ރަޝިޔާގެ ރައީސް ވުލަޑިމިއަރ ޕުޓިންއާ އެކު، ބޭކާރު ބައްދަލުވުމެއް ބާއްވަން ބޭނުންފުޅު ނުވާ ކަމަށް އެމެރިކާގެ ރައީސް ޑޮނަލްޑް ޓްރަމްޕް ވިދާޅުވެއްޖެ އެވެ.

ޓްރަމްޕް އާއި ޕުޓިން އަވަސް މުސްތަޤުބަލެއްގައި ބައްދަލު ނުކުރައްވާނެ ކަމުގެ އަޑުތައް ފެތުރިފައި ވަނިކޮށް ޓްރަމްޕް ވިދާޅުވީ، ހަންގޭރީގެ ވެރި ރަށް ބުޑަޕެސްޓުގައި ބޭއްވުމަށް ރޭވިފައިވާ ބައްދަލުވުން މިވަގުތަށް ފަސް ކުރެވިފައިވާ ކަމަށެވެ. އަދި އެއީ ބޭކާރު ބައްދަލުވުމެއް ބާއްވަން ބޭނުންފުޅު ނުވާތީ ކަމަށް ވެސް ޓްރަމްޕް ވަނީ ވިދާޅުވެފަ އެވެ.

މިދިޔަ ހަފުތާގެ ބުރާސްފަތި ދުވަހު ޓްރަމްޕް ވަނީ ޕުޓިންއާ ފޯނުން ގުޅުއްވައި މަޝްވަރާ ކުރައްވައިފަ އެވެ. އަދި އޭގެ ފަހުން ވަނީ، ޓްރަމްޕް އާއި ޕުޓިންގެ ދެ ވަނަ ސަމިޓެއް ބާއްވާނެ ކަމަށް ވިދާޅުވެފަ އެވެ. އެ ބައްދަލުވުމަށް ތައްޔާރުވުމަށް އެމެރިކާގެ ސެކްރެޓަރީ އޮފް ސްޓޭޓް މާކޯ ރޫބިއޯ އާއި، ރަޝިޔާގެ ފޮރިން މިނިސްޓަރު ސާގޭ ލަވްރޮވް ވެސް ވަނީ މަޝްވަރާ ކުރައްވައިފަ އެވެ.

ޓްރަމްޕް އާއި ޕުޓިންގެ ދެ ވަނަ ސަމިޓު ފަސްކޮށްފައިވާ ކަމަށް ވިދާޅުވެފައިވާއިރު، މިދިޔަ ހުކުރު ދުވަހު ޓްރަމްޕް ވަނީ ޔުކްރެއިންގެ ރައީސް ވުލޮޑިމިއަރ ޒެލެންސްކީއާ ބައްދަލު ކުރައްވައިފަ އެވެ. އެ ބައްދަލުވުމުގައި ޓްރަމްޕް ވަނީ، ރަޝިޔާ އިން އެދިފައިވާ ގޮތަށް ޔުކްރެއިންގެ ބިމުން ބައެއް ދޫކޮށްލުމަށް ވެސް ޒެލެންސްކީ އަށް ބާރު އަޅުއްވައިފަ އެވެ.

އެ ބައްދަލުވުމުގެ މައުލޫމާތު އިނގޭ މަސްދަރު ތަކުން އޭއެފްޕީ އަށް މައުލޫމާތު ދެމުން ބުނެފައި ވަނީ، ރަޝިޔާއާ އެކު އެއްބަސްވުމަކަށް ނުގޮސްފި ނަމަ، ގަދަ އަލިފާނުގައި ޔުކްރެއިން ހަލާކު ވެގެން ދާނެ ކަމަށް ވެސް ޓްރަމްޕް ވަނީ ޒެލެންސްކީ އަށް ދަންނަވައިފަ އެވެ. ނަމަވެސް، ޔުކްރެއިން އިން އޮތީ އެ ޤައުމުގެ ބިމުން ބައެއް ދޫކޮށްލަން ތައްޔާރަށް ނޫނެވެ.

ނޫސްވެރިންނަށް މައުލޫމާތު ދެއްވަމުން ޓްރަމްޕް ވިދާޅުވެފައި ވަނީ، ހަނގުރާމައިގެ ރޮނގުން ގިނަ ކަންތައްތަކެއް ވަމުން އަންނަ ކަމަަށެވެ. އެގޮތުން ކުރިއަށް އޮތް ދެ ދުވަހުގެ ތެރޭގައި، މިހާރު ކުރެވެމުން އަންނަ މަސައްކަތްތަކާ ބެހޭ ގޮތުން މައުލޫމާތު ދެއްވާނެ ކަމަށް ވެސް ޓްރަމްޕް ވަނީ ވިދާޅުވެފަ އެވެ.

މިއަހަރުގެ އޯގަސްޓު މަހު ވަނީ ޓްރަމްޕް އާއި ޕުޓިންގެ ސަމިޓުގެ ފުރަތަމަ ބައްދަލުވުން ކުރިއަށް ގެންގޮސްފަ އެވެ. އެ ސަމިޓު ކުރިއަށް ގެންގޮސްފައި ވަނީ އެމެރިކާާގެ އެލަސްކާގަ އެވެ. އެއީ 2022 ވަނަ އަހަރު ޔުކްރެއިން ހަނގުރާމަ ފެށުނު ފަހުންް، ޕުޓިން އެ ފަދަ ޒިޔާރަތެއް ކުރެއްވި ފުރަތަމަ ފަހަރެވެ. އެ ސަމިޓުގައި ހަނގުރާމަ ހުއްޓާލުމަށް އެއްބަސްވުމަކަށް އާދެވޭނެ ކަމަށް ބެލެވުނު ނަމަވެސް، އެ ފަދަ އެއްބަސްވުމަކަށް އާދެވިފައި ނުވެ އެވެ.

ދެ ވަނަ ސަމިޓެއް ބާއްވާ ވާހަކަ ދެކެވުމާ އެކު، ޕުޓިން ވަނީ ހަންގޭރީގެ ބޮޑު ވަޒީރު ވިކްޓާ އޯބަންއާ ފޯނުން ގުޅުއްވައި މަޝްވަރާ ކުރައްވައިފަ އެވެ. އެ މަޝްވަރާ ތަކުގައި، ސަމިޓު ބާއްވަން ހަންގޭރީ އިން ތައްޔާރަށް އޮތް ކަމަށް އޯބަން ވިދާޅުވެފައިވާ ކަމަށް، ރަޝިޔާގެ ރިޔާސީ ގަނޑުވަރު ކްރެމްލިން އިން ވަނީ ހާމަކޮށްފަ އެވެ.

ނަަމަވެސް، އޭރު ކްރެމްލިން އިން ވެސް ބުނެފައި ވަނީ ދެ ވަނަ ސަމިޓެއް ބޭއްވުމުގެ ކުރިން ބައެއް އެހެން ކަހަލަ ކަންކަން ހަމަޖައްސަން ޖެހޭނެ ކަމަށެވެ. އެގޮތުން މަޝްވަރާ ތަކުގައި ވާހަކަ ދައްކާނެ ޓީމެއް ކަނޑައެޅުމާ އެކު، ފަހަރަކު ކަމެއް ހަމަޖައްސަން ޖެހޭ ކަމަށް ކްރެމްލިން އިން ހާމަ ކޮށްފައިވެ އެވެ.