އިސްރާއީލްގެ ހަމަލާއާ ގުޅިގެން، ޤަތަރުގެ ބޮޑު ވަޒީރު ޓްރަމްޕްއާ ބައްދަލު ކުރައްވަނީ

އިސްރާއީލް އިން ޤަތަރަށް ދިން ހަމަލާއާ ގުޅިގެން، ޤަތަރުގެ ބޮޑު ވަޒީރު ޝެއިޚް މުޙައްމަދު ބިން ޢަބްދުއް ރަޙުމާން އަލް ޘާނީ، އެމެރިކާގެ ރައީސް ޑޮނަލްޑް ޓްރަމްޕް އަދި އެމެރިކާ ސަރުކާރުގެ އިސްވެރިންނާ ބައްދަލު ކުރައްވަން ނިންމަވައިފި އެވެ.

ހުކުރު ދުވަހު ޤަތަރުގެ ބޮޑު ވަޒީރު އެމެރިކާގެ ރިޔާސީ ގަނޑުވަރު ވައިޓް ހައުސް އަށް ވަޑައިގަންނަވާނެ އެވެ. މި ދަތުރު ކުރެއްވުމަށް ހަމަޖެހިފައި ވަނީ، ޤަތަރުގައި ތިބި ހަމާސް ޖަމާއަތުގެ ސިޔާސީ އިސްވެރިންނަށް އަމާޒުކޮށް އިސްރާއީލް އިން ދިން ހަމަލާއާ ގުޅިގެންނެވެ.

ޤަތަރުގެ ބޮޑު ވަޒީރު އެމެރިކާ އަށް ވަޑައިގެން، އެ ޤައުމުގެ ރައީސް ޓްރަމްޕް އަދި ނައިބު ރައީސް ޖޭޑީ ވޭންސްއާ ބައްދަލު ކުރައްވާނެ ކަމަށް މީޑިއާ ތަކުގައި ވަނީ ބުނެފަ އެވެ.

ހަމަ އެހެންމެ، ޓްރަމްޕްގެ ފަރާތުން މެދު އިރު މައްޗަށް ކަނޑައަޅުއްވާފައި ހުންނަވާ ޚާއްސަ މަންދޫބު ސްޓީވް ވިކްޓޮފް އަދި އެމެރިކާގެ ސެކްރެޓަރީ އޮފް ސްޓޭޓް މާކޯ ރޫބިއޯއާ ވެސް ބައްދަލު ކުރައްވާނެ ކަމަށް ވަނީ ބުނެފަ އެވެ.

މެދު އިރުމަތީގެ މަޝްރަހު ގޯސްވެފައިވާ ދަނޑިވަޅެއްގައި، އިސްރާއީލް އިން ޤަތަރަށް ދިން ހަމަލާގެ ސަބަބުން އެ ސަރަހައްދުގެ ޙާލަތު އިތުރަށް ގޯސްވެދާނެ ކަމަށް ބައެއް ފަރާތްތަކުން އަންނަނީ ފާހަގަ ކުރަމުންނެވެ. އިސްރާއީލް އިން ޤަތަރަށް ދިން ހަމަލާގެ ސަބަބުން، ގިނަ ޤައުމު ތަކަކުން ވަނީ އެ ހަމަލާ ކުށްވެރި ވެސް ކޮށްފަ އެވެ.

އިސްރާއީލްގެ ހަމަލާތައް ކުށްވެރިކޮށް އދ ގެ ސަލާމަތީ މަޖިލީހުން ވެެސް ބަޔާނެއް ނެރެފައިވާއިރު، އެ ބަޔާނަށް އެމެރިކާ އިން ވެސް ތާއީދު ކޮށްފައިވެ އެވެ. ނަމަވެސް، އެ ބަޔާނުގައި އިސްރާއީލްގައި ނަން ހިމަނާފައި ނުވާކަން ފާހަގަ ކުރެވެ އެވެ.

އެމެރިކާ އާއި ޤަތަރަކީ މިހާތަނަށް އައިއިރު ވެސް، ވަރަށް ގާތް ގުޅުމެއް ބާއްވަމުން އަންނަ ދެ ޤައުމެވެ. އެމެރިކާގެ ރައީސް ޓްރަމްޕް ވަނީ މިއަހަރުގެ ތެރޭގައި ޤަތަރަށް ވަޑައިގެންފަ އެވެ. އަދި ޤަތަރަކީ ޣައްޒާ ހަނގުރާމަ ނިންމުމަކަށް ގެނައުމުގައި މެދުވެރިއެއްގެ ދައުރު އަދާ ކުރަމުން އައި ޤައުމެވެ. އޭގެ ތެރޭގައި ހަނގުރާމަ ހުއްޓާލުމާއި، ހަމާސް ޖަމާއަތުގެ ބެލުމުގެ ދަށުގައި ތިބި އިސްރާއީލްގެ ރައްޔިތުން މިނިވަން ކުރުމުގެ މަސައްކަތް ވެސް ހިމެނެ އެވެ.

އަނެއްކޮޅުން އެމެރިކާ އަކީ އިސްރާއީލަށް ވަރަށް ބޮޑަށް ވާގިވެރި ވަމުން އަންނަ ޤައުމެކެވެ. ނަމަވެސް، އިސްރާއީލް އިން ޤަތަރަށް ހަމަލާ ދިނުމާ ގުޅިގެން، އެމެރިކާ އިން ވަނީ ނުރުހުން ފާޅު ކޮށްފަ އެވެ. އެމެރިކާގެ ރައީސް ޓްރަމްޕް ވިދާޅުވެފައި ވަނީ، ޤަތަރަށް ހަމަލާ ދިނުމަށް ނިންމީ އިސްރާއީލްގެ ބޮޑު ވަޒީރު ބެންޖަމިން ނަތަންޔާހޫ ކަމަށާއި، އެކަމުގައި އެމެރިކާގެ އެއްވެސް ބައިވެރިވުމެއް ނޯންނާނެ ކަމަށެވެ.