ވެހެމުން ދިޔަ ވާރޭ ގައި ގަހަށް ފެން ދިނުމުން، ސަރުކާރުގެ ވަޒީރުން "މީމް" އަކަށް
ފަސް މިލިޔަން ގަސް އިންދުމުގެ ޕްރޮގުރާމަކީ ރާއްޖެއިން ނެތެމުންދާ ގަސްތައް އަލުން އާލާކޮށް ފެހި ވެށީގެ ނިޒާމު ދެމެހެއްޓުމަށް ފެށި ޕްރޮގްރާމެއް
ވާރޭގައި ކުޑަ ނަގައިގެން ސަރުކާރުގެ ބައެއް ވަޒީރުން އަދި އެހެން ބައެއް ޕޮލިޓީޝަނުން ގަހަށް ފެންދޭ މަންޒަރު ފެންނަ ފޮޓޯތަކެއް
ވެހެމުން ދިޔަ ވާރޭ ގައި ގަހަށް ފެން ދިނުމުން ސަރުކާރުގެ ވަޒީރުން، ބޮޑު ލަދެއްގައި ބެދި "މީމް" އަކަށް ވެއްޖެ އެވެ.
ފަސް މިލިއަން ގަސް އިންދުމުގެ މަޝްރޫއުގެ ތެރެއިން، ސަރުކާރުން ވަނީ ނޮވެމްބަރ 30 ވަނަ ދުވަހު ވިލިމާލޭގައި 500 ގަސް އިންދުމުގެ ޚާއްސަ ހަރަކާތެއް ބާއްވާފަ އެވެ.
އެ ހަރަކާތުގެ ތެރެއިން ސަރުކާރުގެ ބައެއް ވަޒީރުންނާއި މެމްބަރުން ވެހެމުން ދިޔަ ވާރޭގައި ކުޑަ ނަގައިގެން ތިބެ ގަހަށް ފެންދެމުން ދިޔަ މަންޒަރު ފެންނަ ފޮޓޯތަކެއް މީސް މީޑިއާ ގައި ވަނީ ދައުރުވާން ފަށާފަ އެވެ. އަދި އެ ފޮޓޯތަކުން ފެންނަ ގޮތުގައި އެތަނު ގައި ސްޕޯސްޓްސް މިނިސްޓަރ އަބްދުﷲ ރާފިއު އާއި ހެލްތް މިނިސްޓަރ އަބްދުﷲ ނާޒިމް އާއި އެންވަޔަރަމަންޓް މިނިސްޓަރ ތޯރިގް އިބްރާހިމް މި ހަރަކާތުގައި ބައިވެރިވެވަޑައިގަންނަވާފައިވެ އެވެ.
އާއްމުން ވަނީ ވާރޭގައި ތެމިގެން ވަޒީރުން ގަހަށް ފެން ދިނުމުން އެއީ ބޮޑު ޖޯކެއް ކަަމަށް ސިފަކޮށްފަ އެވެ. އަދި އެއީ ދެއްކުންތެރިކަން ކަމަށް ބައެއް އާއްމުން ސިފަކޮށްފައިވެ އެވެ. މީގެ އިތުރުން ބައެއް އާއްމުން ވަނީ މިއީ ސަރުކާރުގެ އިސް ވަޒީރުންގެ ވިސްނުން ހުރި މިންވަރު ހާމަކޮށްދޭ ކަމެއް ކަަމަށް ބުނެ އެކަމަށް ވެސް ފާޑުކިޔާފަ އެވެ. އަދި މި ހަރަކާތުގެ ތަސްވީރުތަކާއި އެހެނިހެން ޤައުމުތަކުގައި ހިނގާފައި ހުރި މިކަހަލަ ކަންކަމާއި އަޅާ ކިޔާ ފޮޓޯތައް އާއްމުން ވަނީ ދައުރުކުރަން ފަށާފަ އެވެ.
މީގެ ކުރިން ވެސް ފޮޓޯ އެއް ނެގުމަށް ނުވަތަ އެ ނޫން ވެސް ގޮތަކަށް ސަރުކާރުން ކުރާ ކަންކަމުގެ ތެރޭގައި ހަމަ ނުޖެހޭ ކަންކަން ހުރުމުން ސަރުކާރަށް ވަރަށް ބޮޑަށް ފާޑު ކިޔުން އަމާޒުވެފަިއި އެބަ ހުއްޓެވެ. އެގޮތުން ރަށްރަށަށް ކުރި ދަތުރުތަކުގައި އުވަ ދޯނި ބޭނުންކޮށްގެން މަޝްރޫޢުތަކުގެ ފައުންޑޭޝަން އެޅުމަށް ސަރުކާރުގެ ވެރިން ރޭވިގެން ތިބޭ މަންޒަރު ފެންނަ ފޮޓޯތައް އާއްމުވުމުން އެކަމަށް ވެސް އާއްމުން ވަރަށް ބޮޑަށް ޖޯކު ޖަހާފައިވެ އެވެ.
ފަސް މިލިޔަން ގަސް އިންދުމުގެ ޕްރޮގުރާމަކީ ރާއްޖެއިން ނެތެމުންދާ ގަސްތައް އަލުން އާލާކޮށް ރާއްޖޭގެ ފެހި ވެށީގެ ނިޒާމު ދެމެހެއްޓުމަށް ފަށާފައިވާ ޕްރޮގްރާމެކެވެ. މި ޕްރޮގުރާމް ރަސްމީކޮށް ފެށީ މިދިޔަ އަހަރުގެ ޖޫން 5 ވަނަ ދުވަހު އެ އަހަރުގެ ދުނިޔޭގެ ތިމާވެށީގެ ދުވަހެވެ.
