ޓްރަމްޕް އާއި ޕުޓިން، އަވަސް މުސްތަޤުބަލެއްގައި ބައްދަލު ނުކުރައްވާނެ ކަމަށް އިސް އޮފިޝަލަކު ބުނެފި

އެމެރިކާގެ ރައީސް ޑޮނަލްޑް ޓްރަމްޕް އާއި، ރަޝިޔާގެ ރައީސް ވުލަޑިމިއަރ ޕުޓިން ކުރިއަށް އޮތް ދުވަސް ތަކުގެ ތެރޭގައި ބައްދަލު ކުރައްވާނެ ކަމަށް ޓްރަމްޕް ވިދާޅުވެފައި ވީ ނަމަވެސް، އަވަސް މުސްތަޤުބަލެއްގައި އެފަދަ ބައްދަލުވުމެއް ނޯންނާނެ ކަމަށް އެމެރިކާގެ އިސް އޮފިޝަލަކު ބުނެފި އެވެ.

ޓްރަމްޕް އިއުލާން ކުރައްވާފައި ވަނީ، ކުރިއަށް އޮތް ދެ ހަފުތާއެއްހާ ދުވަހުގެ ތެރޭގައި ޕުޓިންއާ އެކު ދެ ވަނަ ސަމިޓެއް އޮންނާނެ ކަަމަށެވެ. އެ ފަދަ ސަމިޓަކަށް ޕުޓިން ވެސް ހުންނެވީ ތައްޔާރަށް ކަމަށް ރަޝިޔާ އިން ވެސް އޮތީ ހާމަ ކޮށްފަ އެވެ. ޓްރަމްޕް އާއި ޕުޓިންގެ ދެ ވަނަ ސަމިޓު ބާއްވަން މަސައްކަތް ކުރަމުން އަންނަ ކަމަށް ބުނެފައި އޮތީ، ހަންގޭރީގެ ވެރި ރަށް ބުޑަޕެސްޓުގަ އެވެ.

ޓްރަމްޕް އާއި ޕުޓިންގެ ދެ ވަނަ ސަމިޓުގެ ބައްދަލުވުމާ ގުޅޭ ގޮތުން، އެމެރިކާގެ ސެކްރެޓަރީ އޮފް ސްޓޭޓް މާކޯ ރޫބިއޯ އާއި، ރަޝިޔާގެ ފޮރިން މިނިސްޓަރު ސާގޭ ލަވްރޮވް ވަނީ ހޯމަ ދުވަހު މަޝްވަރާ ކުރައްވައިފަ އެވެ. ފޯނުން ގުޅުއްވައިގެން ދެ ބޭފުޅުން މަޝްވަރާ ކުރައްވާފައި ވަނީ ދެ ވަނަ ސަމިޓުގެ ކުރިން ބައެއް ކަންކަން ފަހި ކުރުމަށެވެ.

އެހެން ނަމަވެސް، އެމެރިކާ ސަރުކާރުގެ އިސް އޮފިޝަަލަކާ ހަވާލާދީ މީޑިއާ ތަކުގައި ބުނެފައި ވަނީ، މިވަގުތު އެ ފަދަ ބައްދަލުވުމެއް ބޭއްވުމުގެ ބޭނުމެއް ނެތް ކަމަށެވެ. އަދި ޓްރަމްޕް އާއި ޕުޓިން ކުރިއަށް އޮތް ދެ ހަފުތާގެ ތެރޭގައި ބައްދަލު ނުކުރައްވާނެ ކަމަށް ވެސް ބުނެފައިވެ އެވެ.

އޭގެ ފަހުން، ރަޝިޔާގެ ރިޔާސީ ގަނޑުވަރު ކްރެމްލިން އިން ބުރާސްފަތި ދުވަހު ބުނެފައި ވަނީ، ޓްރަމްޕް އާއި ޕުޓިންގެ ދެ ވަނަ ސަމިޓު ބާއްވާނެ ސީދާ ވަކި ތާރީޚެއް މިހާތަނަށް ކަނޑައެޅިފައި ނުވާ ކަމަށެވެ. އެކަމާ ގުޅޭ ގޮތުން ކްރެމްލިން އިން އިތުރު އެއްޗެއް ބުނެފައި ނުވެ އެވެ.

މިދިޔަ ހަފުތާގެ ބުރާސްފަތި ދުވަހު ޓްރަމްޕް އާއި ޕުޓިން ވަނީ ފޯނުން ގުޅުއްވައިގެން މަޝްވަރާ ކުރުންތައް ކުރިއަށް ގެންގޮސްފަ އެވެ. އޭގެ އެއް ދުވަސް ފަހުން، ހުކުރު ދުވަހު ޓްރަމްޕް ވަނީ ޔުކްރެއިންގެ ރައީސް ވުލޮޑިމިއަރ ޒެލެންސްކީއާ ބައްދަލު ކުރައްވައިފަ އެވެ. އެމެރިކާގެ ރިޔާސީ ގަނޑުވަރު، ވައިޓް ހައުސްގައި ކުރިއަށް ދިޔަ އެ ބައްދަލުވުމުގައި ވަނީ ރަޝިޔާ-ޔުކްރެއިން ހަނގުރާމައާ ގުޅޭ ގޮތުން މަޝްވަރާ ކުރައްވައިފަ އެވެ.

މިއަހަރުގެ އޯގަސްޓު މަހު ވަނީ ޓްރަމްޕް އާއި ޕުޓިންގެ ސަމިޓުގެ ފުރަތަމަ ބައްދަލުވުން ކުރިއަށް ގެންގޮސްފަ އެވެ. އެ ސަމިޓު ކުރިއަށް ގެންގޮސްފައި ވަނީ އެމެރިކާާގެ އެލަސްކާގަ އެވެ. އެއީ 2022 ވަނަ އަހަރު ޔުކްރެއިން ހަނގުރާމަ ފެށުނު ފަހުންް، ޕުޓިން އެ ފަދަ ޒިޔާރަތެއް ކުރެއްވި ފުރަތަމަ ފަހަރެވެ. އެ ސަމިޓުގައި ހަނގުރާމަ ހުއްޓާލުމަށް އެއްބަސްވުމަކަށް އާދެވޭނެ ކަމަށް ބެލެވުނު ނަމަވެސް، އެ ފަދަ އެއްބަސްވުމަކަށް އާދެވިފައި ނުވެ އެވެ.

ޓްރަމްޕް އާއި ޕުޓިން އަކީ އަބަދު ވެސް ވަރަށް ގާތް ގުޅުމެއް އޮންނަ ދެ ރައީސުންނެވެ. އެމެރިކާގެ ރިޔާސީ އިންތިޚާބުގެ ތެރޭގައި ވެސް ޓްރަމްޕް ވަނީ، އޭނާ އާއި ޕުޓިންއާ ދެމެދު ގާތް ގުޅުމެއް އޮންނަ ކަމަށް ވިދާޅުވެފަ އެވެ. އަދި ވެރިކަމަށް ވަޑައިގެންނެވުމާ އެކު، ރަޝިޔާ-ޔުކްރެއިން ހަނގުރާމަ ނިމުމަކަށް ގެންނަވާނެ ކަމަށް ވެސް ޓްރަމްޕް ވިދާޅުވެފައިވެ އެވެ.

އެހެން ނަމަވެސް، ދޭތެރެއިން ޓްރަމްޕް ގެންދަވަނީ ޕުޓިން އަށް ވަރަށް ބޮޑަށް ފާޑު ވިދާޅުވެ ވާހަކަ ވެސް ދައްކަވަމުންނެވެ. ޚާއްސަކޮށް ހަނގުރާމަ ހުއްޓާލުމަށް ޕުޓިން އެއްބަސްވެ ވަޑައި ނުގަންނަވާތީ، ޓްރަމްޕް ވަނީ އެކި ފަހަރު މަތިން ޕުޓިން އަށް ރުޅިވެރިކަން ރައްދު ކުރައްވައި، ވާހަކަ ދައްކަވައިފަ އެވެ. ޓްރަމްޕް ގެންދަވަނީ ރަޝިޔާ-ޔުކްރެއިން ހަނގުރާމަ ނިންމުމަށް ވަރަށް ބޮޑަށް ބާރު އަޅުއްވަމުންނެވެ.