރިން ވެސް އެ މަސައްކަތަށް ހުރަސް އަޅާފައިވާ ކަމަށާއި، އެތައް ގޮންޖެހުން ތަކެއް ކުރިމަތި ކުރުމަށް މަސައްކަތް ކުރި ކަމަށެވެ. އޭގެ ފަހުން 2023 ވަނަ އަހަރު ސަރުކާރު ބަދަލުވީ ފަހުން ވެސް، އެ މަސައްކަތް ކުންފުންޏަކާ ހަވާލު ކުރިކަން އިއުލާން ކުރި ކަމަށް ޖަލީލް ވިދާޅުވި އެވެ.

ނަމަވެސް، ސިޔާސީ ބައެއް މީހުން ބޭނުންވާ ބަޔަކަށް އެ މަސައްކަތް ދިނުމުގެ މަޤުސަދުގައި އެކަން ވަރަށް ބޮޑަށް ސިޔާސީ ކުރި ކަމަށާއި، އޭގެ ފަހުން އެ މަސައްކަތް އޮތީ ހުއްޓިފައި ކަމަށް ޖަލީލް ވިދާޅުވި އެވެ. އިމާރާތުގެ މަސައްކަތް ހުއްޓިފައި ހުންނަތާ ދެ އަހަރަށް ވުރެ ގިނަ ދުވަސްވެފައިވާއިރު، އެ ތަން ބަލިކަށިވާން ފަށާފައިވާ ކަމަށް ފާހަގަ ކުރެއްވި އެވެ.

މިއަހަރުގެ ތެރޭގައި ރައީސުލްޖުމްހޫރިއްޔާ ޑޮކްޓަރު މުޙައްމަދު މުޢިއްޒު ފީއައްޔަށް ވަޑައިގެންނެވުމުން، މެޖިސްޓްރޭޓް ކޯޓު އަދި ފީއަލީގެ ތަރައްޤީ އަށް ހުރި އެހެން މަސައްކަތްތައް ވެސް ހުއްޓިފައި އޮތުމުގެ ކަންބޮޑުވުން ކައުންސިލް އިން ވަނީ ރައީސްއާ ހިއްސާ ކުރައްވައިފަ އެވެ. އެހެން ނަމަވެސް، ރައީސްގެ ޖަވާބަކަށް ވެގެން ދިޔައީ ހުރިހާ މަސައްކަތެއް ވެސް ކުރިއަށް ދާނެކަން ކަމުގައި ޖަލީލް ވިދާޅުވި އެވެ. 

އޭގެ ފަހުން ވެސް މިވީ މުއްދަތުގެ ތެރޭގައި އެއްވެސް މަސައްކަތެއް ކުރިއަށް ގޮސްފައި ނުވެ އެވެ.