މަޖިލީހުގެ ހާޒިރީން ވަނަ ހޯދުމަށްވުރެ މުހިއްމީ މަޖިލިހުގެ ރިޔާސަތު ބަދަލުކުރުން:ފައިސަލް ނަސީމް

މަޖިލީހުގެ ހާޒިރީން ވަނަ ހޯދުމަށްވުރެ މަޖިލީހުގައި އިސްލާހުކުރަންޖެހޭ ގިނަ ކަންކަން އެބަ ހުރި ކަމަށާއި މަޖިލީހުގެ ތެރެއިން ކަންކަން އިސްލާހުކުރެެވެން އޮތީ ރިޔާސަތު ބަދަލުކޮށްގެން ކަމަށް ކާށިދޫ ދާއިރާގެ މެންބަރު ފައިސަލް ނަސީމު ވިދާޅުވެއްޖެ އެވެ.

މަޖިލީހުގެ ދެ ވަނަ ދައުރުގައި ހާޒިރީން އެންމެ ފުލަށް ފައިސަލް ނަސީމް ދިއުމާ ގުޅިގެން އޭނާ ނެރުއްވި ބަޔާނެއްގައި ވިދާޅުވެފައި ވަނީ ރައްޔިތުންގެ ލާބަ އާއި މަންފާއަށް ގާނޫނުތައް ހެދުމުގެ ޒިންމާ ރައްޔިތުން މަތިކޮށްފައިވާ ފަރާތަކީ ރައްޔިތުންގެ މަޖިލީހުގެ މެންބަރުން ކަމުގައިވާއިރު، މިފާއިތުވެދިޔަ ދައުރުގައި އެކަން އެންމެ ރަގަޅަށް ކުރެވިފައި ނުވާ ކަމަށެވެ. ރައްޔިތުންނަށް ފައިދާ ހުރި އެކަށީގެންވާ މަސައްކަތްތަކެއް މަޖިލީހުން ކުރެވިފައި ނުވާކަމީ، ރައްޔިތުންގެ މަޖިލީހުގެ ރިޔާސަތު ކިބައިގައި، ރައްޔިތުންގެ ހައްޤުގައި މަސައްކަތް ކުރުމުގެ އެއްވެސް އިހުލާސްތެރި ނިޔަތެއް ނެތްކަމަށް ފައިސަލް ނަސީމު ވިދާޅުވި އެވެ.

މަޖިލީހުގެ ރިޔާސަތުން، މެންބަރުންގެ ހިޔާލުތައް އެއްގޮތްކޮށް، މިފަދަ ބޭނުންތެރި މުހިންމު އިސްލާހުތައް މަޖިލީހުން ފާސްކުރުމަށް އެއްވެސް ސަމާލު ކަމެއް ދެއްވަން ބޭނުން ނުވާކަމަށް ފައިސަލް ވިދާޅުވި އެވެ.

ހަމައެހެންމެ ޒުވާނުންނާއި ވަޒީފާ އަދާ ކުރަމުންދާ އެންމެހާ ފަރާތްތަކަށް ވަޒީފާގެ ޔަގީން ކަމާއި ރައްކާތެރިކަން ކަށަވަރު ކޮށް ދިނުމުގެ ގޮތުން، ވަޒީފާއާއި ބެހޭ ޤާނޫނަށް އޭނާ ހުށަހެޅި އިސްލާހުވެސް ބޭރުކޮށްލާފައިވާކަން ފައިސަލް ފާހަގަކުރައްވާފައިވެ އެވެ.

ރައްޔިތުންގެ މަޖިލީހަކީ އެތައް ނިކަމެތި ރައްޔިތުންގެ އުއްމީދުތަކާއި ގުޅި، މުޖުތަމައުގައި ތަފާތު ވަޒީފާ އަދާ ކުރަމުންދާ ފަރާތްތަކާއިި، މާދަމާ ކިޔެވުން ނިންމައި ވަޒީފާއަށް ނުކުންނަން ތިބި ޒުވާނުންނާއި ،އާއިލާތަކުގެ މުސްތަގުބަލާއި ގުޅުންހުރި ގާނޫނުތައް ފާސްކޮށް އިޖްތިމާއީ ރައްކާތެރިކަން ޔަގީންކަމާއި އެކު ފޯރުކޮށް ދިނުމަށްޓަކައި ގިނަގުނަ މަސައްކަތްތަކެއް ކުރަންޖެހޭ އިދާރާއަކަށް ވީ ނަމަވެސް ރައްޔިތުންގެ މަޖިލީހުގެ ތެރެއިން އެފަދަ އެއްވެސްކަމެއް ކުރެވިގެން ނުދާކަން ވަނީ ފާހަގަކޮށްފަ އެވެ.