ކުޑަކުދިންނަށް ގެއްލުން ދޭ ކަމަށް ބުނެ ޓިކްޓޮކް އަށް ދައުވާކުރަނީ

މަޤްބޫލު ސޯޝަލް މީޑިއާ ޕްލެޓްފޯމް ޓިކްޓޮކްއިން ކުޑަކުދިންނަށް ގެއްލުން ދިނުމާއި އަދި އެމީހުން ރައްކާތެރިކުރުމަށް ފެއިލްވެފައިވާކަމަށް ބުނެ، އެމެރިކާ އިން އަނެއްކާވެސް ދައުވާތަކެއް ކޮށްފިއެވެ.

އަންގާރަ ދުވަހު ނިއުޔޯކް، ކެލިފޯނިއާ އަދި އެމެރިކާގެ އިތުރު 11 ސްޓޭޓެއްގެ އިތުރުން ޑިސްޓްރިކްޓް އޮފް ކޮލަމްބިއާގައި ހުށަހެޅުނު މި ދަޢުވާތަކަކީ، ޗައިނާގެ މިލްކިއްޔާތުގައިވާ މި ކުންފުނިންޏަށް ކުރިމަތިވެފައިވާ ޤާނޫނީ ގޮންޖެހުންތަކަށް އިތުރުވެގެންދިޔަ ދަޢުވާތަކެކެވެ.

މި ދަޢުވާތަކުގައި، ކުންފުނިން ގަސްތުގައި ކުޑަކުދިން ވީހާވެސް ގިނަ ވަގުތު މި އެޕްލިކޭޝަން ބޭނުންކުރުމަށް ނުރައްކާތެރި ގޮތަކަށް ދެވިހިފާ ސޮފްޓްވެއަރއެއް ބޭނުންކުރާކަމަށް ތުހުމަތުކޮށްފައިވެއެވެ. މީގެ އިތުރުން، ކޮންޓެންޓް މޮޑަރޭޝަންގެ ހަރުދަނާކަމާމެދު ޢާންމުންނަށް އޮޅުވާލާފައިވާކަމަށްވެސް މި ދަޢުވާތަކުގައި ފާހަގަކޮށްފައިވެއެވެ.

އެގޮތުން، އިޝްތިހާރުތައް ދެއްކުމަށްޓަކައި އެޕްލިކޭޝަން ބޭނުންކުރާ ފަރާތްތައް ވީހާވެސް ގިނަ ވަގުތު އެޕްލިކޭޝަންގައި ހޭދަކުރުވުމަށް މަސައްކަތްކުރާ ކަމަށް ދައުވާގައި ފާހަގަކޮށްފައިވެއެވެ.

މި މައްސަލައާ ގުޅޭ ގޮތުން ކެލިފޯނިއާގެ އެޓަރނީ ޖެނެރަލް ރޮބް ބޮންޓާ ވިދާޅުވެފައިވަނީ، "ކުންފުނީގެ ފައިދާ އިތުރުކުރުމަށްޓަކައި، ޓިކްޓޮކުން އިޖުތިމާޢީ މީޑިއާގެ ވަބާއަށް މީހުން ހުށަހަޅާ ކަމަށާއި، ގަސްތުގައި ކުޑަކުދިން ޓާގެޓްކުރަނީ، ކުޑަކުދިންނަކީ އެޑިކްޓިވް ކޮންޓެންޓާ ދެކޮޅަށް ދިފާޢުވުމުގެ ޤާބިލުކަން ނުވަތަ އޭގެ ބޭނުންކުރުމުގައި ހަރުދަނާ އުުސޫލުތަކެއް ގެންގުޅުމުގެ ޤާބިލުކަން ނެތް ބައެއްކަން އެނގޭތީ،" ކަމަށެވެ.

ވޮޝިންގްޓަންގެ ދައުވާގައި ބުނެފައިވާ ގޮތުގައި، ޓިކްޓޮކްގެ ލައިވް ސްޓްރީމިންގ އަދި ވާރޗުއަލް ފައިސާގެ ނިޒާމު ޑިޒައިންކޮށްފައި ހުންނަނީ 'ވަކި އުމުރުފުރައަކަށް ބެލުމެއް ނެތި، އެއްވެސް ހަނިކުރުމެއް ނެތް، ސްޓްރިޕް ކްލަބެއްގެ ގޮތުގައި' އެވެ.

ގިނަ ތުހުމަތުތަކަކީ 'ނުބައި އަދި އޮޅުވާލުންތަކެއް ހިމެނޭ' ކަންކަން ކަމަށް ބުނެ ޓިކްޓޮކް އިން ވަނީ ތުހުމަތުތައް ދޮގުކޮށްފައެވެ. އަދި މުޅި ސިނާޢަތަށް ދިމާވެފައިވާ ގޮންޖެހުންތަކަށް ހައްލު ހޯދުމަށް އެކުގައި މަސައްކަތްކުރުމުގެ ބަދަލުގައި، ސްޓޭޓްތަކުން ދަޢުވާކުރުމަށް ނިންމާފައިވާތީ ހިތާމަކުރާ ކަމުގައި ވެސް އެ ކުންފުނިން ބުނެފައިވެއެވެ.

ޓިކްޓޮކްގެ މައި ކުންފުނިކަމުގައިވާ ބައިޓްޑާންސްއިން އަންނަނީ އެމެރިކާގައި މި އެޕްލިކޭޝަން މަނާކުރުމަށް ހުށަހެޅިފައިވާ މައްސަލައާ ދެކޮޅަށްވެސް މަސައްކަތްކުރަމުންނެވެ. މި މައްސަލައާ ގުޅޭ ގޮތުން އެކުންފުނިން ބުނެފައިވަނީ، ކުޑަކުދިން ރައްކާތެރިކުރުމަށް އެކަށީގެންވާ ފިޔަވަޅުތައް ނާޅާކަމަށް ކުރެވޭ ތުހުމަތުތަކަށް ދެކޮޅުހަދާ ކަމަށެވެ. އަދި ޒުވާނުންނާއި ބެލެނިވެރިންނަށް ހާއްސަކޮށް ރައްކާތެރިކަމުގެ 'ވަރުގަދަ ފިޔަވަޅުތަކެއް' އެޕްލިކޭޝަނުގައި ހިމަނާފައިވާކަމަށްވެސް ކުންފުނިން ބުނެފައިވެއެވެ.

އެހެންނަމަވެސް، އެމެރިކާގެ ޤާނޫނު ހަދާ މަޖިލީހުގެ މެންބަރުން ހުށަހަޅާފައިވާ ބިލުގައި ބުނެފައިވަނީ، ޓިކްޓޮކް މެދުވެރިކޮށް މި އެޕްލިކޭޝަން ބޭނުންކުރާ ފަރާތްތަކުގެ މަޢުލޫމާތު ޗައިނާ ސަރުކާރަށް ލިބޭ ކަމަށާއި، އަދި އޭގެ މަޤްބޫލު އެލްގޮރިދަމް މެދުވެރިކޮށް އެމެރިކާގެ ރައްޔިތުންނަށް ނުފޫޒު ފޯރުވުމުގެ ފުރުޞަތު އޮތްކަމަށެވެ. މި ބިލަށް ވައިޓް ހައުސްއިން ވަނީ ތާއީދުކޮށްފައެވެ.

ނަމަވެސް، އެމެރިކާގައި ޓިކްޓޮކް ބޭނުންކުރާ 170 މިލިއަން މީހީހުން މި ބިލަށް ދެކޮޅު ހަދައެވެ. މި އަދަދަކީ ގާތްގަނޑަކަށް އެމެރިކާގެ އާބާދީގެ ދެބައިކުޅަ އެއްބައެވެ. މީގެ އިތުރުން، މަދަނީ މިނިވަންކަމަށް މަސައްކަތްކުރާ ޖަމިއްޔާތަކާއި ޑިޖިޓަލް ޙައްޤުތަކަށް މަސައްކަތްކުރާ ޖަމާއަތްތަކުންވެސް ބުނަނީ، މި އެޕްލިކޭޝަން މަނާކުރުމަކީ ޚިޔާލުފާޅުކުރުމުގެ މިނިވަންކަމަށް އަރައިގަތުން ކަމަށެވެ.