ހަމާސް އިން އެއްބަސްވުމާ ޚިލާފު ވެއްޖެ ނަމަ، ހަނގުރާމަ ފެށުމަށް ހުއްދަ ދޭން ޓްރަމްޕް ވިސްނަވަނީ

އިސްރާއީލް އިން ޣައްޒާގައި ހިންގަމުން އައި ހަނގުރާމަ ހުއްޓާލުމަށް ވެފައިވާ އެއްބަސްވުމާ، ހަމާސް ޖަމާއަތުން ޚިޔާފު ވާ ނަމަ، އަލުން ހަނގުރާމަ ފެށުމުގެ ހުއްދަ ދޭން ވިސްނަވާނެ ކަމަށް އެމެރިކާގެ ރައީސް ޑޮނަލްޑް ޓްރަމްޕް ވިދާޅުވެއްޖެ އެވެ.

ސީއެންއެން އަށް ދެއްވި ފޯނު އިންޓަވިޔުގައި ޓްރަމްޕް ވިދާޅުވެފައި ވަނީ، ހަނގުރާމަ ހުއްޓާލުމަށް ވެފައިވާ އެއްބަސްވުމަށް ހަމާސް އިން އަމަލު ނުކުރާ ނަމަ، ޣައްޒާގައި އަލުން ހަނގުރާމަ ފެށުމުގެ ހުއްދަ އިސްރާއީލްގެ ސިފައިންނަށް ދީފާނެ ކަމަށެވެ.

ޓްރަމްޕްގެ ފަރާތުން ހުށަހަޅާފައިވާ އެއްބަސްވުމުގައި ހަމާސް ޖަމާއަތުން ހަތިޔާރު ދޫކޮށްލަން ޖެހޭނެ ކަމަށް ހިމަނާފައި ވީ ނަމަވެސް، ހަމާސް އިން ވަނީ އެކަމާ އިންކާރު ކޮށްފަ އެވެ. އެކަމާ ގުޅޭ ގޮތުން ސުވާލު ކުރުމުން ޓްރަމްޕް ވިދާޅުވެފައި ވަނީ، އެކަމާ މެދު އޭނާ ވިސްނަވާނެ ކަމަށެވެ.

އެކަން ފާހަގަ ކުރައްވައި ޓްރަމްޕް ވިދާޅުވީ، އޭނާ އަންގަވާ ގޮތަކަށް އިސްރާއީލް އިން އަމަލު ކުރާނެ ކަމަށެވެ. އަދި އިސްރާއީލް އަށް ހަމާސްގެ ހަތިޔާރުތައް ނައްތާލެވޭ ނަމަ، އިސްރާއީލް އިން އެކަން ކުރާނެ ކަމުގައި ވެސް ޓްރަމްޕް ވަނީ ވިދާޅުވެފަ އެވެ.

އިތުރަށް ވާހަކަ ދައްކަވަމުން ޓްރަމްޕް ވިދާޅުވެފައި ވަނީ އިސްރާއީލްގެ ސިފައިންނާއި، އެ ޤައުމުގެ ބޮޑު ވަޒީރު ބެންޖަމިން ނަތަންޔާހޫ "ހިފަހައްޓަން ޖެހުނު" ކަމަށެވެ. އަދި ވިދާޅުވީ ނަތަންޔާހޫއާ ގުޅިގެން އޭނާ އެކަން ކޮށްފައި ވާނެ ކަމަށެވެ. ސިޔާސީ މަޝްރަހު ދިރާސާ ކުރާ ފަރާތްތަކުން ބުނެފައިވާ ގޮތުގައި، ހަނގުރާމަ ހުއްޓާލުމަށް އިސްރާއީލް އިން އެއްބަސްވެފައި ވަނީ، އެކަމަށް ޓްރަމްޕް ވަރަށް ބޮޑަށް ބާރު އެޅުއްވުމުންނެވެ.

ޓްރަމްޕްގެ ފޯނު ކޯލާ ގުޅޭ ގޮތުން ސީއެންއެން އިން ބުނެފައި ވަނީ، އެ ކުރު ފޯނު ކޯލުގައި ހަމާސް ޖަމާއަތާ މެދު ދިމާވެފައިވާ މައްސަލަ ވަރަށް އަވަހަށް ހައްލު ވާނެ ކަމަށް ޓްރަމްޕް ވިދާޅުވެފައިވާ ކަމަށެވެ.

ބުދަ ދުވަހު ހަމާސް އިން ބުނެފައި ވަނީ އެ ޖަމާއަތުގެ ބެލުމުގެ ދަށުގައި ތިބި އަސީރުންގެ ހުރިހާ ހަށިގަނޑެއް އިސްރާއީލްއާ ހަވާލުކޮށްފައިވަ ކަމަށެވެ.