ތ. ވިލުފުށީ މަސްޖިދު އުމަރު ފާރޫގް، އިސްލާމީ މަރުކަޒެއް ކަމުގައި ރައީސުލްޖުމުހޫރިއްޔާ ޑރ. މުހައްމަދު މުއިއްޒު ކަނޑައަޅުއްވައިފިއެވެ.

މިގޮތަށް ކަނޑައަޅުއްވާ އެކަން އިއުލާން ކުރެއްވީ އަންގާރަ ދުވަހުގެރޭ އެރަށު ރައްޔިތުންނާއި ބައްދަލުކުރެއްްވުމަށް ބޭއްވެވި ޖަލްސާގައެވެ. މި ނިންމުން ނިންމަވާ، އެތަނަށް ބޭނުންވާ ލައިބްރަރީއާއި ކްލާސްރޫމާއި އެހެނިހެން ވަސީލަތްތައް ގާއިމްކުރައްވާނެކަމަށް ރައީސް ވަނީ އިއުލާން ކުރައްވާފައެވެ.

ރައީސް މުއިއްޒު ވިދާޅުވީ، މަސްޖިދު އުމަރު ފާރޫގް އިސްލާމީ މަރުކަޒަކަށް ހެދުމުގެ މަސައްކަތް އިސްލާމިކް މިނިސްޓްރީއާ ގުޅިގެން ކުރިއަށް ގެންދާ ކަމަށާއި، ކުރިއަށް އޮތް ތަނުގައި އެ މިސްކިތް އިސްލާމީ މަރުކަޒަކަށް ބަދަލުވާނެ ކަމަށެވެ.

އެގޮތުން މިސްކިތަށް ބޭނުންވާ ލައިބްރަރީއާއި ކްލާސްރޫމާއި އެހެނިހެން ވަސީލަތްތައް ގާއިމުކުރާނެ ކަމުގެ ޔަގީންކަން ރައީސް މުއިއްޒު ދެއްވިއެވެ.

މީގެ އިތުރުން އިސްލާމިކް މިނިސްޓްރީން ބުނީ، މިއީ ވިލުފުށީ ރައްޔިތުންގެ އެދުމުގެ މަތިން ރައީސް މުއިއްޒު ނިންމެވި ނިންމެވުމެއް ކަމަށެވެ.

މިނިސްޓްރީން ބުނީ، މި މިސްކިތުގައި ގުރުއާނާއި ބެހޭ މަރުކަޒުގެ އައުޓްރީޗް ސެންޓަރެއް ހިންގަމުންދާ ކަމަށެވެ. އަދި ގުރުއާން ހިފްޒު ކުރުމުގެ ޕްރޮގްރާމް ކުރިއަށްދާއިރު ރާއްޖޭން ބޭރު ޓީޗަރެއް މަރުކަޒުގެ ބެލުމުގެ ދަށުން ކިޔަވައިދެމުންދާކަން ފާހަގަކޮށްފައިވެއެވެ.

ވިލުފުށީ މަސްޖިދު އުމަރު ފާރޫގް މިސްކިތަކީ ރާއްޖޭގައި ދެވަނައަށް އެންމެ ބޮޑު މިސްކިތެވެ. މިއީ ނަލަހިޔާ ގްރޫޕްގެ ފަރާތުން ތ. ވިލުފުށީގައި ބިނާކޮށްފައިވާ މިސްކިތެކެވެ. ޖުމްލަ 5،000 މީހުންނަށް ނަމާދު ކުރެވޭ ގޮތަށް ބިނާކުރި މިސްކިތް ނިންމައި، ރަސްމީކޮށް ސަރުކާރާ ހަވާލުކޮށްފައިވަނީ 17 ޑިސެންބަރު 2017 ގައެވެ.