އިތުރު އިސްލާހުތަކާއި އެކު ފިސްކަލް ޒިންމާގެ ޤާނޫނަށް އިސްލާހު ގެނައުމުގެ ބިލު ކޮމިޓީ އިން ފާސްކޮށްފި

އިތުރު އިސްލާހުތަކާއި އެކު ފިސްކަލް ޒިންމާގެ ޤާނޫނު މާލިއްޔަތު ކޮމިޓީ އިން ފާސްކޮށްފި އެވެ.

ކޮމިޓީ އިން ހުށަހަޅާފައިވާ ކަންކަމަށް ބަލާ އިރު ޤާނޫނުގެ 39 ވަނަ މާއްދާގެ (ރ) އުނިކުރުމަށް ވަނީ ހިމަނާފަ އެވެ.

ޤާނޫނުގައި 39 ވަނަ މާއްދާ އޮތް ގޮތަކީ، އެ ޤާނޫނުގެ 17 ވަނަ މާއްދާގެ (ހ)ގައި އެފަދައިން ބަޔާންކޮށްފައި ވީ ނަމަވެސް މި ޤާނޫނުގެ ދަށުން އެކުލަވާލާފައިވާ ފުރަތަމަ ފިސްކަލް ޒިންމާގެ ޗާޓަރ އެކުލަވާލުމަށް ފަހު މި ޤާނޫނަށް އަމަލުކުރަން ފަށާއިރު ހިނގަމުންދާ ރިޔާސީ ދައުރު ހަމަވުމުގެ 2 އަހަރު ކުރިން އެ ޗާޓަރ އެ ޤާނޫނުގެ 17 ވަނަ މާއްދާގެ އިޖުރާއަތުތަކާއި އެއްގޮތްވާ ގޮތުގެ މަތިން އިސްލާހުކޮށް އަޕްޑޭޓް ކުރެވިދާނެ ކަމަށެވެ. މާލިއްޔަތު ކޮމިޓީ އިން ހުށަހަޅާފައިވާ އިސްލާހަކީ އެ މާއްދާ އުނިކުރުމެވެ.

އެ އިސްލާހު ގެންނަން ނިންމާފައިވާ ސަބަބެއް ކަަމަށް މާލިއްޔަތު ކޮމިޓީ އިން ބުނެފައި ވަނީ ފިސްކަލް ޒިންމާގެ ޗާޓަރ އެކުލަވާލާ އެ ޗާޓަރ ފާސްކޮށް ޝާއިއު ކުރަން ޖެހޭ މުއްދަތު އިތުރު ކުރުމުން، އަލުން ފިސްކަލް ޒިންމާގެ ޗާޓަރަށް އަމަލުކުރަން ފަށާ އިރު، ހިނގަމުންދާ ރިޔާސީ ދައުރުގައި އެ މާއްދާގައި ބަޔާންކުރާ ދެ އަހަރު ދުވަހުގެ މުއްދަތު ނެތުމެވެ.

އެ އިސްލާހު ފާސްކުރީ ހޮނިހިރު ދުވަހު މާލިއްޔަތު ކޮމިޓީ އަށް ހާޒިރުވި މެމްބަރުންގެ އިއްތިފާގުންނެވެ.

ކޮމިޓީ އިން ބުނީ ބިލު ދިރާސާކުރުމުގައި ކަމާއި ގުޅުން ހުރި އިދާރާތަކުގެ ބަހަށް ރިއާޔަތްކޮށްފައި ވާނެ ކަމަށެވެ. އެ ބިލަށް ޚިޔާލު ހޯދުމަށް މޯލްޑިވްސް މަނިޓަރީ އޮތޯރިޓީ އާއި ފިނޭންސް މިނިސްޓްރީގެ އިތުރުން އޮޑިޓަރ ޖެނެރަލްގެ އޮފީހުގެ ޚިޔާލު ހޯދާފައިވެ އެވެ.

ފިސްކަލް ޒިންމާގެ ޤާނޫނުގެ ދަށުން އެކުލަވާލަން ޖެހޭ، މާލީ ޒިންމާގެ ޗާޓަރު އެކުލަވާލަން ޖެހޭ މުއްދަތު މަވާން ކުޑަތަން ވެފައި ވަނިކޮށް، އެ ޗާޓަރު އެކުލަވާލުން 2 އަހަރަށް ފަސްކުރުމަށް ހުށަހެޅީ ނިމިދިޔަ ހަފްތާގެ ތެރޭގަ އެވެ.

ފިސްކަލް ޒިންމާގެ ޤާނޫނަކީ މިދިޔަ ޑިސެމްބަރު މަހު ތަސްދީގު ކުރި ޤާނޫނެކެވެ. އެ ޤާނޫނަށް އަމަލުކުރަން ފެށީ ޖޫން މަހު އެވެ. އެ ގާނޫނުގައި ބުނާ ގޮތުން ފިސްކަލް ޒިންމާގެ ގާނޫނަށް އަމަލުކުރަން ފަށާތާ ހަ މަސްދުވަހުގެ ތެރޭގައި ފިސްކަލް ޒިންމާގެ ޗާޓަރު އެކުލަވާލަން ޖެހޭނެ އެވެ. އެހެންނަމަވެސް އެކަމާއި ގުޅިގެން ކުރަން ޖެހޭ ކަންކަން ސަރުކާރުން މިހާތަނަށް ފުރިހަމަކޮށްފަ އެއް ނުވެ އެވެ.

ހުރާ ދާއިރާގެ މެންބަރު ޑރ. އަނާރާ ނައީމް އިސްލާހު ހުށަހަޅުއްވާފައި ވަނީ ދައުލަތުގެ ފިސްކަލް ޒިންމާގެ ގާނޫނުގެ ދަށުން އެކުލަވާލަން ޖެހޭ ފިސްކަލް ޒިންމާގެ ޗާޓަރު އެކުލަވާލުމަށް ގާނޫނުގައި ކަނޑައަޅާފައިވާ މުއްދަތު އިތުރުކުރުމަށެވެ. އެ ޤާނޫނަށް ހުށަހަޅާފައިިވާ އިސްލާހަކީ ޤާނޫނުގެ 39 ވަނަ މާއްދާގެ ދަށުން އެކުލަވާލަން ޖެހޭ ފިސްކަލް ޒިންމާގެ ޗާޓަރު އެކުލަވާލުމާއި، އެއަށް އަމަލުކުރަން ޖެހޭ މުއްދަތު ވެސް ދިގުދަންމާލުމެވެ. އިސްލާހު ހުށަހަޅާފައި ވަނީ ފިސްކަލް ޒިންމާގެ ޗާޓަރު އެކުލަވާލުމުގެ މުއްދަތު ދެ އަހަރަށް އިތުރުކުރުމަށެވެ. އެހެންކަމުން ދެން އެ ޗާޓަރު އެކުލަވާލަން ޖެހޭނީ 3 ޑިސެމްބަރު 2026ގަ އެވެ.