ވިލިމާލޭގައި އަޅާ 300 ހައުސިންގ ޔުނިޓް ވިލިމާލޭގެ ރައްޔިތުންނަށް ހާއްސަ ކުރަނީ
ހޮސްޕިޓަލް ވަގުތީގޮތުން އެހެން ލޮކޭޝަނަކަށް ބަދަލުކުރަން މާލޭ ގްރޫޕް އޮފް ހޮސްޕިޓަލްސްއިން ބަޔަކާ ހަވާލުކޮށްފައިވޭ
ރައީސް ޑރ. މުހައްމަދު މުއިއްޒު ވިލިމާލޭގެ ރައްޔިތުންނާއި ބައްދަލުކުރައްވަނީ
ވިލިމާލޭގައި އިމާރާތް ކުރާ 3 ކޮޓަރީގެ 300 ހައުސިންގ ޔުނިޓު ހާއްސަކުރާނީ ވިލިމާލޭގައި ދިރިއުޅޭ ރައްޔިތުންނަށް ކަމަށް ރައީސް ޑރ. މުހައްމަދު މުއިއްޒު ވިދާޅުވެއްޖެ އެވެ.
އެމަނިކުފާނު މިހެން ވިދާޅުވީ، އާދީއްތަ ދުވަހުގެ ރޭ، ވިލިމާލޭގައި ދިރިއުޅޭ ރައްޔިތުންނާ އެކު ބޭއްވެވި މަޝްވަރާ ބައްދަލުކުރެއްވުމުގައި ވާހަކަފުޅުދައްކަވަމުންނެވެ.
ރައީސްވިދާޅުވީ، މި ހައުސިންގ ޔުނިޓުތަކަކީ މާލޭ ސަރަޙައްދުގައި ގާއިމުކުރާނެކަމަށް އިޢުލާންކުރައްވާފައިވާ ހައުސިންގ ޔުނިޓުތަކުގެ ތެރެއިން 300 ހައުސިންގ ޔުނިޓުކަމަށާއި، މި ހައުސިންގ ޔުނިޓުތަކުގެ މަސައްކަތް މި އަހަރު ތެރޭ ފެށޭނޭކަމަށެވެ.
ހުޅުމާލޭ ހޮސްޕިޓަލް ޓަރޝަރީ ހޮސްޕިޓަލަކަށް އަޕްގްރޭޑް ކުރުމަށް ކުރަމުންގެންދާ މަސައްކަތަށް އިޝާރާތްކުރައްވަމުން އެމަނިކުފާނު ވަނީ، ހޮސްޕިޓާ އެހެންތަނަކަށް ބަދަލުކޮށްގެން މި މަސައްކަތްކުރާއިރު، ޚިދުމަތްދިނުމުގައި ކުރިމަތިވެދާނޭ ދަތިތައް ކުޑަކުރެއްވުމެއްޓަކައި މިހާރު ހުރި ހޮސްޕިޓަލް ވަގުތީގޮތުން އެހެން ލޮކޭޝަނަކަށް ބަދަލުކުރަން އާދީއްތަ ދުވަހު މާލޭ ގްރޫޕް އޮފް ހޮސްޕިޓަލްސްއިން ބަޔަކާ ހަވާލުކޮށްފައިވާ ކަމަށް ވިދާޅުވެފަ އެވެ.
މީގެ އިތުރުން، ވިލިމާލޭގެ މަގުތައް ޒަމާނީ ފެންވަރަށް ހެދުމުގެ މަސައްކަތް ކުރިއަށްގެންދަވާނޭ ކަމަށާއި، އެ މަސައްކަތް ކުރިއަށްދާނީ، ފެނާއި، ކަރަންޓާއި، ނަރުދަމާގެ ނިޒާމު އަޕްގްރޭޑްކުރުމުގެ މަސައްކަތާ އެކީގައިކަމަށް އެމަނިކުފާނު ވިދާޅުވި އެވެ. އަދި މި ފެށޭ އަހަރު، ވިލިމާލޭގައި މަލްޓި ސްޕޯޓްސް ކޮމްޕްލެކްސްއެއް ޤާއިމުކުރެއްވުމުގެ މަސައްކަތް ކުރައްވާނޭ ކަމަށާއި، އެއީ، 1200 މީހުންގެ ސީޓިންގ ސްޕެކްޓޭޓަރ، ސީޓިންގ ކެޕޭސިޓީ ހިމެނޭ، އިންޑޯރ ހުރިހާ ކުޅިވަރުތައް ކުޅެވޭގޮތަށް ޤާއިމުކުރެވޭ މަރުކަޒެއް ކަމަށް ރައީސް ވިދާޅުވި އެވެ.
އޭގެއިތުރަށް، މިހާރު އޮތް ދަނޑު އަޕްގްރޭޑް ކުރުމަށް، ފީފާ ސްޓޭންޑަޑަށް ގެންދިޔުމަށްޓަކައި، ފުޓްބޯޅަ ދަނޑުގެ ރޮސްޓްރަމް ފީފާ ސްޓޭންޑަޑަށް، އަދި ލައިޓިންގ، މި ކަހަލަ ހުރިހާ ކަމެއް ކުރުމަށް އޮތީ ހަމަޖެހިފައި ކަމަށް ރައީސް ވިދާޅުވި އެވެ. މީގެ އިތުރުން ވިލިމާލޭގައި ޔޫ.އެސް ޑޮލަރު އޭޓީއެމްއެއް ބަހައްޓަވާނޭކަމަށްވެސް އެމަނިކުފާނު ވިދާޅުވި އެވެ.
