ފައިސާ ޗާޕުކުރަން އުޅޭ މައްސަލައިގައި ޕެންޝަން ބޯޑަށް މި ސަރުކާރުން އައްޔަނު ކޮށްފައި ހުރި މެންބަރަކު އިސްތިއުފާ ދީފި
އަޝްރަފް އިސްތިއުފާ ދެއްވީ ފައިސާ ޗާޕުކުރުމުގެ މައްސަލައިގައި ޕެންޝަން ބޯޑުގެ މެންބަރުންގެ މެދުގައި ހިޔާލު ތަފާތުވެފައި ވަނިކޮށް
ޕެންޝަން ބޯޑުގައި ފިނޭންސް މިނިސްޓްރީ ތަމްސީލު ކުރެއްވި އަޝްރަފް ރަޝީދު
ފައިސާ ޗާޕުކުރަން އުޅޭ މައްސަލައިގައި ޕެންޝަން އޮފީހުގެ ބޯޑުގެ އިތުރު މެންބަރަކު އިސްތިއުފާ ދީފި އެވެ.
އިސްތިއުފާ ދެއްވީ އެ ބޯޑުގައި ފިނޭންސް މިނިސްޓްރީ ތަމްސީލު ކުރާ އަޝްރަފް ރަޝީދެވެ. އޭނާ އެ މަގާމަށް އައްޔަން ކުރީ މި ސަރުކާރުން 2024 ވަނަ އަހަރުގެ ޖޫން މަހުގެ 2 ވަނަ ދުވަހު އެވެ. މީގެ އިތުރުން އޭނާ އަކީ ފިނޭންސް މިނިސްޓްރީގެ ލީގަލް ޑިޕާޓްމަންޓުގެ އެންމެ އިސް ވެރިޔާ އެވެ.
އަޝްރަފް މަގާމުން އިސްތިއުފާ ދެއްކި އިރު ފައިސާ ޗާޕުކުރުމުގެ މައްސަލައިގައި ޕެންޝަން ބޯޑުގެ މެންބަރުންގެ މެދުގައި އޮތީ ހިޔާލު ތަފާތުވުން އުފެދިފަ އެވެ. އަދި އަޝްރަފް އެ ބޯޑުން އިސްތިއުފާ ދެއްވީ ވެސް ފައިސާ ޗާޕްކުރުމުގެ ވާހަކަތެއް ބައްދަލުވުމެއް ބާއްވާ ދެކެވިފައިވަނިކޮށެވެ.
އަޝްރަފް އިސްތިއުފާ ދެއްވިކަން ޕެންޝަން އޮފީހުން ހާމަ ނުކުރި ނަމަވެސް، އެ އޮފީހުގެ ވެބްސައިޓުގައި ކުރީގެ ބޯޑު މެންބަރުންގެ ލިސްޓުގެ އެންމެ ފަހު ނަމެއްގެ ގޮތުގައި ވަނީ އޭނާގެ ނަން ހިމަނާފަ އެވެ. އެގޮތުން އޭނާ ބޯޑުގައި 2 ޖޫން 2024 އިން 10 ޑިސެމްބަރު 2025 އަށް މަސައްކަތް ކުރިކަމަށް ވަނީ ހިމަނާފަ އެވެ.
އަޝްރަފް އިސްތިއުފާ ދެއްވި އިރު އެ އޮފީހުގެ ޗީފް ފައިނޭންޝިއަލް އޮފިސަރު ހައްވާ ފަޖުވާ އެ މަގާމުން އިސްތިއުފާ ދެއްވާފައިވެ އެވެ. ފަޖުވާގެ އިސްތިއުފާއާއި ގުޅޭ ގޮތުން އޭނާ ވިދާޅުވެފައިވަނީ މަގާމުން އިސްތިއުފާ ދެއްވަން ނިންމެވީ ވަރަށް ފުންކޮށް އެކަމާމެދު ވިސްނެވުމަށް ފަހު ކަމަށެވެ. ނަމަވެސް އިސްތިއުފާ ދެއްވި ސަބަބެއް ހާމަކޮށްފައެއް ނުވެ އެވެ.
މީގެ އިތުރުން އޮކްޓޯބަރު 22، ގައި ޕެންޝަން އޮފީހުގެ ބޯޑުން އަހުމަދު ސަރުވަޝް އާދަމް އިސްތިއުފާ ދެއްވި އެވެ. އޭނާގެ އިސްތިއުފާގެ ސިޓީގައި ވިދާޅުވެފައި ވަނީ ޕެންޝަން އޮފީސް މެދުވެރިކޮށް ފައިސާ ޗާޕު ކުރަން ސަރުކާރުން މަސައްކަތް ކުރަނީ ދައުލަތުގެ ފިސްކަލް ޒިންމާގެ ގާނޫނު ފޫއަޅުވާލައިގެން ކަމަށާއި އެކަމުގެ ސަބަބުން ރާއްޖޭގެ އިގުތިސޯދަށް އޮތް ނުރައްކާ ބޮޑު ކަމަށެވެ.
