12 އަހަރު ވިލިމާލޭގައި ބަގުޑި ބައްދައިގެން އޮތުމަށްފަހު ވިލިމާލެއަށް އިހުމާލުވި ކަމަށް ރައީސް އެއްބަސްވެވަޑައިގެންފި
ރައީސް މުއިއްޒު ވިލިމާލޭގެ ރައްޔިތުންނާއި ބައްދަލުކުރެއްވީ އިންތިހާބުވެވަޑައިގެންނެވި ފަހުން 2 އަހަރުގެ ތެރޭގައި ފުރަތަމަ ފަހަރަށް
ރައީސް ޑރ. މުހައްމަދު މުއިއްޒު ވިލިމާލެ ރައްޔިތުންނާއި ބައްދަލު ކުރައްވަނީ
12 އަހަރު ވިލިމާލޭގައި ބަގުޑި ބައްދައިގެން އޮތުމަށްފަހު ވިލިމާލެއަށް އިހުމާލުވި ކަމަށް ރައީސް ޑރ. މުހައްމަދު މުއިއްޒު އެއްބަސްވެވަޑައިގެންފި އެވެ.
ރައީސް މިފަދައިން އެއްބަސްވެވަޑައިގަތީ ވިލިމާލޭގެ ރައްޔިތުންނާއި ބައްދަލުކުރެއްވުމަށް އާދީއްތަ ދުވަހުގެ ރޭ އެ އަވަށުގައި ބޭއްވި ހަފްލާގަ އެވެ. މިއީ އިންތިހާބުވެވަޑައިގެންނެވި ފަހުން މިވީ 2 އަހަރުގެ ތެރޭގައި ވިލިމާލޭގެ ރައްޔިތުންނާއި ރައީސް މުއިއްޒު ބައްދަލުކުރެއްވި ފުރަތަމަ ފަހަރެވެ.
ރައީސް ވިދާޅުވީ އެމަނިކުފާނު ބޭނުންފުޅުވަނީ ވިލިމާލޭ ރައްޔިތުންނަށް މިއޮތްހާ ދުވަހު ނުކުރެވި، އަދި ހާސިލުކޮށް ނުދެވި، ސަރުކާރުތަކުން އޮތް ހުރިހާ ކަމެއް ފުރިހަމަކޮށްދޭން އަދި އިތުރަށްވެސް ކުރައްވަން ކަމަށެވެ. އަދި ވިލިމާލެ އަކީ މާލޭ ސިޓީގެ އެއްބައި ކަމަށާއި، މާލޭ ސިޓީގެ ހުރިހާ ރައްޔިތުންނަށް އެއްވަރަކަށް ތަރައްޤީ އަންނަންޖެހޭނެ ކަމަށެވެ.
ވިލިމާލެވީމާ އިހުމާލުކޮށްލެވިފައި، ނޫނީވިއްޔާ ތަފާތުކުރެވިފައި އޮންނަންޖެހޭނެ ކަމަކަށް އަޅުގަނޑު ގަބޫލެއް ނުކުރަން. އަޅުގަނޑު މޭޔަރަކަށް ހުރިއިރުގައި، އޭރު ކުރެވުނު އޮތް ވަރަކަށް މަސައްކަތް ކުރެވޭތޯ ބެލިން. ދެން މިހާރު ސަރުކާރުގެ ތެރެއިން ހަމަ ޔަޤީނުންވެސް މާ ފުރިހަމައަށް ކަންކަންވާނެ.ރައީސް ޑރ. މުހައްމަދު މުއިއްޒު
ވިލިމާލެއަށް އިހުމާލުވެފައިވާ ކަމަށް ރައީސް މުއިއްޒު ވިދާޅުވި އިރު، އެމަނިކުފާނު މިދިޔަ 12 އަހަރު ހުންނެވީ ވިލިމާލެ އަށް ބާރު ފޯރުވޭ ހިސާބުގަ އެވެ. އެގޮތުން ރައީސް ޑރ. މުހައްމަދު ވަހީދު ހަސަން ގެ ވެރިކަމުގައާއި ރައީސް އަބްދުﷲ ޔާމީންގެ ވެރިކަމުގައި ހުންނެވީ ހައުސިންގ މިނިސްޓަރު ކަމުގަ އެވެ. އަދި އެއިރު އެމްޑީޕީގެ މެޖޯރިޓީ އޮންނަ ސިޓީ ކައުންސިލެއް އޮތުމުން މާލޭގެ މުނިސިޕަލް ކަންކަމާއި ތަރައްގީގެ ހުރިހާ ކަމެއް ކޮންޓްރޯލްކޮށް ބަލަހައްޓަމުން ގެންދިޔައީ އެއިރުގެ ހައުސިންގ މިނިސްޓްރީ އިން މުއިއްޒުގެ ބެއްލެވުމުގެ ދަށުންނެވެ.
މީގެ އިތުރުން ވެރިކަމަށް ވަޑައިގަތުމުގެ ކުރިން ދެން ހުންނެވީ މާލޭގެ މޭޔަރު ކަމަށެވެ. އެއިރު ވެސް ވިލިމާލޭގެ ހުރިހާ ކަމެއް ބަލަހައްޓާ ބާރު ފޯރުވަމުން ގެންދެވީ ސީދާ މުއިއްޒުގެ ބެއްލެވުމުގެ ދަށުންނެވެ. އަދި ވެރިކަމަށް ވަޑައިގެންނެވުމަށްފަހު ވެސް ވިލިމާލޭގެ މައްޗަށް ބާރު ފޯރުވާ ކަންކަން ކުރަމުން ދަނީ ސީދާ މިނިސްޓްރީތަކާއި ކަމާއި ގުޅުންހުރި އިދާރާތަކުންނެވެ.
އަދި މި ދުވަސްތަކުގައި ވިލިމާލޭގެ ކައުންސިލް މެންބަރެއްގެ ގޮތުގައި ހުންނެވީ ވެސް ރައީސް މުއިއްޒުގެ ޕާޓީގެ މެންބަރެކެވެ. އަދި މިހާރުވެސް ހުރީ ޕީއެންސީއަށް ނިސްބަތްވާ ކައުންސިލް މެންބަރެކެވެ. އެހެންކަމުން ވިލިމާލެ ރައްޔިތުންނަށް ކުރިން އިހުމާލުވި ކަމަށް ވިދާޅުވެ ރައީސް އަށް އެ ވިދާޅުވެވުނީ އެމަނިކުފާނުގެ އާރާއި ބާރުގެ ދަށުން ރައްޔިތުންނަށް އިހުމާލުވެ ކަންކަން ނުކޮށްދެވުނު ވާހަކަ އެވެ.
