އިދިކޮޅު މައި ޕާޓީ މޯލްޑިވިއަން ޑިމޮކްރެޓިކް ޕާޓީ (އެމްޑީޕީ) އިން ކުރިޔަށް ގެންދާ މުޒާހަރާތަށް ހުއްޓުވޭނޭ ހަމަ އެކަނި ގޮތަކީ ރައީސް މުއިއްޒު ރައްޔިތުންނަށް ވެވަޑައިގެންފައިވާ އެންމެހާ ވައުދުތައް ފުއްދައި ގައުމުގެ ރައްޔިތުންނަށް މިހާރު ކުރިމަތިކުރައްވަމުން އެ ގެންދަވާ އެންމެހާ ތަކުލީފުތައް ހުޓުމަކަށް ގެނައުން ކަމަށް ކ. މާފުށި ކައުންސިލުގެ ރައީސް، ހަސަން ސަލާހުގެ ވިދާޅުވެއްޖެ އެވެ.

އޭނާ އެފަދައިން ވިދާޅުވީ ލޫޓުވައިފި، ލޫޓުވައިފި މުޒާހަރާ އިން ހައްޔަރުކުރި މީހުންނާއި އެކު ބުރާސްފަތި ދުވަހުގެ ރޭ ބޭއްވި ސުވާލާއި ޖަވާބު ސެޝަނެއްގައި ވާހަކަދައްކަވަމުންނެވެ.

ހަސަން ސަލާހު އަކީ ވެސް އޮކްޓޯބަރ 3 ވަނަ ދުވަހުގެ ރޭ ބޭއްވި ބޮޑު މުޒާހަރާ އިން ހައްޔަރު ކޮށް، ފުލުހުން އެތަކެއް އަނިޔާތަކެއް ދީފައިވާ ފަރާތެކެވެ. އެގޮތުން ފުލުހުން ވަނީ ސަލާހުގެ އިނގިލި ބިންދާލައި ޖިސްމާނީ ގޮތުން އެތައް އަނިޔާތަކެއް ދީފައި އެވެ.

އޭނާ ދޫކޮށްލާފައި ވަނީ އެ މުޒާހަރާ އިން ހައްޔަރު ކުރި އިތުރު 5 މީހަކާއި އެކު އޮކްޓޯބަރ މަހުގެ 19 ވަނަ ދުވަހު 15 ދުވަހު ޖަލުގައި ހޭދަ ކުރުމަށް ފަހުގައެވެ.

ސަލާހު ވިދާޅުވީ މި ސަރުކާރު އައި ފަހުން ރާއްޖޭގެ އެތައް ދަރަޖައެއް ފަހަތަށް ގޮސްފައިވާ ކަމަށެވެ. އެގޮތުން ރައްޔިތުންގެ އަސާސީ ބޭނުންތައް ނުފުދި ރައްޔިތުން މަގުމަތިވެ، ހާލުގައި ޖެހިފައިވާ ކަމަށް ވެސް އޭނާ ވިދާޅުވި އެވެ.

އޭނާ ވިދާޅުވީ މިއަދު ގައުމުގެ ހުރިހާކަމެއް ގޯސްކޮށް ދާތީ ރައްޔިތުންގެ ކަންބޮޑުވުން އިންތިހާއަށް އެބަ އޮތް ކަމަށާއި މަގުތަކަށް ނުކުމެ މުޒާހަރާތައް ކުރަނީ އެކަންކަން ރަނގަޅުކޮށް ރައްޔިތުންގެ ހައްގުތައް ހޯދައިދިނުމަށް ކަމަށެވެ.

ރައީސް މުއިއްޒު ރަށްރަށުގެ ތަރައްގީ އަށް ކުރައްވާނެ ކަމަށް ވެވަޑައިގެންފައިވާ ވައުދުތައް އަދިވެސް ނުފުއްދަވާ ކަން ފާހަގަކުރައްވައި ސަލާހު ވިދާޅުވީ، ރައީސް މުއިއްޒުގެ މި ސަރުކާރުގެ ސިޔާސަތު ތައް ފެއިލް ވެ މިއަދު ގައުމުގެ އެތަކެއް ރައްޔިތުންނެއްގެ އަސާސީ އެތައް ހައްގުތަކެއް ގެލިގެން ގޮސްފައިވާ ކަމަށެވެ.

އެގޮތުން މިއަދު އެމްޑީޕީން މަގުތަކަށް ނުކުމެ މި ކުރަމުން ގެންދާ މުޒާހަރާތައް ހުއްޓާލާނީ ރައީސް މުއިއްޒު ރަށްރަށުގައި ކުރިޔަށް ގެންދަން ވައުދުވެވަޑައިގެންފައިވާ އެންމެހާ މަޝްރޫޢު ތައް ކުރިޔަށް ގެންގޮސް، މިއަދު ރައްޔިތުންނަށް ޖައްސަމުން އަންނަ އުނދަގޫ ތަކާއި ދުއްތުރާތަކަށް ނިމުން އައި ދުވަހަކުން ކަމަށެވެ. އަދި މުޒާހަރާތައް ހުއްޓޭނޭ ހަމަ އެކަނި ގޮތަކީ އެއީ ކަމަށް ސަލާހު ވިދާޅުވި އެވެ.

ރައީސް މުއިއްޒުގެ މި ސަރުކާރުން ހުރިހާ ކައުންސިލްތަކެއް ތަޅުއަޅުވާފައިވާކަން ފާހަގަކުރައްވައި ސަލާހު ވިދަޅުވީ މިއަދު ގައުމުގެ ހާލަތު މިވަނީ 1990 ގެ އަހަރުތަކަށް ދީލާލައިގެން ގޮސްފައި ކަމަށެވެ. އެގޮތުން މިއަދު ސަރުކާރުން އަމަލުކުރާ ގޮތުން ކަސުންސިލް އިދާރާގައި ހުރި ގޮނޑިއެއް ވެސް ބޭރަށް ނެރެލެވެން ނެތް ކަމަށް އޭނާ ވިދާޅުވި އެވެ.

ސަލާހު ވަނީ ލާމަރުކަޒީ ގާނޫނަށް މި ސަރުކާރުން ގެނެސްގެން އުޅޭ ކައުންސިލްތައް ތަޅު އެޅުވޭ ގޮތަށް އޮތް އޮތުން އަނބުރާ ގެނެސް، އެ ގާނޫނު ވަގުތުން އުވާލުމަށް ވެސް ގޮވާލާފައި އެވެ.

ސަލާހު ވިދާޅުވީ އަނިޔާކޮށް ޖަލައް ވެސް ލެވިދާނެ ކަމަށާއި އަދި ތަޅާ އަނިޔާ ވެސް ކުރެވިދާނެ ކަމަށެވެ. އެހެން ނަމަވެސް ގައުމުގެ އިސްލާހަށް މި ކުރާ މަސައްކަތަށް ކުޑަވެސް މަޑުޖެހުމެއް ނާންނާނެ ކަަމަށް އޭނާ ވިދާޅުވި އެވެ.

ބުރާސްފަތި ދުވަހުގެ ރޭ އެމްޑީޕީ ހަރުގޭގައި ބޭއްވި ސުވާލާއި ޖަވާބު ސެޝަންގައި ލޫޓުވައިފި މުޒާހަރާ އިން ހައްޔަރު ކުރި މީހުން ވަނީ އެ މީހުންގެ ތަޖުރިބާތައް ހިއްސާކޮށްފައެވެ. އެ އެންމެން ވެސް ގޮވާލީ ހިތްވަރު ދޫކޮށް ނުލާ ސަރުކާރު ޖަވާބުދާރީ ކުރުވުމުގެ މަސައްކަތް އިތުރަށް ވަރުގަދަ ކުރުމަށެވެ.