ޣައްޒާގައި ބައިނަލްއަޤުވާމީ ބާރެއް ޤާއިމު ކުރުމުގެ މަސައްކަތް ކުރަމުން އަންނަ ކަމަށް ރޫބިއޯ ވިދާޅުވެއްޖެ

އިސްރާއީލް އިން ޣައްޒާގައި ހިންގަމުން އައި ހަނގުރާމަ ހުއްޓާލުމުގެ އެއްބަސްވުމެއް ޤާއިމު ކޮށްފައިވާއިރު، ޣައްޒާގައި ބައިނަލްއަޤުވާމީ ބާރެއް ޤާއިމު ކުރުމުގެ މަސައްކަތް ކުރަމުން އަންނަ ކަަމަށް، އެމެރިކާގެ ސެކްރެޓަރީ އޮފް ސްޓޭޓް މާކޯ ރޫބިއޯ ވިދާޅުވެއްޖެ އެވެ.

ރޫބިއޯ ވިދާޅުވެފައި ވަނީ ޣައްޒާގައި ބައިނަލްއަޤުވާމީ ބާރެއް ޤާއިމު ކުރުމަށް އދ ގެ ޤަރާރެއް ނުވަތަ ބައިނަލްއަޤުވާމީ އެއްބަސްވުމަކާ ގުޅޭ ގޮތުން މިހާރު މަޝްވަރާތައް ކުރިއަށް ގެންދަމުން އަންނަ ކަމަށެވެ. އަދި އެކަމާ ގުޅޭ ގޮތުން އިތުރު މަޝްވަރާ ކުރުންތައް ޤަތަރުގައި ކުރިއަށް ގެންދާނެ ކަމަށް ވެސް ރޫބިއޯ ވަނީ ވިދާޅުވެފަ އެވެ.

ނޫސްވެރިންނާ ވާހަކަ ދައްކަވަމުން ރޫބިއޯ ވިދާޅުވެފައި ވަނީ އެ މަސައްކަތުގައި ބައިވެރިވުމަށް ގިނަ ޤައުމު ތަކަކުން ޝައުޤުވެރިކަން ފާޅު ކޮށްފައިވާ ކަމަށާއި، ޤާނޫނީ ގޮތުން ބައެއް ކަންކަން ކުރަން ހުރި ކަމަށެވެ. އެހެން ކަމުން، އެކަމުގައި އދ ގެ ޤަރާރެއް ނުވަތަ ބައިނަލްއަޤުވާމީ އެއްބަސްވުމެއް ވަރަށް މުހިންމުވާ ކަމަށް ވެސް ރޫބިއޯ ވަނީ ވިދާޅުވެފަ އެވެ.

އިތުރަށް އޭނާ ވިދާޅުވީ އެކަމުގައި ގިނަ މަސައްކަތް ތަކެއް ކުރެވެމުން އަންނަ ކަމަށާއި، މާލީ ގޮތުން އަދި އިންސާނީ ވަސީލަތްތަކުގެ ގޮތުން ވެސް ގިނަ ޤައުމުތަކުން ޝައުޤުވެރިކަން ފާޅު ކޮށްފައިވާއިރު، އެފަދަ އެއްބަސްވުމެއް އޮތުން މުހިންމުވާ ކަމަށެވެ. އެކަން ފާހަގަ ކުރައްވައި ރޫބިއޯ ވިދާޅުވީ، މިހާރު ވެސް އެކަމުގައި އެމެރިކާގެ ޓީމު ތަކުން މަސައްކަތް ކުރަމުން އަންނަ ކަމަށާއި، މިވަގުތު ކުރަމުން އަންނަނީ އަސާސްތައް އެކުލަވާލުމުގެ މަސައްކަތް ކަމަށެވެ.

އެމެރިކާގެ ރައީސް ޑޮނަލްޑް ޓްރަމްޕްގެ ޕްލޭންގެ ދަށުން ޣައްޒާ ހަނގުރާމަ ހުއްޓާލުމުގެ އެއްބަސްވުން ޤާއިމު ކޮށްފައިވާއިރު، އެމެރިކާ އިން ވަނީ އެއްބަސްވުން ދެމި އޮތް ކަމަށް ހާމަ ކޮށްފަ އެވެ. އަދި ދެ ފަރާތުން ވެސް އެއްބަސްވުމަަށް ފުރިހަމަ އަށް އަމަލު ކުރަމުން ގެންދޭތޯ ޔަގީން ކުރާނެ ކަމަށް ވެސް އެމެރިކާ އިން ވަނީ ހާމަ ކޮށްފަ އެވެ.

އެމެރިކާ ސަރުކާރުން ނިންމާފައި ވަނީ، ޣައްޒާގައި ސުލްޙަވެރިކަން ޤާއިމު ކުރުމަށް ބައިނަލްއަޤުވާމީ ބާރެއް ޤާއިމި ކުރުމަށެވެ. އެކަމުގައި ޢަރަބި ޤައުމު ތަކުން މާލީ އަދި އިންސާނީ އެހީތެރިކަން ފޯރުކޮށްދިނުމަށް ވެސް އެމެރިކާ އިން ބޭނުންވެ އެވެ. ނަމަވެސް، އެ މަސައްކަތުގައި ތުރުކީގެ ސިފައިން ބައިވެރި ކުރުމަށް އިސްރާއީލް އިން ވަނީ އިންކާރު ކޮށްފަ އެވެ.