ޚިޔާލު ހޯދުމުގެ ވޯޓު: ހުޅުމީދޫ ވަކިން އޮތުމުން ދިމާވާ ދަތިތަކުގެ ވާހަކަ ރައީސް މުއިއްޒު ނާއްސަވާ، މަގްސަދު ސާފެއް ނުވޭ: ހުޅުދޫ ކައުންސިލަރ ފައިޒް

ރައީސް މުއިއްޒުގެ މަގްސަދަކީ ނިޒާމުގެ ތެރެއިން، ދިމާވާ ދަތިތައް ހައްލުކޮށްދެއްވުން ކަމަށް ވާނަމަ އެންމެ ފުރަތަމަ ބައްދަލު ކުރާނީ އައްޑޫ ސިޓީ ކައުންސިލް އާއި ކަމަށާއި ހުޅުމީދޫ ވަކިން އޮތުމުން ދިމާވާ ދަތިތަކުގެ ވާހަކަ ރައީސް މުއިއްޒު ނާއްސަވާ ކަމަށް އައްޑޫ ސިޓީ ހުޅުދޫ ކައުންސިލަރ ހުސެއިން ފައިޒުއްރަޙްމާނު ވިދާޅުވެއްޖެ އެވެ.

އަންގާރަ ދުވަހު ބޭއްވި އައްޑޫ ސިޓީ ކައުންސިލްގެ 4 ވަނަ ދައުރުގެ 207 ވަނަ ޖަލްސާގައި ވާހަކަދައްކަވަމުން، ފައިޒު ވިދާޅުވީ ހުޅުދޫ އަދި މީދޫ ވަކިން އޮންނަ ދެރަށަށް ވެފައި، ހިންގުމުގައި އިދާރީ ގޮތުން ދިމާވާ ބައެއް ކުދިކުދި ކަންކަން ހުރި ނަމަވެސް، މިހާރު މިދައްކަމުންދާ ވާހަކަތަކަކީ ކަނޑައެޅިގެން ދޮގު ވާހަކަތަކެއް ކަމަށާއި، އައްޑޫގައި ވަކިވަކި ކައުންސިލްތައް ހަދަން ސަރުކާރުން މަސައްކަތް ކުރަމުން ދިއުމަކީ ކަންބޮޑުވާ ކަމެއް ކަމަށެވެ.

Advertisement

އެންމެ ބޮޑު ކަންބޮޑުވުމަކީ ރައްޔިތުންނަށް މިކަމުގައި އެކަށީގެންވާ މައުލޫމާތު ނުލިބި، ވާން މިއުޅެނީ ކޮން ކަމެއްކަން ނޭނގި، އަވަސް އަރުވާލައިގެން މިދަފަ ވޯޓެއް ނަގަން ކުރަމުންދާ މަސައްކަތް ކަމަށް ވެސް ފައިޒު ވިދާޅުވި އެވެ.

އެކަށީގެންވާ ވަގުތު ދިނުމަކާއި ނުލައި މިފަދަ ވޯޓެއް ނަގަން މަސައްކަތް ކުރަމުން ދާއިރު، މިވޯޓްގައި ގިނަ ބަޔަކު ބައިވެރިނުވެ، މައިނޯރިޓީގެ ވޯޓް އަކުން ކަންކަން ބަދަލުވެގެން ދިއުމަކީ އެކަށީގެންވާ ކަމެއް ކަމަށާއި މިކަމުގައި އިންތިހާ އަށް ކަންބޮޑުވުން އޮތް ކަމަށް އޭނާ ވިދާޅުވި އެވެ.

އަދި މިހާތަނަށް އައި އިރުވެސް ހުޅުދޫގެ ރައްޔިތުންގެ ކަމެއްގައި، ސިޓީ ކައުންސިލް ތަމްސީލްކުރާ އެއްވެސް ކައުންސިލަރަކު އެކަމުގައި ދެކޮޅު ހަދާފައި ނުވާކަން ފާހަގަ ކުރަމުން، ވަކިން ހާއްސަކޮށް ހިތަދޫ އަށް ނިސްބަތްވާ އެއްވެސް ކައުންސިލަރު ދެކޮޅަށް ބަހެއް ކިޔާފައި ވެސް ނުވާ ކަމަށް ފައިޒު ވިދާޅުވި އެވެ.

ދައުލަތުގެ ޕްރޮކިއުމަންޓް ނިޒާމްގެ ތެރެއިން ކަންކަން ކުރިއަށް ގެންދިއުމުގައި އުނދަގޫ ކަންކަން ހުރިއިރު، ރައީސް މުއިއްޒުގެ ހަގީގީ މަގްސަދަކީ ކަންކަން ހައްލު ކޮށްދިނުން ކަމަށްވާ ނަމަ އެންމެ ފުރަތަމަ ވެސް ބައްދަލު ކުރާނީ ސިޓީ ކައުންސިލްގެ މެމްބަރުންނަށް ކަމަށާއި އަދި ވަކިން ހާއްސަކޮށް ހުޅުމީދޫގެ ރައްޔިތުންނަށް ހުރި ދަތިތަކަކީ ކޮބައިކަމެއް ވެސް ރައީސް އައްސަވާފައި ނުވާ ކަމަށް ފައިޒު ވިދާޅުވި އެވެ.

އެހެންކަމުން މިކަން ކުރަން އުޅުމުގެ ނިޔަތް ސާފު ނުވާ ކަމަށާއި ރަށު ކައުންސިލް އޮތް ނަމަވެސް ކުލީ ބިމެއް ދޭން އެދޭ އިރަށް އެކަމެއް ނުވާނެ ކަން ފާހަގަ ކުރަމުން ފައިޒު ވިދާޅުވީ، ވަކި ކައުންސިލެއް އޮތް ނަމަވެސް ސިޓީ ކައުންސިލެއް އޮތް ނަމަވެސް ކަންކަން ހިނގާނީ ވަކި އިޖުރާއަތްތަކެއްގެ މަތިން ކަމަށެވެ.

މީގެ އިތުރުން ޒިންމާދާރު މަގާމުތަކުގައި ތިބި ފަރާތްތަކުން އެޒިންމާތައް އަދާނުކޮށް އެހެން މީހުންގެ ބޮލުގައި ކަންކަން އެޅުވުމަށްފަހު، އޮޅުވާލުމަށް މަސައްކަތް ކުރަމުންދާ ކަމަށް ފައިޒު ވިދާޅުވި އެވެ.