ރަޝިޔާ އާއި ޔުކްރެއިންއާ ދެމެދު ހިނގަމުން އަންނަ ހަނގުރާމަ ނިމުމަކަށް ގެނައުމަށް ކުރަމުން އަންނަ މަސައްކަތުގައި، ސުލްޙައިގެ އެއްބަސްވުމެއް ޤާއިމު ކުރުމަށް ވަކި ވަގުތެއް ކަނޑައެޅިފައި ނެތް ކަމަށް، އެމެރިކާގެ ރައީސް ޑޮނަލްޑް ޓްރަމްޕް ވިދާޅުވެއްޖެ އެވެ.

ފްލޮރިޑާ އަށް ދަތުރު ކުުރުމަށް އެއާ ފޯސް ވަންގައި ހުންނަވައި ނޫސްވެރިންނާ ވާހަކަ ދައްކަވަމުން ޓްރަމްޕް ވިދާޅުވެފައި ވަނީ، އެމެރިކާގެ ވަފުދަކުން ރަޝިޔާ އަދި ޔުކްރެއިންގައި މަޝްވަރާތައް ކުރިއަށް ގެންދަމުން އަންނަ ކަމަށާއި، އެ މަޝްވަރާ ތަކުން ކުރިއެރުން ތަކެއް ވެސް ލިބިފައިވާ ކަމަށެވެ. އަދި ރަޝިޔާ އިން ބައެއް ކަންކަމުގައި ލުއި ދީފައިވާ ކަމަށް ވެސް ޓްރަމްޕް ފާހަގަ ކުރެއްވި އެވެ.

އެހެން ނަމަވެސް، އެކަން ކަމުގެ އިތުރު އެއްވެސް ތަފްސީލެއް ޓްރަމްޕް ދެއްވާފައި ނުވެ އެވެ. ހަނގުރާމަ ނިމުމަކަށް ގެނައުމަށް އެމެރިކާ އާއި ޔޫރަޕުގެ ޤައުމު ތަކުން ވަރަށް ބޮަޑަށް ބާރު އަޅަމުން އަންނައިރު، ރަޝިޔާ އިން ވަނީ ހަރުކަށި ޝަރުތު ތަކެއް ކުރިމަތި ކޮށްފަ އެވެ.

މިދިޔަ ހަފުތާގެ ތެރޭގައި އެމެރިކާ އިން ވަނީ ހަނގުރާމަ ހުއްޓާލައި، ސުލްޙަ ޤާއިމު ކުރުމަށް ޕްލޭނެއް ހުށަހަޅައިފަ އެވެ. އެ ޕްލޭން އަކީ ރަޝިޔާ އަށް ވަރަށް ބޮޑެތި ފައިދާ ތަކެއް ލިބިދޭ ގޮތަށް ހުށަހަޅާފައިވާ އަދި ޔުކްރެއިން އަށް ބަލިކަށި ޕްލޭނެއް ކަމަށް ބުނެ ބައެއް ފަރާތްތަކުން ވަނީ ޕްލޭނާ މެދު ކަންބޮޑުވުން ވެސް ފާޅު ކޮށްފަ އެވެ.

ހަނގުރާމަ ހުއްޓާލުމަށް ކުރައްވަމުން އަންނަ މަސައްކަތްތަކާ ގުޅޭ ގޮތުން ޓްރަމްޕް ވިދާޅުވެފައި ވަނީ، އޭނާގެ ޚާއްސަ މަންދޫބު އަންނަ ހަފުތާގެ ތެރޭގައި ރަޝިޔާ އަށް ވަޑައިގަންނަވާނެ ކަަމަށެވެ. އަދި އެ ދަތުރުފުޅުގައި ވިކްޓޮފް، ރަޝިޔާގެ ރައީސް ވުލަޑިމިއަރ ޕުޓިންއާ ބައްދަލު ކުރައްވާނެ ކަމަށް ވެސް ހާމަ ކުރައްވާފައިވެ އެވެ. ވިކްޓޮފްގެ އިތުރުން އެ މަސައްކަތުގައި އޭނާގެ ދަނބި ދަރިކަލުން ޖެރާޑް ކުޝްނާ ވެސް ބައިވެރި ވާނެ ކަމުގައި ޓްރަމްޕް ވިދާޅުވެފައިވެ އެވެ.

މީގެ ކުރިން ޓްރަމްޕް ވިދާޅުވެފައި ވަނީ ވަކި މުއްދަތެއްގެ ކުރިން ހަނގުރާމަ ހުއްޓާލުމުގެ އެއްބަސްވުން ޤާއިމުކޮށް، އެކަން ތަންފީޒު ކުރަން ބޭނުންފުޅުވާ ކަމަށެވެ. އެހެން ނަމަވެސް، އެކަމަށް މިހާރު ވަކި ތާރީޚެއް ނުވަތަ ވަގުތެއް ނެތްކަން ފާހަގަ ކުރައްވައި ޓްރަމްޕް ވިދާޅުވެފައި ވަނީ، އެކަން ޙާސިލު ވަންދެން މަސައްކަތް ކުރައްވާނެ ކަމަށެވެ.

ބްލޫމްބާގް ނިއުސް އިން ރިޕޯޓު ކޮށްފައިވާ ގޮތުގައި، އޮކްޓޫބަރު މަހުގެ 14 ވަނަ ދުވަހު ޕުޓިންގެ އިސް އެޑްވައިޒަރެއް ކަމަށްވާ ޔޫރޯ އުޝަޮވް އާއި ވިކްޓޮފް ކުރެއްވި ފޯނު ކޯލެއްގައި، ޔުކްރެއިން އަށް ހުއްޓުން ގެނުވާނެ ޕްލޭނަށް އެކުގައި މަސައްކަތް ކުރުމަށާއި، އެކަން ޕުޓިންގެ ފަރާތުން ޓްރަމްޕްއާ ހިއްސާ ކުރުމަށް ވިކްޓޮފް ވިދާޅުވެފައިވާ ކަމަށެވެ.

މީގެ އިތުރުން ބްލޫމްބާގް އިން ބުނެފައި ވަނީ ޒެލެންސްކީ ވައިޓް ހައުސް އަށް ވަޑައިގެންނެވުމުގެ ކުރިން، ޓްރަމްޕް އާއި ޕުޓިން ފޯނުން ގުޅުއްވައި މަޝްވަރާ ކުރުމަށް ރާވަން ޖެހޭ ކަމަށް ވިކްޓޮފް ލަފާ ދެއްވާފައިވާ ކަމަށެވެ. އެ ފޯނު ކޯލުގެ ފަހުން، ޒެލެންސްކީ ވައިޓް ހައުސް އަށް ވަޑައިގެންފައި ވަނީ އޮގަސްޓު މަހުގެ 18 ވަނަ ދުވަހު އެވެ.

އެ ރިޕޯޓާ ގުޅޭ ގޮތުން ސުވާލު ކުރުމުން ޓްރަމްޕް ވިދާޅުވެފައި ވަނީ އެކަމާ ހައިރާން ނުވާ ކަމަށެވެ. އަދި އެކަމަކީ "ޑީލްމޭކަރަކު" ކުރާ ކަމެއް ކަމަށް ޓްރަމްޕް ވިދާޅުވި އެވެ. އޭނާ ވިދާޅުވީ އެއީ ވެސް މަޝްވަރާ ކުރަން ޖެހޭ ކަންކަން ކަމަށާއި، އެކަމާ އޭނާ ކަންބޮޑު ނުވާ ކަމަށެވެ.

އިތުރަށް ޓްރަމްޕް ވިދާޅުވެފައި ވަނީ ހަނގުރާމައިގައި ރަޝިޔާ އަށް ބާރު ގަދަ އަތެއް ލިބިފައިވާ ކަމަށް ފެންނަ ކަމަށާއި، އެއްބަސްވުމަކަށް ވާސިލުވުމަކީ ޔުކްރެއިން އަށް އެންމެ ފައިދާ ހުރި ގޮތް ކަމަށެވެ. އަދި ޔުކްރެއިންގެ ބައެއް ސަރަހައްދުތައް ކުރިއަށް އޮތް ދެ މަސް، ނުވަތަ ތިން މަސް ދުވަހުގެ ތެރޭގައި ރަޝިޔާ އަށް ލިބިދާނެ ކަމަށް ވެސް ޓްރަމްޕް ވިދާޅުވި އެވެ.