ފީއަލީ ކައުންސިލްގެ މެންބަރު އައިމިނަތު ރާނިޔާ ވިދާޅުވީ އެ ރަށު އިންޑޯ ވޮލީ ކޯޓުގެ މަސައްކަތަކީ ކުރީގެ ރައީސް އިބްރާހިމް މުހައްމަދު ޞާލިހު ގެ ސަރުކާރުން ފެށި މަޝްރޫއެއް ކަމަށާއި އަދި އެ މަޝްރޫއުގެ މަސައްކަތް މި ސަރުކާރާ އެކު އެއްކޮށް ހުއްޓުނީ ބިލުތަކަށް ފައިސާ ނުދެއްކުމުން ކަމަށް.
ފީއަލީގައި މިދިއަ ސަރުކާރުން ތަރައްގީ ކުރަން ފެށި އިންޑޯ ވޮލީ ކޯޓުގައި އެއްވެސް މަސައްކަތެއް ނުކުރާތާ ދެ އަހަރު
ފ. ފީއަލީގައި މިދިޔަ ސަރުކާރުން ތަރައްގީ ކުރަންފެށި އިންޑޯ ވޮލީ ކޯޓުގައި އެއްވެސް މަސައްކަތެއް ނުކުރާތާ ދެ އަހަރު ވެފައިވާ ކަމަށް އެ ރަށު ކައުންސިލުން ބުނެފި އެވެ.
ރާއްޖެޓީވީ އާއި ވާހަކަ ދައްކަވަމުން ފީއަލީ ކައުންސިލްގެ މެންބަރު އައިމިނަތު ރާނިޔާ ވިދާޅުވީ އެ ރަށު އިންޑޯ ވޮލީ ކޯޓުގެ މަސައްކަތަކީ ކުރީގެ ރައީސް އިބްރާހިމް މުހައްމަދު ޞާލިހު ގެ ސަރުކާރުން ފެށި މަޝްރޫއެއް ކަމަށެވެ. އަދި އެ މަޝްރޫއުގެ މަސައްކަތް މި ސަރުކާރާ އެކު އެއްކޮށް ހުއްޓިފައިވާ ކަމަށް ވެސް ރާނިޔާ ވިދާޅުވި އެވެ.
ރާނިޔާ ވިދާޅުވީ އެ މަސައްކަތް ހުއްޓުނީ މަޝްރޫއު ހަވާލު ކުރި ކުންފުންޏަށް ދައްކަން ޖެހޭ ފައިސާ މުއިއްޒު ސަރުކާރުން ނުދެއްކުމުގެ ސަބަބުން ކަމަށެވެ. އެގޮތުން އެ ކުންފުންޏަށް ދައްކަން ޖެހޭ ބިލުތައް ދައްކާފައި ނުވާތީ ކުންފުނިން މަޝްރޫއުގެ މަސައްކަތް ހުއްޓާލީ ކަމަށް ވެސް ރާނިޔާ ވިދާޅުވި އެވެ.
އޭގެ ފަހުން އިތުރު ބަޔަކާ މަޝްރޫއު ހަވާލު ކޮށްފައި ނުވާ ކަމަށް ވެސް ރާނިޔާ ވިދާޅުވި އެވެ. އެހެންކަމުން 18 ޑިސެމްބަރު 2022 ގައި ކޮންޓްރެކްޓަރާ ހަވާލު ކުރި މި މަޝްރޫއު ގެ މަސައްކަތް ނިމޭނެ ކަން ވެސް ނުވަތަ ނިމޭނަމަ އެ ތާރީޚެއް ވެސް ނޭނގޭ ކަމަށް އޭނާ ވިދާޅުވި އެވެ.
މި ފަހުން ރައީސް ޑރ. މުހައްމަދު މުއިއްޒު ވަނީ އެ ރަށަށް ވަޑައިގެންފަ އެވެ. އެ ރަށަށް ވަޑައިގަތުމަށް ފަހު ރައީސް ވިދާޅުވީ ފީއަލީ ގައި ހުއްޓިފައި ހުރި މަޝްރޫއުތައް ވަރަށް އަވަހަށް ފަށާނެ ކަމަށެވެ. އަދި އިންޑޯ ވޮލީ ކޯޓުގެ މަޝްރޫއު އެހެން ކުންފުންޏަކާ ހަވާލު ކޮށްގެން ކުރިއަށް ގެންދާނެ ކަމަށެވެ. ނަމަވެސް މިހާތަނަށް ވެސް އެ މަސައްކަތް އިތުރު ބަޔަކާ ސަރުކާރުން ހަވާލު ކޮށްފައިވާ ކަން ކައުންސިލް އަށް އަންގާފައި ނުވާ ކަމަށް ވެސް ކައުންސިލުން ބުނެ އެވެ.
މުއިއްޒު ވެރިކަމަށް ވަޑައިގަތީ ފަށާފައިވާ އެއްވެސް މަޝްރޫއެއް ހުއްޓާ ނުލައްވާނޭ ކަމަށް ވައުދުވެގެން ކަމަށް ވިޔަސް ރާއްޖޭގެ އެކި ހިސާބުގައި ކުރިން ފަށާފައިވާ އެތައް މަޝްރޫއެއް ހުއްޓިފައި ހުރިކަން ފާހަގަ ކުރެވެ އެވެ.
