'ލަވް ރިވަރ ހައުސް' މިއީ ކިހިނެއް ވާ ތަނެއް؟

ލަވަ ކިއުމާއި ހުނުމުގެ އިތުރުން، އެކެއްގެ ހަށިގަނޑުގައި އަޅަމުން ދާ ވޭން، އަނެކާ ހިއްސާ ކުރުމަކީ، 'ލަވް ރިވަރ ހައުސް'ގައި ތިބި ކެންސަރު ބަލީގެ މީހުން، އެމީހުންގެ ހިތްތަކަށް ތަސައްލީއެއް ހޯދުމަށް ކުރަމުންދާ ކަންކަމެވެ. މި ގެއަކީ ކެންސަރު ބަލީގެ މީހުންނަށް ބޭނުންވާ އަރާމާއި، އެމީހުންނަށް ބޭނުންވާ އަރާމާއި، އެއްބާރުލުމާއި އެހީތެރިކަން ކަށަވަރު ކޮށްދިނުމަށް، ހިލޭ އެހީދޭ އުސޫލުން ނުވަތަ ޗެރިޓީ އުސޫލުން މިޞްރުގައި ހިންގާ ގެއެކެވެ.

'ލަވް ރިވަރ ހައުސް'ގެ މޭސްތިރިންނަކީ، މަސައްކަތުގެ މައިދާނުން މުސްކުޅިވެ، ހަވާސާވެލައިގެން ތިބި 3 އަންހެނުންނެވެ. ކެންސަރ ބަލި ތަޙައްމަލު ކުރަމުންދާ އަންހެނުންނަށް ހާއްސަކޮށްގެން 'ލަވް ރިވަރ ހައުސް' ހިންގަން ފެށީ 2010 ވަނަ އަހަރުއެވެ. އޭގެ ފަހުން އެ ޚިދުމަތް ފުޅާކޮށް، ކެންސަރު ބަލީގައި އުޅޭ ފިރިހެނުންނަށް ހާއްސަކޮށްގެން އިތުރު ގެއެއް ހުޅުވީ 2015 ވަނަ އަހަރުގެ ތެރޭގައެވެ.

މި 2 ގޭގައި އެވަރޭޖުކޮށް 20 އަންހެނުންނާއި 15 ފިރިހެނުން ދިރިއުޅެއެވެ. މި ގޭގެ ހަމައެކަނި މަޤްޞަދަކީ ބޯހިޔާވަހިކަން ފޯރުކޮށްދިނުމެއް ނޫނެވެ. ސަޕޯރޓް ގުރޫޕު ނުވަތަ، އެކެއްގެ ކިބައިން އަނެކާއަށް ހިތްވަރު ހޯދާ ދިނުމުގެ ކަންކަންވެސް މި ގޭގައި ކުރިއަށް ދެއެވެ.

'ލަވް ރިވަރ ހައުސް'ގެ ކޯފައުންޑަރެއް ކަމަށްވާ އަބްލާ ޢަބްދުއްރަޙްމާން ސަރްހާން ބުނީ، އެ ގޭގައި ދިރިއުޅޭ މީހުން އެކުގައި ބޭރަށް ގޮސް، އުފާވެރި ވަޤުތުތައް ހޭދަ ކުރާ ކަމަށާ، ގޭގައި ދިރިއުޅޭ ފަރާތްތަކުގެ އުފަލަށްޓަކައި، ޗެރިޓީއިންވެސް މަސައްކަތްތަކެއް ކޮށްދޭ ކަމަށެވެ.

'ލަވް ރިވަރ ހައުސް'ގެ މެހެމާނުންގެ ތެރޭގައި މުޅި މިޞްރުގެ އެކި ހިސާބުތަކަށް ނިސްބަތްވާ މީހުން ހިމެނެއެވެ. އޭގެ އިތުރުން ސޫދާންއާއި ޔަމަނު މީހުންވެސް އެތަނުގައި ދިރިއުޅުނެވެ. ފަރުވާގެ ކަންކަމަށް ހޮސްޕިޓަލަށް ކުރަން ޖެހޭ ދަތުރުތަކާއި، ކެއިންބުއިމުގެ ކަންކަމުގެ އިތުރުން ބޭސްފަރުވާގެ ކަންކަންވެސް ހަމަޖައްސަނީ ޗެރިޓީގެ ފަރާތުންނެވެ.

ފަރުވާއަށް އައިސް އިން ޚައިރިއްޔާ އުވައިސްއަށް، 'ލަވް ރިވަރ ހައުސް'ގެ ސަބަބުން ބޮޑު ހިތްހަމަޖެހުމެއް ލިއްބައިދެއެވެ.

މި ޗެރިޓީގެ ހުރިހާ ޚަރަދުތަކެއްވެސް ފޫބައްދަނީ، ހެޔޮ އެދޭ ފަރާތްތަކުން ދޭ އެހީއިންނެވެ. 'ލަވް ރިވަރ ހައުސް'ގެ 3 ފައުންޑަރުންގެވެސް ޢުއްމީދަކީ މާލީ ގޮތުން އަދި އިތުރު އެހީތައް ލިބުމެވެ. 2 ގެ، އެއް އިމާރާތަކަށް ބަދަލުކޮށް، ވީހާވެސް ގިނަ މީހުންނަށް ޚިދުމަތް ދެވޭނެ ގޮތް ވުމެވެ.