ޓައިވާނުގެ ސަރުކާރު އިމާރާތްތަކުގެ ނަކަލުތަކެއް ޗައިނާގެ އަސްކަރީ ބޭސްއެއްގައި!

ޓައިވާނުގެ ސަރުކާރުގެ އިމާރާތްތަކާއި، އެހެނިހެން މުހިއްމު ބައެއް އިމާރާތްތަކުގެ ނަކަލުތަކެއް ޗައިނާގެ އަސްކަރީ ބޭސްއެއްގައި ގާއިމު ކުރަމުންދާ ކަމަށް ޖަޕާނުގެ ތިންކް ޓޭންކަކުން ބުނެފި އެވެ.

އިނާ މޮންގޯލިއާގެ ޝުރިހޭ ޓްރެއިނިންގ ބޭސްގައި މި އިމާރާތްތައް ހަދާފައިވާކަން ސެޓެލައިޓް ފޮޓޯ ތަކުން ސާބިތުވާ ކަމަށް ތިންކް ޓޭންކާ ހަވާލާދީ ޖަޕާނުގެ ބައެއް މީޑިއާ ތަކުން ރިޕޯޓު ކޮށްފައިވެ އެވެ. މީގެ ކުރިން 2015 ވަނަ އަހަރު، ހަމަ އެ ބޭސްގައި، ޓައިވާނުގެ ރައީސް އޮފީހުގެ ނަކަލެއް ހަދާފައިވެ އެވެ. އަދި ދާދި ފަހުން، ޓައިވާނުގެ ފޮރިން މިނިސްޓްރީ އާއި ޑިފެންސް މިނިސްޓްރީގެ އިމާރާތުގެ ނަކަލު ތަކެއް ވެސް އެތަނުގައި ބިނާކޮށްފައިވާ ކަމަށްވެ އެވެ.

އަދި 2022 ވަނަ އަހަރު، ޓައިވާނުގެ ރިޔާސީ އޮފީހާއި ފޮރިން މިނިސްޓްރީ ހިމެނޭ ސަރަހައްދުގެ ނަކަލު ހަދާފައިވާ ސަރަހައްދުގައި، މަގުތައް ބަންދުކޮށްގެން އެ އިމާރާތްތައް ހިފާނެ ގޮތުގެ ތަމްރީނު ތަކެއް ޗައިނާ އިން ހަދާފައިވާ ކަމަށް ސެޓެލައިޓް ފޮޓޯ ތަކުން ދައްކާ ކަމަށް، ޖަޕާނުގެ މީޑިއާ އިން ބުނެ އެވެ. ޗައިނާގެ އަމާޒަކީ މި ތަމްރީނު ތަކުގެ ސަބަބުން ޓައިވާން ބިރުގެންނެވުމެވެ.

ޗައިނާ އިން ޓައިވާނުގެ މުހިންމު އިދާރާތަކުގެ އިމާރާތްތަކުގެ ނަކަލުތަކެއް ހަދައި، އެތަންތަނުގައި އަސްކަރީ ތަމްރީނުތައް ހަދަމުންދާ ދިޔުމާ ގުޅޭ ގޮތުން ޓައިވާނުގެ ޑިފެންސް މިނިސްޓަރ ވެލިންޓަން ކޫ ވިދާޅުވީ އެ މައުލޫމާތު ލިބިވަޑައިގެންފައިވާ ކަމަށާއި، ޓައިވާނު އޮތީ ޗައިނާ އިން ދީފާނެ ހުރިހާ ބާވަތެއްގެ ހަމަލާ އަށް ވެސް ތައްޔާރަށް ކަމަށެވެ.

ޗައިނާ އިން ގަބޫލު ކުރާ ގޮތުގައި ޓައިވާނަކީ އެގައުމުގެ ބައެކެވެ. އަދި ގަދަބާރުން ވިޔަސް، ޓައިވާން އަނބުރާ ޗައިނާގެ ބާރުގެ ދަށަށް ގެނައުމަކީ ޗައިނާގެ އަމާޒެކެވެ. ޗައިނާގެ ރައީސް ޝީ ޖިންޕިންގް ވެރި ކަމަށް ވަޑައިގެންނެވި ފަހުން އެމަސައްކަތް އިތުރު ގިއަރެއްވަނީ ކުރިއަށް ޖައްސާލާފަ އެވެ.