އިސްރާއީލުން އަންގާރަ ދުވަހު ޤަތަރުގެ ވެރިރަށް ދޯހާ އަށް ބޮން އަޅައިފިއެވެ.

އިސްރާއީލުން ބުނީ އެ ހަމަލާގެ އަމާޒަކީ ދޯހާ ގައި ތިބި ހަމާސްގެ އިސް އޮފިޝަލުން ކަމަށެވެ.

އަލް އަރަބިއްޔާ އިން ރިޕޯޓު ކޮށްފައިވާ ގޮތުގައި، ޤަތަރުގައި އިސްރާއީލުން ދިން ހަމަލާގައި ހަމާސްގެ އިސް ނިގޯޝިއޭޓަރު ޚަލީލް އަލް-ހައްޔާ ވަނީ ޝަހީދުވެފައެވެ.

އަލް-ޖަޒީރާ އިން ހަމާސް އާ ހަވާލާދީ ބުނެފައިވަނީ ހަމަލާގައި ގްރޫޕުގެ އެއްވެސް މެމްބަރަކު މަރުވެފައި ނުވާ ކަމަށެވެ.

ހަމާސް ގެ މަސްދަރަކާ ހަވާލާދީ އަލް-ޖަޒީރާ އިން ބުނެފައިވަނީ ހަމަލާ ދިނީ ހަނގުރާމަ ހުއްޓާލުމާ ބެހޭ ޕްރޮޕޯސަލް އަކާ ބެހޭ ގޮތުން މަޝްވަރާ ކުރަން ތިއްބާ ކަމުގައެވެ.

އިސްރާއީލުގެ ސިފައިންގެ ފަރާތުން ވެސް ވަނީ ހަމާސްގެ އިސް ލީޑަރުންނަށް އަމާޒުކޮށް ހަމަލާދިން ކަމަށް ބުނެފައެވެ.

ޤަޠަރުގެ ޚާރިޖީ ވުޒާރާގެ ތަރުޖަމާނު މާޖިދު އަލް އަންސާރީ ބަޔާނެއްގައި ވިދާޅުވެފައިވަނީ، ޤަޠަރުން "އެންމެ ހަރުކަށި އިބާރާތުން" މި ހަމަލާ ކުށްވެރިކުރާ ކަމަށެވެ. އޭނާ ވިދާޅުވި ގޮތުގައި މި ހަމަލާ އަމާޒުކުރެވިފައިވަނީ ހަމާސްގެ ސިޔާސީ ބިއުރޯގެ އެތައް މެންބަރުންނެއް ދިރިއުޅޭ އިމާރާތްތަކަށެވެ.

ގަތަރުން ބުނެފައިވަނީ ސަރަޙައްދީ ސަލާމަތާ ނުރައްކާ ކޮށް، އޭޣެ އިތުރުން ޤަޠަރުގެ ސަލާމަތާއި މިނިވަންކަމަށް އަމާޒުކޮށް ހިންގާ އެއްވެސް އަމަލެއް ބަލައި ނުގަންނާނެ ކަމަށެވެ.

ގަތަރު މެދުވެރިވެގެން ދޯހާގައި ހިނގަމުންދާ ކަމަކީ، އެމެރިކާގެ ރައީސް ޑޮނަލްޑް ޓްރަމްޕް ހުށަހަޅާފައިވާ ހަނގުރާމަ ހުއްޓާލުމުގެ އެންމެ ފަހުގެ ޕްރޮޕޯސަލް އާ ބެހޭ ގޮތުން ހަމާސްގެ ވަފުދު ބައްދަލުވުންތަކެއް ބާއްވަމުން ގެންދިއުމެވެ.

މި މަޝްވަރާތައް ކުރިއަށް ދާ އިރުވެސް އިސްރާއީލުގެ ސިފައިން ގެންދަނީ ޣައްޒާ ހިސޯރު ކުރުމުގެ އަސްކަރީ އޮޕަރޭޝަން ކުރިއަށް ގެންދަމުންނެވެ.

މެޑިކަލް މަސްދަރުތަކުން ބުނާ ގޮތުގައި، އަންގާރަ ދުވަހު ޣައްޒާ ސްޓްރިޕްގެ އެކި ސަރަޙައްދުތަކުގައި އިސްރާއީލީ ބާރުތަކުން މަދުވެގެން 35 މީހުން ޝަހީދު ކޮށްލާފައިވެއެވެ. މީގެ ތެރޭގައި އެހީ ހޯދަން އުޅުނު 7 މީހުން ހިމެނެއެވެ.

ފާއިތުވި ހަ މަސް ދުވަހުގެ ތެރޭގައި އިސްރާއީލުން ވަނީ އަރަބި 6 ގައުމަކަށް ބޮން އަޅާފައެވެ.

ދޯހާ އަށް އިސްރާއީލުން ދިން ހަމަލާ އާ ބެހޭ ގޮތުން، އިސްރާއީލުގެ އެންމެ ގާތް އެކުވެރިޔާ އެމެރިކާ އިން އެއްވެސް އެއްޗެއް ބުނެފައެއް ނުވެއެވެ.