ލިޔުނު ޚަބަރަކާއި ގުޅިގެން ޓިކްޓޮކްގައި ރާއްޖެ ޓީވީގެ ނޫސްވެރިއަކަށް އިންޒާރުދެމުންދާ މައްސަލަ ފުލުހުން ބަލަން ފަށައިފި

ލިޔުނު ޚަބަރަކާއި ގުޅިގެން ރާއްޖެ ޓީވީގެ ނޫސްވެރިޔާ ލައިސާ އަހުމަދު އަށް އިންޒާރުދެމުންދާ މައްސަލަ ފުލުހުން ބަލަން ފަށައިފިއެވެ.

ދިވެހި ފިރިހެނަކު އަނެއްކާވެސް އާންމު އިޖުތިމާއީ މިންގަނޑާ ޚިލާފަށް ޓިކްޓޮކް ލައިވްގައި އިޖުތިމާއީ މިންގަނޑާ ޚިލާފު އަމަލުތައް ހިންގަމުންދާ މައްސަލައެއް ފެންމަތިވެ އެކަމާއި ގުޅޭ ޚަބަރެއް ގެނެސް ދިނުމުން އެކަމުގެ ތުހުމަތު ކުރެވޭ މީހާ އާއި އިތުރު ބައެއް މީހުން ވަނީ ލައިސާ އާއި އޭނާގެ އާއިލާ އާއި މެދު ސާބިތު ނުހިފޭ ދޮގު ވާހަކަތައް ފަތުރަން ފަށާފައެވެ. އަދި ލައިސާގެ ފޮޓޯ އާއި ވީޑިއޯތައް ބޭނުންކުރުމުގެ އިތުރުން އޭނާ އަށް ހަޑިހުތުރުބަހުން މުއާމަލާތުކޮށްފައިވެއެވެ. އަދި ތަކުރާރުކޮށް އެ ޚަބަރު ނެގުމަށް ލައިސާ އަށް އިންޒާރު ދީފައިވެއެވެ. މި މައްސަލަ ފުލުހުންނަށް ހުށަހަޅާފައި ވަނީ ހޯމަ ދުވަހުއެވެ. ނަމަވެސް މި މައްސަލައިގައި ތުހުމަތު ކުރެވޭ މީހާ އާއި މި މައްސަލަ އާއި ގުޅިގެން ފުލުހުން އަދި ސުވާލުކޮށްފައިވާކަން ނުވަތަ ނޫންކަން ފުލުހުން ހާމައެއް ނުކުރެއެވެ.

އިޖުތިމާއީ މިންގަނޑާ ޚިލާފަށް ހެދުން އަޅައިގެން ޓިކްޓޮކްގައި ބަރަހަނާވުމާއި، މަސްތުވާތަކެތި ބޭނުން ކުރުމާއި، އެއް ޖިންސުން ގުޅުން ހިންގުން ފަދަ ކަންކަމަށް ހިތްވަރުދީ ވާހަކަ ދައްކާފައެވެ. އެކަމާ އެތައް ބަޔަކު ގެންދަނީ ކަންބޮޑުވުން ފާޅު ކުރަމުންނެވެ. އޭނާއަކީ މީގެ ކުރިންވެސް އެފަދަ މައްސަލައެއްގައި ތުހުމަތު ކުރެވުނު މީހެކެވެ. މީސްމީޑީއާގައި އާންމު އިޖުތިމާއީ މިންގަނޑާ ޚިލާފަށް ވާހަކަ ދެއްކުމާއި، ހެދުން އެޅުމާއި، އެއް ޖިންސުން ގުޅުން ހިންގުން ޕްރޮމޯޓު ކުރުން ފަދަ މައްސަލަތަކާ ގުޅިގެން މި ފަހުންވެސް ބައެއް މީހުން ހައްޔަރުކޮށް ތަހުގީގު ކޮށްފައިވެއެވެ. އެގޮތުން އާންމު އިޖުތިމާއީ މިންގަނޑާ ޚިލާފަށް ހެދުން އަޅައިގެން ޓިކްޓޮކް ވީޑިއޯ އާންމުކުރަމުން ދިޔަ މުހައްމަދު ނަބީލްގެ މައްޗަށް ދައުވާ ކުރަން ފޮނުވުމަށް މަޝްވަރާ ކުރަމުންދާކަމަށް ފުލުހުން ބުނެފައިވެއެވެ.