މި ސަރުކާރަށް ދެ އަހަރު ވީއިރު އެއްވެސް ކަމެއް ނުކުރެވޭ ކަމަށާ އެއްވެސް ކަމެއް ނުކުރެވުނީ އަންނަ 2026 ގެ ބަޖެޓު ފާސްނުވާތީ ކަމަށް ރައްޔިތުންގެ މަޖިލީހުގެ މައްޗަންގޮޅި އުތުރު ދާއިރާގެ އިބްރާހިމް މުހައްމަދު (ޖަނާބު) ވިދާޅުވެއްޖެ އެވެ.

ހޯމަ ދުވަހުގެ ރައްޔިތުންގެ މަޖިލީހުގެ ޖަލްސާގެ ބަޖެޓަށް ބަހުސް ކުރައްވަމުން ޖަނާބު ވިދާޅުވީ އަންނަ އަހަރަށް ލަފާކޮށް ދައުލަތުން ހުށަހަޅާފައިވާ 64.2 ބިލިއަން ރުފިޔާގެ ރިކޯޑު ބަޖެޓު ބޮޑުވުމުން އެކަމާ މެދު ފަޚުރުވެރިވާ ކަމަށެވެ.

ބަޖެޓަކީ ބޮޑުވާން ޖެހޭ އެއްޗެއް ކަމަށާ، އަދި މިއަށް ވުރެ ވެސް ބަޖެޓް ބޮޑު ވެއްޖެ ނަމަ ރައްޔިތުންނަށް ރަނގަޅު ވާނެ ކަމަށް ޖަނާބު ވިދާޅުވި އެވެ. އޭގެ އިތުރުން، މި ސަރުކާރުގެ ދެ އަހަރު ކަމެއް ނުކުރެވުނު ކަން ގަބޫލު ކުރައްވާ ކަމަށާ އެކަންކަން ނުވެ ހުރީ އަންނަ އަހަރުގެ ބަޖެޓު ފާސް ނުވާތީ ކަމަށް ވެސް ޖަނާބު ވިދާޅުވި އެވެ.

ޖަނާބު ވިދާޅުވީ އެހެންކަމުން ބައެއް މެންބަރު ރައްޔިތުންނަށް އޮޅޭ ގޮތަށް މި ސަރުކާރަށް އެއްވެސް ކަމެއް ނުކުރޭ ކަމަށް ބުނެ ދައްކާ ވާހަކަތަކަށް ފަރުވާތެރިވާން ޖެހޭ ކަމަށެވެ. މިދިޔަ އަހަރު ވެސް މި އަހަރުގެ ބަޖެޓު ހުށަހެޅުމުން ބައެއް މެންބަރު މަޖިލީހުގެ ތަޅުމުގައި ބޮޑާހޭކި ކަމަށް މެންބަރު ވިދާޅުވި އެވެ.

މި ބަޖެޓު ފާސް ނުކުރުމަށް އިދިކޮޅު މެންބަރު އޭރު މަސައްކަތް ކުރަމުން ދިޔައިރު، މިއަދު ހުރިހާ ރަށެއްގައި އޭޓީއެމް ވެސް އެޅިގެން އެ ދިޔައީ ހަމަ އެ ބަޖެޓު ފާސްކުރުމުން ނޫންތޯ މެންބަރު ސުވާލު އުދެއްދެވި އެވެ.

މި ހިނގާ 2025 ވަނަ އަހަރާ މިދިޔަ 2024 ވަނަ އަހަރު އެއްވެސް ކަމެއް ނުކުރެވުނީ އަންނަ އަހަރުގެ ބަޖެޓު ފާސްނުވާތީ ކަމަށް މެންބަރު ވިދާޅުވުމުން ވަރަށް ގިނަ ބަޔަކު ދަނީ މަޖިލީހުގެ މެންބަރަކަށް ވެ ހުރެ ޖަނާބަށް ދައުލަތުގެ ކަންކަން ހިނގާ ގޮތް ނޭނގޭ ކަމަށް ބުނެ އޭނާ އަށް ފާޑުކިޔަމުންނެވެ.