ތ. ތިމަރަފުށީގައި ތަރައްގީކުރާ ހޮސްޕިޓަލުގެ މަސައްކަތް މަޑުޖެހިފައި އޮތްއޮތުން ނިމުމަކަށް ގެނެސް، ފުރިހަމަ ހޮސްޕިޓަލެއް ތަރައްގީކޮށްދެއްވާނެކަމުގެ ޔަގީންކަން ރައީސުލްޖުމްހޫރިއްޔާ ޑރ.މުހައްމަދު މުއިއްޒު ދެއްވައިފިއެވެ.

ރައީސް މުއިއްޒު މިޔަގީންކަން ދެއްވީ ހުކުރު ދުވަހު ތިމަރަފުއްޓަށް ވަޑައިގެން، ރަށުގެ ރައްޔިތުންނާ ބައްދަލުކުރައްވައި، ވާހަކަފުޅުދައްކަވަމުންނެވެ.

ރައީސް މުއިއްޒު ވިދާޅުވީ ތިމަރަފުށީގައި ތަރައްގީކުރާ ހޮސްޕިޓަލުގެ މަސައްކަތް މަޑުޖެހިފައި އޮތްއޮތުން ނިމުމަކަށް ގެނެސް، ހުރިހާ ކަމެއް ފުރިހަމަވެފައިވާ ހޮސްޕިޓަލެއް، ބާރު ދުވެލީގައި ތަރައްގީ ކޮށްދެއްވާނެ ކަމަށެވެ. އަދި ހޮސްޕިޓަލުގެ މަސައްކަތް ނިމުމުގެ ކުރިންވެސް، ރަށުގެ ސިއްހީ ނިޒާމަށް ތަރައްގީ ބޭނުންވާކަން ފާހަގަކުރައްވައި، ރައީސް ވިދާޅުވީ، ސިއްހީ މަރުކަޒުތަކުގެ އެންމެ މަތީ ފެންވަރުކަމުގައިވާ ލެވަލް 4 ގެ ސިއްހީ މަރުކަޒަކަށް ތިމަރަފުށީ ސިއްހީ މރުކަޒު ބަދަލުކުރުމަށް ކުރަންޖެހޭ ހުރިހާ މަސައްކަތެއް، 3 މަސްދުވަހުގެ ތެރޭގައި ނިންމަވައިދެއްވާނެ ކަމަށެވެ.

ތިމަރަފުށީގެ އާންމު އުމްރާނީ ތަރައްގީގެ ދާއިރާއަށް އަލިއަޅުއްވާލައްވައި ވާހަކަފުޅުކުރިއަށްގެންދަވަމުން ރައީސް ވަނީ، ރަށުގެ ބަނދަރު އަޕްގްރޭޑްކުރުމުގެ މަޝްރޫއުގެ ތެރެއިން ބަނދަރު ބޮޑުކުރެވިގެންދާނެ ކަމަށާ، މިކަމުގެ ސަބަބުން އެތައް ކަމަކަށް ކުރިއެރުން ލިބިގެންދާނެކަމުގައި ވިދާޅުވެފައެވެ. އަދި ޒަމާނީ ފެންވަރަށް މަގުތައް ތަރައްގީކުރުމުގެ މަޝްރޫއު ނިމިގެންދިއުމުން ރައްޔިތުންނަށް އެތައް ފަސޭހައެއް ލިބޭނެކަން އެމަނިކުފާނު ފާހަގަކުރެއްވިއެވެ.

ގެދޮރުވެރިކަމުގެ ދާއިރާއިންވެސް ތިމަރަފުށީގައި މަސައްކަތްތަކެއް ކުރިއަށްގެންގޮސްދެއްވާނެކަމުގައި ރައީސް ވިދާޅުވިއެވެ. އެގޮތުން މިހާރު ނިމިފައިވާ ހައުސިންގް ޔުނިޓްތަކަށް ފެނާއި، ކަރަންޓު އަދި ނަރުދަމާގެ ޚިދުމަތް ފޯރުކޮށްދިނުމުގެ މަސައްކަތް ދާދި އަވަހަށް ކުރިއަށްގެންގޮސް ނިންމަވައިދެއްވައި، އަންނަ ރަމަޟާން މަހުގެ ކުރިން އެ ޔުނިޓްތަކަށް ވަދެވޭނެ ކަމުގައި އެމަނިކުފާނު ވިދާޅުވިއެވެ.

ސަރުކާރުން ތަރައްގީކުރައްވާ ހައުސިންގް ޔުނިޓްތަކަށް ދައްކަންޖެހޭ ކުލީގެ އަގު ހެޔޮކޮށްދެއްވާފައިވާއިރު، ޑައުންޕޭމަންޓްގެ ގޮތުގައި ދައްކަންޖެހޭ ފައިސާގެ މިންވަރު، 10،000 ރުފިޔާއަށް ކުޑަކޮށްދެއްވާނެކަމުގައިވެސް ރައީސް ވަނީ ވިދާޅުވެފައެވެ. އަދި 2026 ވަނަ އަހަރުގެ ބަޖެޓުގައި ހިމަނުއްވައިގެން އިތުރު 100 ހައުސިންގ ޔުނިޓްގެ މަސައްކަތް ކުރިއަށްގެންގޮސްދެއްވާނެކަމުގައިވެސް އެމަނިކުފާނު ވަނީ އިއުލާންކުރައްވާފައެވެ.

ހަމަމިއާއެކު ކުޅިވަރުގެ ދާއިރާއިންވެސް ތިމަރަފުއްޓަށް ތަރައްގީ ގެނެސްދެއްވާނެކަމުގެ ޔަގީންކަން، ރައީސް ވަނީ ދެއްވާފައެވެ. އެގޮތުން ފުޓުބޯޅަ ދަނޑު ތަރައްގީކޮށްދެއްވައި، ފިޓްނަސް އެންޑް ރިކްރިއޭޝަން ސެންޓަރ ހެދުމަށް ހަމަޖެހިފައިވާ ބަޖެޓުގެ ތެރެއިން، ރަށުގައި މިހާރު ހުރި ޒުވާނުންގެ މަރުކަޒު ތަރައްގީކޮށްދެއްވާނެކަމުގައި ރައީސް ވަނީ ވިދާޅުވެފައެވެ.

ރަށުގެ ތަރައްގީއަށްޓަކައި އަދިވެސް ގިނަ ކަންތައްތަކެއް ކުރަން އެބަހުރިކަމަށާ، އެގޮތުން އައިޑީ ކާޑާއި ޕާސްޕޯޓްގެ ޚިދުމަތް ރަށުގައި ތިބެގެން ލިބޭނެ އިންތިޒާމު، އަންނަ ނޮވެމްބަރުމަހުގެ ތެރޭގައި ހަމަޖެހިގެންދާނެކަމުގައިވެސް ރައީސް ވިދާޅުވިއެވެ. އަދި ކުނިމެނޭޖު ކުރުމުގެ މަސައްކަތް، ވެމްކޯއާ ހަވާލުކުރެވިފައިވާކަންވެސް އެމަނިކުފާނު ފާހަގަކުރެއްވިއެވެ.

ތިމަރަފުށީގެ ތަރައްގީއަށް ގިނަ މަސައްކަތްތަކެއް ކޮށްދެއްވާނެ ކަމަށް ރައީސް މުއިއްޒު ވިދާޅުވިއިރު، 7 ފެބްރުއަރީ 2024 ގައި ވެސް އެރަށަށް ވަޑައިގަންނަވައި، ހޮސްޕިޓަލްގެ މަޝްރޫއު އަވަސް ކޮށްދެއްވާނެ ކަމާއި، ނިމިފައިހުރި ހައުސިންގ ޔުނިޓްތައް ހުންނަ ސަރަހައްދުގައި އަސާސީ ޚިދުމަތް ލިބޭނެ މަގުފަހި ކޮށްދެއްވާނެ ކަމަށް ވިދާޅުވެފައިވެއެވެ.

ނަމަވެސް އަހަރަކަށްވުރެ ގިނަ ދުވަސްވެގެންދިޔައިރު މިމަސައްކަތްތައް ކުރެވިފައިނުވެއެވެ.