އަންނަ 2026 ވަނަ އަހަރުގެ ބަޖެޓަކީ އިގްތިސާދީ ދިރުމެއް ނެތް، ވިހާއިރު ވެސް މަރުވެފައި އޮންނާނެ ބަޖެޓެއް ކަމަށް ރައްޔިތުންގެ މަޖިލީހުގެ ހަނިމާދޫ ދާއިރާގެ މެންބަރު އަބްދުލްޣަފޫރު މޫސާ ވިދާޅުވެއްޖެ އެވެ.

ހޯމަ ދުވަހުގެ ރައްޔިތުންގެ މަޖިލީހުގެ ޖަލްސާގައި ވަނީ 2026 ވަނަ އަހަރަށް ލަފާކޮށް ދައުލަތުން ހުށަހެޅި 64.2 ބިލިއަން ރުފިޔާގެ ބަޖެޓް، މަޖިލީހުގެ ބަޖެޓް ކޮމިޓީ އިން ފާސްކުރި ގޮތުގެ ރިޕޯޓުގެ ބަހުސް ފަށާފަ އެވެ.

ކޮމިޓި ރިޕޯޓަށް ބަހުސް ކުރައްވަމުން ޣަފޫރު ވިދާޅުވީ 2025 ވަނަ އަހަރުގެ ބަޖެޓް ހުށަހެޅުމުން އެ ބަޖެޓަކީ ވެސް ރައްޔިތުންނަށް އެކަށީގެންވާ ކުރިއެރުމެއް އަންނާނެ ބަޖެޓެއް ނޫން ކަމަށް ވިދާޅުވި ކަމަށެވެ. އަދި މިއަހަރު ފެނުނީ ވެސް އެ މަންޒަރު ކަމަށް ޣަފޫރު ވިދާޅުވި އެވެ.

މި އަހަރު ހިންގުނު ބޮޑު އެންމެ މަޝްރޫއެއް ވެސް ނެތް ކަމަށާ އެފަދަ އެންމެ މަޝްރޫއެއް ވެސް ސަރުކާރަށް ނުދެއްކޭނެ ކަމަށް ޣަފޫރު ވިދާޅުވި އެވެ.

ޣަފޫރު ވިދާޅުވީ މިދިޔަ އަހަރު ވެސް ދައުލަތުގެ އާމްދަނީ އަށް ޓެކްސް އަދި ކަސްޓަމްސް ޑިއުޓީގެ ގޮތުގައި ލިބެންޖެހޭ އަދަދު 5 އިންސައްތަ ދަށަށް ގޮސްފައިވާ ކަމަށެވެ. ޓީޖީއެސްޓީ ބޮޑު ކޮށްގެން ދައުލަތުގެ އާމްދަނީ ބޮޑުވި ނަމަވެސް އެއީ އެތެރޭގެ އިގްތިސާދު ހުއްޓާލައިގެން ލިބުނު ބޮޑު ގެއްލުމެއް ކަމަށް ވެސް މެންބަރު ވިދާޅުވި އެވެ.

2026 ވަނަ އަހަރަކީ ވެސް ރައްޔިތުންނަށް ކުރި އެރުން ލިބޭނެ އަހަރެއް ނޫން ކަމަށް ޣަފޫރު ވިދާޅުވި އެވެ. އެކަން ވަރަށް ސާފު ކޮށް ފެންނަން އެބައޮތް ކަމަށް މެންބަރު ވިދާޅުވި އެވެ.

މި ސަރުކާރު ވެރިކަމަށް އައި ފަހުން ރާއްޖޭގެ ކްރެޑިޓް ރޭޓިންގ ދަށަށް ގޮސްފައިވާ ކަމަށާ އިންސާނީ ހައްގުތައް ރައްކާތެރިކުރަން ކުރެވުނު އެއްވެސް މަސައްކަތެއް ފެންނަން ނެތް ކަމަށް ވެސް ޣަފޫރު ވިދާޅުވި އެވެ. އޭގެ އިތުރުން މެންބަރު ވަނީ ނޫސްވެރިކަމުގެ މިނިވަންކަން ވެސް ދަށަށް ގޮސްފައިވާ ކަން ފާހަގަކުރައްވާ އިންފްލޭޝަން ދުވަހަކު ވެސް ރާއްޖޭގަ ނާރާ ވަރަށް އަރާފައިވާއިރު ޑޮލަރުގެ އަގު ދުވަހަކު ވެސް ނުދާ ވަރަށް ގޮސްފައިވާ ކަމަށް ވިދާޅުވެފަ އެވެ.

ޣަފޫރު ވިދާޅުވީ މިއީ ގައުމެއްގެ އިގްތިސާދީ ދުވެލި ދެނެގަނެވޭނެ އިންޑިކޭޓަރުތައް ކަމަށެވެ. އަދި މިއިން އެއްވެސް ކަމެއް ހައްލު ނުކޮށް މި ގައުމުގެ އިގްތިސާދު ކުރިއަށް ނުދާނެ ކަމަށާ އެކަން އެގޮތަށް ނުވެސް ވާނެ ކަމަށް މެންބަރު ވިދާޅުވި އެވެ.

ޣަފޫރު ވިދާޅުވީ މި ސަރުކާރު ވެރިކަމަށް އައީ ވެސް ދޮގާ މަކަރުން ކަމަށެވެ. އަދި މިހާރު ވެސް އެންމެ ބާރު ސްޕީޑުގައި ކުރަމުންދާ އެއް ކަމަކީ ރައްޔިތުންނަށް އޮޅުވާލުން ކަމަށެވެ.

މެންބަރު ވިދާޅުވީ އަންނަ އަހަރު ވެސް ވާނީ މި އަހަރު ގޮތަށް ސަރުކާރު ހިތު ހުރި ގޮތަކަށް ރައްޔިތުންގެ ފައިސާ ތަޅާ ބުރުވާލާނެ، ރައްޔިތުންނަށް ބުރަ އަހަރަކަށް ކަމަށެވެ.