އިސްރާއީލުން ގަތަރުގެ ވެރިރަށް ދޯހާގައި ތިބި ހަމާސްގެ ލީޑަރޝިޕް އަށް އަމާޒުކޮށް ދިން ނުބައި ހަމަލާއާ ގުޅިގެން އަންނަ ހަފްތާގެ ކުރީކޮޅު ކުއްލި އަރަބި-އިސްލާމީ ސަމިޓެއް ބާއްވާނެ ކަމަށް ގަތަރުން އިއުލާނު ކޮށްފިއެވެ.

ޤަތަރުގެ ރަސްމީ ނިއުސް އެޖެންސީ (ކިއުއެންއޭ) އިން ފޮރިން މިނިސްޓްރީ އާ ހަވާލާދީ ބުރާސްފަތު ދުވަހު ރިޕޯޓުކުރި ގޮތުގައި، މި ކުއްލި ސަމިޓުގެ ކުރިން އާދީއްތަ ދުވަހު ފޮރިން މިނިސްޓަރުންގެ ތައްޔާރީ ބައްދަލުވުމެއް ބޭއްވުމަށްފަހު، "ސެޕްޓެމްބަރ 14-15 ގައި ދޯހާގައި، ގަތަރަށް އިސްރާއީލުން ދިން ހަމަލާ އާ ބެހޭ ގޮތުން މަޝްވަރާ ކުރުމަށް ކުއްލި އަރަބި-އިސްލާމީ ސަމިޓެއް" ބޭއްވޭނެއެވެ.

އަންގާރަ ދުވަހު ގަތަރުގައި ތިބި ހަމާސްގެ އިސް ލީޑަރުން އަވަހާރަކޮށްލުމަށް އިސްރާއީލުން ނުރައްކާތެރި ކުއްލި ވައިގެ ހަމަލާއެއް ދިނުމާ ގުޅިގެން މުޅި ދުނިޔޭން އެ ހަމަލާ ވަނީ ކުށްވެރިކޮށްފައެވެ.

ބުދަ ދުވަހު ދޯހާއިން ވަނީ، އިސްރާއީލުގެ ބޮޑުވަޒީރު އެދުވަހުގެ ކުރީކޮޅު ދެއްކި ވާހަކައިގައި ހަމާސްގެ އޮފިޝަލުން ބޭރު ކުރުމަށް ނުވަތަ "އިންސާފުގެ ކުރިމައްޗަށް ގެނައުމަށް" ގަތަރަށް އިންޒާރުދީ، އެހެން ނޫނީ، އަދިވެސް ހަމަލާ ދޭނަމޭ" ބުނި ބުނުމާ މެދު ހަރުކަށި ބަޔާނެއް ނެރެފައެވެ.

ނަތަންޔާހޫ ވަނީ ގަތަރުން ހަމާސް އަށް ރައްކާތެރިކަން ދީ، މާލީ އެހީތެރިކަންދޭ ކަމަށް ވެސް ތުހުމަތުކޮށްފައެވެ. މިކަމާ ގުޅިގެން ދޯހާ އިން ވަނީ ހަރުކަށި ރައްދެއް ދީފައެވެ.

އެކްސްގައި ހިއްސާ ކުރި ބަޔާނެއްގައި، ގަތަރުގެ ފޮރިން މިނިސްޓްރީން ވަނީ ނަތަންޔާހޫ "ގަތަރުގެ ސިޔާދަތަށް ކުރިމަގުގައި ގެއްލުން ދިނުމުގެ ސާފު އިންޒާރުތައް" ކުށްވެރިކޮށްފައެވެ.

"ހަމާސް ގެ އޮފީސް ގާއިމު ކޮށްފައި ވަނީ އެމެރިކާ އާއި އިސްރާއީލުން އެދިގެން ގަތަރުން އަދާ ކުރަމުން ގެންދާ މެދުވެރިއެއްގެ މަސައްކަތްތަކުގެ ތެރެއިން ކަން ނަތަންޔާހޫ އަށް ވަރަށް ރަނގަޅަށް އެނގޭ،" ކަމަށް މިނިސްޓްރީން ބުންޏެވެ.

ގަތަރުގެ ބަޔާނުގައި އިތުރަށް ބުނެފައި ވަނީ، އިސްރާއީލާއި ހަމާސް އާ ދެމެދު "މަޝްވަރާތައް ކުރިއަށް ގެންގޮސްފައި ވަނީ އަބަދުވެސް ރަސްމީކޮށް އަދި ހާމަކަން ބޮޑު ގޮތެއްގައި، ބައިނަލްއަޤްވާމީ އެހީތެރި ކަމާއެކު އަދި އެމެރިކާ އާއި އިސްރާއީލުގެ ވަފުދުތައް ހާޒިރުވެ ތިބެގެންނެވެ. ހަމާސްގެ ވަފުދު ސިއްރުން ފޮރުވައިގެން ބޭތިއްބި ކަމަށް ނަތަންޔާހޫ ދައްކާ ވާހަކައަކީ މުޅި ދުނިޔެ ކުށްވެރިކުރާ ކުށްތަކެއް ފޮރުވަން ކުރާ ނާކާމިޔާބު މަސައްކަތެކެވެ."