ރަސްމާލެ ހިއްކަން ދެ ބިލިއަނަށް ވުރެ ގިނަ ފައިސާ ޗާޕު ކުރަނީ
ރައީސް މުއިއްޒު ފައިސާ ޗާޕް ނުކުރައްވާނެ ކަމަށް ވަޢުދުވެވަޑައިގެންނެވި ނަމަވެސް، ދެ ބިލިއަނަށްވުރެ ގިނަ ރުފިޔާ ޗާޕްކޮށް އެ ފައިސާ ޕެންޝަން ފަންޑުގައި އިންވެސްޓް ކުރުމަށް ފަހު ރަސްމާލެ ހިއްކުމަށް އެ ފައިސާ ބޭނުން ކުރަން ސަރުކާރުން ނިންމާފައިވާ ކަމަށް ވަރަށް އިތުބާރުހުރި މަޢުލޫމާތެއް ލިބިއްޖެ. ނަމަވެސް މިއީ ސަރުކާރުގެ އެއްވެސް ފަރާތަކުން އަދި އެމްއެމްއޭ އިން ކަށަވަރުކޮށްދީފައިވާ މަޢުލޫމާތެއް ނޫނެވެ.
މޯލްޑިވްސް މަނިޓަރީ އޮތޯރިޓީގެ ގަވަރުނަރުގެ މަގާމަށް އަހުމަދު މުނައްވަރު އައްޔަން ކުރައްވަނީ (ފައިލް)
ރަސްމާލެ ހިއްކަން ދެ ބިލިއަނަށް ވުރެ ގިނަ ރުފިޔާ ޗާފު ކުރަން ނިންމާފައިވާ ކަމަށް އިތުބާރު ހުރި ފަރާތަކުން މައުލޫމާތު ލިބިއްޖެއެވެ.
ނަން ނުޖެހުމަށް ޝަރުތު ކޮށް އެ ފަރާތުން ބުނީ މި ފައިސާ އެމްއެމްއޭ އިން ޗާފު ކުރުމަށްފަހު ވިސްނާފައިވަނީ ޕެންޝަން ފަންޑުގައި އިސްވެސްޓް ކުރުމަށެވެ.
އެ ގޮތުން ޕެންޝަން ފަންޑަށް ފައިސާ ވަނުމުން، އެ ފައިސާ ބޭނުން ކޮށްގެން ފިނޭންސް މިނިސްޓްރީ އިން ޕެންޝަން ފަންޑުން ޓީ-ބިލު ގަންނާނެ ކަމަށާއި، އެގޮތުން ޗާޕް ކުރި ފައިސާ ސަރުކާރުގެ ބޭނުމަށް ލިބޭނެ މަގު ތަނަވަސްވާނެ ކަަމަށް ވެސް އެފަރާތުން ބުނެފައިވެއެވެ.
މިކަން ސަރުކާރުގެ އެއްވެސް ފަރާތަކުން އަދި އެމްއެމްއޭ އިން ކަށަވަރު ކުރެވޭ ގޮތެއް ނުވެއެވެ.
އަނެއްކޮޅުން މި އަހަރުގެ މިނިވަން ދުވަހުގެ ރަސްމީ ޖަލްސާ ގައި ރައީސް މުއިއްޒު ވާހަކަ ދައްކަވަމުން ވިދާޅުވީ ސަރުކާރުގެ އިގްތިސާދީ އެޖެންޑާ ތަންފީޒު ކުރަމުން ގެންދާނީ ފައިސާ ޗާޕު ނުކޮށް ކަމުގައެވެ.
އޭގެ އިތުރުން ވެރިކަމަށް ވަޑައިގަތުމުގެ ކުރިން ކެމްޕޭނުގައި ވާހަކަ ދައްކަވަމުން ސަރުކާރުން ބޭނުންވާ ކަންކަން ކުރެވޭ ވަރަށް ދައުލަތައް ފައިސާ ވަންނަމުންދާ ކަމަށް ވެސް މުއިއްޒު ވަނީ ވިދާޅުވެފައެވެ. އޭގެ އިތުރުން ލޯނުތައް ދެއްކޭ ވަރަށް ފައިސާ ހަމަ ޖެހިފައިވާ ކަމަށާއި އެކި ދިމަދިމާލުން ބޮޑެތި ލޯނުތައް ރީފައިނޭންސް ކުރެވޭނެ ގޮތުގެ ފެހި ސިގްނަލް ލިބިފައިވާ ކަމަށްވެސް ވަނީ ވިދާޅުވެފައެވެ.
