ސްޕެއިންގެ ބާސެލޯނާ އަށް ކުޅެމުން އަންނަ ނެދަލެންޑްސްގެ ފްރެންކީ ޑި ޔޯން، އެ ކުލަބުގެ އެއްބަސްވުން އައު ކޮށްފި އެވެ.

އުމުރުން 28 އަހަރުގެ ކުޅުންތެރިޔާ ބާސެލޯނާ އަށް ބަދަލުވީ 2019 ވަނަ އަހަރު އެވެ. އަޔެކްސް ދޫކޮށްލުމަށް ފަހު އަސް އަހަރު ދުވަހުގެ އެއްބަސްވުމެއްގެ ދަށުން އޭނާ ބާސެލޯނާ އަށް ބަދަލުވީއިރު، އެ ކުލަބުގައި އޭނާ މޮޅު ކުޅުމެއް ދެއްކި އެވެ. ބާސެލޯނާގެ އެއްބަސްވުމުގެ މުއްދަތު ހަމަވުމުން، ޑި ޔޯން އެހެން ކުލަބަކަށް ބަދަލުވާން އުޅޭ ކަމުގެ ވާހަކަތައް ވެސް އޮތީ ފެތުރިފަ އެވެ.

ނަމަވެސް، ބާސެލޯނާ އިން ޑި ޔޯން ބަހައްޓަން ބޭނުންވާތީވެ، އޭނާއާ އެކު އައު އެއްބަސްވުމެއްގެ މަޝްވަރާތައް ކުރަމުން އަންނަތާ ވެސް ދުވަސް ކޮޅެއް ވެއްޖެ އެވެ. އެ މަޝްވަރާތަކަށް ފަހު ޑި ޔޯން ވަނީ، ބާސެލޯނާގެ އެއްބަސްވުން އިތުރު ހަތަރު އަހަރު ދުވަހުގެ މުއްދަތަކަށް އައު ކޮށްފަ އެވެ. އެހެންކަމުން، 2029 ވަނަ އަހަރުގެ ޖޫން މަހުގެ ނިޔަލަށް އޭނާ ބާސެލޯނާގައި ހުންނާނެ އެވެ.

ބާސެލޯނާގެ އެއްބަސްވުން އައު ކުރުމަށް ފަހު ވާހަކަ ދައްކަމުން ޑި ޔޯން ބުނެފައި ވަނީ، ބާސެލޯނާގައި ހުރުމަކީ އޭނާގެ ވަރަށް ބޮޑު ހުވަފެނަކަށް ވާއިރު، އޭނާ ބޭނުން ވަނީ އިތުރު އަހަރުތަކެއް އެ ކުލަބުގައި ހޭދަ ކުރަން ކަމަށެވެ. ޚާއްސަކޮށް ބާސެލޯނާގެ އެއްބަސްވުން އައު ކުރެވެން އޮތް އެންމެ ދިގު މުއްދަތެއް ވަންދެން އައު ކުރަން އަދި ވެސް ބޭނުންވާ ކަމަށް ޑި ޔޯން ވަނީ ބުނެފަ އެވެ.

މީގެ އިތުރުން ޑި ޔޯން ބުނެފައި ވަނީ މިހާތަނަށް ބާސެލޯނާގައި ގިނަ ދުވަސް ތަކެއް ހޭދަ ކޮށްފައިވާއިރު، އެ ކުލަބާ އެކު ހޭދަވެފައިވާ ކޮންމެ ވަގުތަކީ ވެސް ވަރަށް އަގު ހުރި ހަނދާން ތަކެއް ކަމަށެވެ. އޭނާ ބުނީ ބާސެލޯނާ އާއެކު އަދި ވެސް ޙާސިލު ކުރަން ބޭނުންވާ ގިނަ ކާމިޔާބީ ތަކެއް ހުރި ކަމަށާއި، އެ ކުލަބުގައި އޭނާގެ ފެންވަރު ސާބިތު ކޮށްދޭން އަދި ވެސް ބޭނުންވާ ކަމަށެވެ.

ހަމަ އެހެންމެ، ބާސެލޯނާގައި އޭނާ އަށް ލިބޭ މުސާރައާ ގުޅޭ ގޮތުން ދޮގު ވާހަކަ ތަކެއް ފެތުރެމުން އަންނަކަން ފާހަގަކޮށް ޑި ޔޯން ބުނީ، މުސާރައާ ގުޅޭ ގޮތުން އެއްވެސް ވާހަކައެއް ދައްކަން އޭނާ ބޭނުން ނުވާ ކަމަށެވެ. އޭނާ ބުނީ މިހާތަނަށް އޭނާ އަށް ލިބެމުން އަންނަ މުސާރައާ ގުޅޭ ގޮތުން ދެކެވިފައިވާ ވާހަކަ ތަކާއި، އެ އަދަދު ތަކަކީ ޞައްޙަ އަދަދު ތަކެއް ނޫން ކަމަށެވެ.

ބާސެލޯނާގައި މިހާތަނަށް ހޭދަ ކޮށްފައިވާ މުއްދަތުގެ ތެރޭގައި ޑި ޔޯންް ވަނީ އެ ކުލަބަށް 267 މެޗު ކުޅެދީ 19 ލަނޑު ޖަހައިފަ އެވެ. އަދި ބާސެލޯނާ އާއެކު އޭނާ ވަނީ ހަ ތައްޓެއް ކާމިޔާބު ކޮށްފަ އެވެ. އޭގެ ތެރޭގައި ސްޕެނިޝް ލީގު ދެ ފަހަރު، ކޮޕާ ޑެލް ރޭ ދެ ފަހަރު އަދި ސްޕެނިޝް ސުޕަ ކަޕް ދެ ފަހަރު ކާމިޔާބު ކުރުން ހިމެނެ އެވެ.