ވެނެޒުއެލާ އަށް ހަމަލާ ދިނުމުގެ ވިސްނުމެއް ނެތް ކަމަށް ޓްރަމްޕް ވިދާޅުވެއްޖެ

އެމެރިކާ އާއި ވެނެޒުއެލާއާ ދެމެދު ނުތަނަވަސް ކަމެއް އުފެދިފައި އޮތް ނަމަވެސް، ވެނެޒުއެލާ އަށް ހަމަލާ ދިނުމުގެ ވިސްނުމެއް ނުގެން ގުޅުއްވާ ކަމަށް، އެމެރިކާގެ ރައީސް ޑޮނަލްޑް ޓްރަމްޕް ވިދާޅުވެއްޖެ އެވެ.

ހުކުރު ދުވަހު ޓްރަމްޕް މިހެން ވިދާޅުވެފައިވާއިރު، މިއީ ފާއިތުވި ހަފުތާގެ ތެރޭގައި ޓްރަމްޕް ދައްކަވާފައިވާ ވާހަކަތަކާ ތަފާތު ވާހަކަ އެކެވެ. އަދި މިއީ އެމެރިކާ އިން މަސްތުވާ ތަކެތީގެ ވިޔަފާރިއާ ގުޅިފައިވާ އޮޕަރޭޝަންތައް އިތުރު ކުރުމުގެ ވާހަކަތައް ދެކެވިފައިވާ ދަނޑިވަޅެއްގައި ޓްރަމްޕް ދައްކަވާފައިވަ ވާހަކަ އެކެވެ.

ފާއިތުވި މަސް ތަކުގެ ތެރޭގައި އެމެރިކާ އިން ވަނީ ކެރީބިއަން ސަރަހައްދުގައި އަސްކަރީ ޙަރަކާތްތައް އިތުރުކޮށް އަދި ވަރުގަދަ ކޮށްފަ އެވެ. އޭގެ ތެރޭގައި ހަނގުރާމައިގެ ޖެޓުތަކާއި، ހަނގުރާމައިގެ އުޅަނދުތައް އަދި އަސްކަރީ އޮފިޝަލުން އިތުރު ކުރުން ވެސް ހިމެނެ އެވެ. އަދި ކުރިއަށް އޮތް ދުވަސް ތަކުގައި އަސްކަރީ ޙަރަކާތްތައް އިތުރަށް ވަރުގަދަ ވާނެ ކަމަށް ލަފާ ކުރެވެ އެވެ.

ހުކުރު ދުވަހު ޓްރަމްޕް ވިދާޅުވެފައި ވަނީ، ވެނެޒުއެލާ އަށް ހަަމަލާ ދިނުމާ ގުޅޭ ގޮތުން އޭނާ ވިސްނަވާ ކަމަށް ބުނެ، މީޑިއާ ތަކުގައި ކޮށްފައިވާ ރިޕޯޓަކީ އަސްލެއް ނޫން ކަމަށެވެ. އަދި އެކަން އެހެން ކުރުމުގެ އެއްވެސް ވިސްނުމެއް ނެތް ކަމަށް ވެސް ވިދާޅުވެފައިވެ އެވެ. ނަމަވެސް، މިއީ ހަމަލާ ދިނުމުގެ އެއްވެސް ވިސްނުމެއް ނެތް ކަމެއް ނުވަތަ، ފައިނަލް ނިންމެއް ނިންމާފައި ނެތުން ކަމަށް ޓްރަމްޕް ހާމަ ކުރައްވާފައި ނުވެ އެވެ.

މީގެ ކުރިން ޓްރަމްޕް ވިދާޅުވެފައި ވަނީ ވެނެޒުއެލާ އިން މަސްތުވާ ތަކެތީގެ ވިޔަފާރި އަށް ބޮޑު އެހީތެރި ކަމެއް ދެމުން އަންނަ ކަމަށާއި، އެމެރިކާ އިން އެކަމާ ދެކޮޅަށް ފިޔަވަޅު އަޅައި އަދި ހަމަލާ ދޭން ނިންމާފައިވާ ކަމަށެވެ. މީގެ ކުރިން ކެރީބިއަން އަދި އިރުމަތީ ޕެސިފިކްގައި އެމެރިކާ އިން ކުރިއަށް ގެންދިޔަ ކެމްޕެއިންގައި ވަނީ، މަސްތުވާ ތަކެތީގެ ވިޔަފާރި ކުރާ ކަމަށް ބެލެވޭ ދިހަ ބޯޓަކަށް ހަމަލާ ވެސް ދީފަ އެވެ. އެ ހަމަލާ ތަކުގައި 61 މީހަކު މަރުވެފައިވާ ކަމަށް ރިޕޯޓު ކުރެވިފައިވެ އެވެ.

ޓްރަމްޕް މިހެން ވިދާޅުވެފައި ވީ ނަމަވެސް، ރިޕަބްލިކަން ޕާޓީ އަށް ނިސްބަތްވާ ސެނެޓަރު ލިންޑްސީ ގްރެހަމް އާދީއްތަ ދުވަހު ވިދާޅުވެފައި ވަނީ، ވެނެޒުއެލާ އާއި ކޮލަމްބިއާއާ ދެކޮޅަށް ހިންގަން ރާވާފައިވާ އަސްކަރީ އޮޕަރޭޝަނާ ގުޅޭ ގޮތުން ޤާނޫނު ހަދާ މަޖިލީހުގެ މެމްބަރުންނަށް މައުލޫމާތު ދެއްވާނެ ކަމަށް ޓްރަމްޕް ވިދާޅުވެފައިވާ ކަމަށެވެ. އެކަން ކުރައްވާނީ އޭޝިއާ އަށް ކުރައްވާ ދަތުރުފުޅަށް ފަހު ކަމަށް ޓްރަމްޕް ވިދާޅުވެފައިވާ ކަމަށް ވެސް އޭނާ ވިދާޅުވި އެވެ.

އޭޝިއާގެ ޤައުމު ތަކަށް ކުރެއްވި ދަތުރުފުޅަށް ފަހު، ބުރާސްފަތި ދުވަހު ޓްރަމްޕް ވަނީ އެނބުރި އެމެރިކާ އަށް ވަޑައިގެންފަ އެވެ. މީގެ އިތުރުން، ނަން ހާމަ ކުރަން ބޭނުން ނުވާ އެމެރިކާ ސަރުކާރުގެ އިސް އޮފިޝަލުން ބުނެފައި ވަނީ، އެމެރިކާގެ އަސްކަރިއްޔާ އިން ވެނެޒުއެލާގެ ބައެއް ސަރަހައްދު ތަކަށް ހަމަލާ ދިނުމަށް ރޭވިފައިވާ ކަމަށެވެ. އެގޮތުން ރަންވޭ ފަދަ ބައެއް އޮޕްޝަންތައް ކަނޑައަޅާފައިވާ ކަމަށް ބުނެފައިވެ އެވެ.