އިނގިރޭސިވިލާތާއި އިންޑިއާއާ ދެމެދު ހަނގުރާމައިގެ ބާރުވެރި މިސައިލް ފޯރުކޮށްދިނުމަށް 468 މިލިއަން އެމެރިކާ ޑޮލަރުގެ އެއްބަސްވުމެއްގައި ސޮއި ކޮށްފި އެވެ.

މި އެއްބަސްވުމުގައި ސޮއި ކޮށްފައި ވަނީ އިނގިރޭސިވިލާތުގެ ބޮޑު ވަޒީރު ކިއާ ސްޓާމާ އިންޑިއާ އަށް ކުރެއްވި ރަސްމީ ދަތުރުފުޅުގަ އެވެ. ބުދަ ދުވަހު ސްޓާމާ އިންޑިއާ އަށް ވަޑައިގެންފައިވާއިރު، ބުރާސްފަތި ދުވަހު ވަނީ އިންޑިއާގެ ބޮޑު ވަޒީރު ނަރެންދްރަ މޯދީއާ ބައްދަލު ކުރައްވައިފަ އެވެ.

ބުރާސްފަތި ދުވަހު ސްޓާމާ އާއި މޯދީއާ ދެމެދު ރަސްމީ މަޝްވަރާތައް ކުރިއަށް ގެންގޮސްފައިވާއިރު، ދެ ލީޑަރުން ވަނީ ޖޮއިންޓް ސްޓޭޓްމަންޓެއް ވެސް ދެއްވައިފަ އެވެ. އަދި ދެ ޤައުމުގެ ދެ މެދުގައި ވަނީ މުހިންމު ދާއިރާ ތަކުން އެއްބާރުލުން ދިނުމުގެ އެއްބަސްވުމުގައި ސޮއި ކޮށްފައިވެ އެވެ.

އިނގިރޭސިވިލާތާއި އިންޑިއާއާ ދެމެދުގައި އިތުރަށް ވަރުގަދަ ކުރަމުން އަންނަ ސްޓްރެޓެޖިކް ގުޅުމުގެ ތެރެއިން އިންޑިއާގެ އަސްކަރިއްޔާ އަށް ލުއި ބަރުދަނުގެ މަލްޓިރޯލް މިސައިލް ސަޕްލައި ކޮށްދިނުމަށް ވަނީ އެއްބަސްވުމުގައި ސޮއި ކޮށްފަ އެވެ.

ބުރާސްފަތި ދުވަހު އިނގިރޭސިވިލާތުން ހާމަ ކޮށްފައިވާ ގޮތުގައި އިނގިރޭސިވިލާތާއި އިންޑިއާއާ ދެމެދު ސޮއި ކޮށްފައި ވަނީ 350 މިލިއަން ޕައުންޑު ނުވަތަ، 468 މިލިއަން އެމެރިކާ ޑޮލަރުގެ އެއްބަސްވުމެއްގަ އެވެ. މިއީ ދެ ޤައުމުގެ ދެ މެދުގައި އޮންނަ ގުޅުން އިތުރަށް ވަރުގަދަ ވެގެން ދާނެ އެއްބަސްވުމެއްގެ ގޮތުގައި ވަނީ ސިފަ ކޮށްފަ އެވެ.

އިނގިރޭސިވިލާތާއި އިންޑިއާއާ ދެމެދު ސޮއި ކޮށްފައިވާ އެއްބަސްވުމުގެ ދަށުން ސަޕްލައި ކުރުމަށް ހަމަޖެހިފައިވާ މިސައިލްތައް އުފައްދާނީ އުތުރު އަޔަލެންޑުގަ އެވެ. މިއީ ދެ ޤައުމުގެ ދެމެދުގައި އޮތް ދިފާއީ އަދި ސަލާމަތީ ގުޅުން އިތުރަށް ޚަރުދަނާ ކުރުމަށް އެޅޭ މުހިންމު ފިޔަވަޅެއް ކަމަށް ވެސް ވަނީ ސިފަ ކޮށްފަ އެވެ.

ފާއިތުވި އަހަރު ތަކަށް ބަލާއިރު، އިނގިރޭސިވިލާތާއި އިންޑިއާއާ ދެމެދު ވަނީ ދިފާއީ އަދި ސަލާމަތީ ދާއިރާގެ އެއްބާރުލުން އިތުރު ކޮށްފަ އެވެ. މިފަހަރު ސޮއި ކުރެވުނު އެއްބަސްވުމަކީ އަސްކަރީ ބާރު އިތުރު ކުރުމަށާއި، އިންޑޯ-ޕެސިފިކް ސަރަހައްދުގައި ސަލާމަތީ ގޮތުން އިތުރު ބާރެއް ހޯދުމަށް އެޅޭ މުހިންމު ފިޔަވަޅެއް ކަމަށް ސަލާމަތީ ދާއިރާގެ މާހިރުން އަންނަނީ ފާހަގަ ކުރަމުންނެވެ.

މިއަހަރުގެ ޖުލައި މަަހުގެ ތެރޭގައި އިންޑިއާގެ ބޮޑު ވަޒީރު މޯދީ ވަނީ އިނގިރޭސިވިލާތަށް ވަޑައިގެންފަ އެވެ. އެ ދަތުރުފުޅުގައި ދެ ޤައުމުގައި ދެ މެދުގައި ވަނީ މިނިވަން ވިޔަފާރީގެ އެއްބަސްވުމެއްގައި ސޮއި ކޮށްފަ އެވެ. އެ އެއްބަސްވުމުގެ ދަށުން ޓެކްސްޓައިލްސް، ވިސްކީ އަދި ކާރު ފަދަ އުފެއްދުންތަކުގެ ޓެރިފް ކުޑަކޮށް، ވިޔަފާރީތަކަށް މާކެޓަށް ވަނުމުގެ ފުރުސަތު ފަހި ކޮށްދޭނެ އެވެ.

އިންޑިއާ އަށް ކުރެއްވި ދަތުރުފުޅުގައި އެ އެއްބަސްވުމާ ގުޅޭ ގޮތުން ވާހަކަ ދައްކަވަމުން އިނގިރޭސިވިލާތުގެ ބޮޑު ވަޒީރު ސްޓާމާ ވިދާޅުވެފައި ވަނީ، އިންޑިއާ އާއެކު ސޮއި ކޮށްފައިވާ މިނިވަން ވިޔަފާރީގެ އެއްބަސްވުމަކީ ހަަމައެކަނި ކަރުދާހުގެ އެއްބަސްވުމެއް ނޫން ކަމަށެވެ. ސްޓާމާ ވިދާޅުވީ އެ އެއްބަސްވުމުގެ ސަބަބުން ކުރި އެރުމަށް އިތުރު ފުރުސަތު ތަކެއް ވެސް ލިބިގެން ދާނެ ކަމަށެވެ.

ހަމަ އެހެންމެ، 2028 ވަނަ އަހަރާ ހަމައަށް އިންޑިއާ އަކީ ދުނިޔޭގެ ތިން ވަނަ އަށް އެންމެ ބޮޑު އިޤްތިޞާދަށް ވާނެ ކަމަށް ލަފާ ކުރެވޭ ކަމަށް ވެސް ސްޓާމާ ވިދާޅުވެފައިވެ އެވެ. އެ އެއްބަސްވުމުގެ ދަށުން 2040 ވަނަ އަހަރާ ހަމައަށް ދެ ޤައުމުގެ ދެ މެދުގައި ވިޔަފާރި 25.5 ބިލިއަން ޕައުންޑަށް އިތުރު ވާނެ ކަމަށް ލަފާ ކުރެވެ އެވެ.

އިންޑިއާ އަށް ސްޓާމާ ކުރެއްވި މި ދަތުރުފުޅުގައި ބޮޑު ވަޒީރު ކަމުގެ މަޤާމަށް ވަޑައިގެންނެވި ފަހުން، އިންޑިއާ އަށް ކުރެއްވި ފުރަތަމަ ދަތުރުފުޅެވެ.