ޚިޔާލު ހޯދުމުގެ ވޯޓުގެ މަޤްސަދަކީ ނުބައި ޖަރީމާ އެއްގެ ތެރެއިން "އައްޑޫ"ގެ ސިޓީ ދަރަޖަ ގެއްލުވާލުން: މޭޔަރ ނިޒާރު
ސަރުކާރުން އައްޑޫ ސިޓީ ކައުންސިލް ވަކިކުރުމަށް ވޯޓެއް ނަގަން ނިންމާފައި ވާއިރު، އެކަމާމެދު ކައުންސިލާ އެއްވެސް މަޝްވަރާއެއް ކޮށްފައި ނުވޭ
އަލީ ނިޒާރު - އައްޑޫ ސިޓީގެ މޭޔަރ
އައްޑޫ ސިޓީ ކައުންސިލް ބައިބައިކޮށް ވަކިކޮށްލުމާއި މެދު އާއްމުންގެ ޚިޔާލު ހޯދުމުގެ ވޯޓެއް ނެގުމަށް ސަރުކާރުން މަސައްކަތް ކުރަނީ ނުބައި ޖަރީމާ އެއްގެ ތެރެއިން ކަމަށާއި، އެކަމުގެ ހަގީގީ ބޭނުމަކީ "އައްޑޫ" އަށް މިހާރު ލިބިފައިވާ ސިޓީ އެއްގެ ދަރަޖަ ގެއްލުވާލުން ކަމަށް އައްޑޫގެ މޭޔަރ އަލީ ނިޒާރު ވިދާޅުވެއްޖެއެވެ.
އައްޑޫ ސިޓީ ކައުންސިލް އެއް ކައުންސިލެއްގެ ގޮތުގައި ބޭއްވުމާއި މެދު ސުވާލު އުފައްދާ ސަރުކާރުން ދަނީ ޚިޔާލު ހޯދުމުގެ ވޯޓެއް ނެގުމަށް ތައްޔާރު ވަމުންނެވެ. އެއް ކައުންސިލެއްގެ ގޮތުގައި އައްޑޫ ކައުންސިލް އޮތުމުގެ ބަދަލުގައި ވަކިވަކި ބައެއް ރަށްރަށުގައި ކައުންސިލްތައް ޤާއިމް ކުރުމާއި މެދު ގޮތެއް ނިންމުމަށް އެ ވޯޓު ނަގަން ނިންމީ އެގޮތަށް ބައެއް އާއްމުން އެދެމުންދާތީ ކަމަށް ސަރުކާރުން ވަނީ ބުނެފައެވެ.
އެހެން ނަމަވެސް ރާއްޖެ އެމްވީ އަށް ދެއްވި ބަސްތީގަތުމެއްގައި ނިޒާރު ވިދާޅުވީ މިހާތަނަށް އައި އިރު ވެސް މިކަމާ ގުޅޭ ގޮތުން އައްޑޫ ސިޓީގެ ކައުންސިލާއި ލޯކަލް ގަވަރމަންޓް އޮތޯރިޓީން ވެސް ސަރުކާރުން ވެސް ކުރި އެއްވެސް މަޝްވަރާ އެއް ނެތް ކަމަށެވެ. އެހެންކަމަށް ވާއިރު އައްޑޫގެ ކައުންސިލާއި މަޝްވަރާ ނުކޮށް އައްޑޫ އާއި ގުޅުން ހުރި މިފަދަ ކަމެއް ނިންމަން އުޅުމަކީ ސުވާލު އުފެދޭ ކަމެއް ކަމަށް ނިޒާރު ވަނީ ވިދާޅުވެފައެވެ. އަދި ސަރުކާރުން އަމިއްލަ އިސްނެގުމުގައި އެފަދަ ވޯޓެއް ނަގަން އުޅެނީ ކޮން އެޖެންޑާ އެއްގެ ދަށުންތޯ އޭނާ ވަނީ ސުވާލު އުފައްދަވާފައެވެ.
"އަޅުގަނޑަކީ އައްޑޫގެ މޭޔަރ. އަޅުގަނޑާ އަދި ކައުންސިލްގެ އެހެން ބޭފުޅަކާއި ވެސް މަޝްވަރާ އެއް ނުކުރޭ. މިއީ ނުބައި ޖަރީމާ އެއް. ބޭނުމީ އައްޑޫ ބައިބައި ކޮށްލަން. މި ކަހަލަ ކޮންމެ ކަމަކީ ސިޔާސީ ގޮތުން ކުރާ ކަމެއް. މިކަމުގައި އުޅެނީ ވެސް ސަރުކާރުގެ އެމްޕީންނާއި ސަރުކާރުގެ މަޤާމުތަކުގައި ތިބި މީހުން. އެ ބޭފުޅުން އެކަން ކުރަނީ މަޤާމު ދިފާއުކުރުމަށް." ނިޒާރު ވިދާޅުވިއެވެ.
މިއީ އައްޑޫ ރައްޔިތުން ބޭނުން ވެގެން ކުރަން ނިންމި ކަމެއް ނޫން ކަމަށާއި މި ކަމަށް ވަކާލާތު ކުރަނީ ސަރުކާރު ދިފާއު ކުރުމަށް މަސައްކަތް ކުރާ މީހުން ކަމަށް ނިޒާރު ވިދާޅުވިއެވެ. އައްޑޫ ބައިބައިކޮށްލުމަށް ޚިޔާލު ހޯދަން ވާނީ މުޅި އައްޑޫގެ ކިބައިން ކަމަށް ވެސް ނިޒާރު ވިދާޅުވިއެވެ. ނިޒާރު ވިދާޅުވީ އައްޑޫގެ އިދާރީ ރޫޅާލުމުގައި މުޅި އައްޑޫގެ ރައްޔިތުންގެ ބަހެއް އޮންނަން ޖެހޭނެ ކަމަށެވެ. ވަކި ބަޔަކަށް އެކަނި އެކަން ނިންމިދާނެ ކަމަށް ޤަބޫލު ނުކުރައްވާ ކަމަށް ނިޒާރު ވިދާޅުވިއެވެ.
"ވެގެން އުޅޭ ގޮތަކީ އައްޑޫ އަށް މުއިއްޒު ވީ ވައުދުތައް ނުފުއްދުނީ. އެކަން ޔަގީންވީމަ އައްޑޫ ތޮޅެން ދޫކޮށްލަން ބޭނުންވަނީ. މިއީ މަޅި އެއް. ވައުދު ނުފުއްދުނީމަ ބައިބައިކޮށްލަނީ، ވަކި ކަންތައްތަކެއް ކުރަން ފަސޭހަ އަކަށް. އޭގެ އަޑީގައި ނުބައި ރޭވުންތައް އެބަ ހުރި. ރައީސުލްޖުމްހޫރިއްޔާ އަކަށް ހޮވާ މީހާ ހޮވުން ފިޔަވާ އައްޑޫގެ އެންމެން ވޯޓުދީގެން ހޮވާ ހަމަ އެކަނި މީހަކީ އައްޑޫގެ މޭޔަރ. އަޅުގަނޑަށް ވެސް ބަހެއް ނުބުނެވޭ އައްޑޫ ރޫޅާލާ އިރު. އެހެންވީމަ މިއީ ނުބައި އެޖެންޑާ އެއް." މޭޔަރ ނިޒާރު ވިދާޅުވިއެވެ.
އައްޑޫ ހުޅުދޫ އާއި މީދޫ އެއް ކައުންސިލެއްގެ ދަށުން ހިންގުމާއި ދެކޮޅަށް އައްޑޫގެ ކައުންސިލަރުން ވެސް ދަނީ ވަކާލާތު ކުރަމުންނެވެ. މި ވޯޓަށް ކުޑަ ދުވަސްކޮޅަކަށް ވެފައިވާ އިރު މި ހަފްތާގައި ވެސް މި ވޯޓާ ގުޅޭ ބައެއް ސުވާލުތަކަށް ސަރުކާރުން ވަނީ ބަދަލު ގެނެސްފައެވެ. އެގޮތުން އައްޑޫގެ ހުޅުދޫ އާއި މީދޫ އެއް ކައުންސިލެއްގެ ދަށުން ހިންގަން ފެނޭތޯ ސާފުކުރުމަށް ހިމަނާފައިވާ ސުވާލު އުނިކޮށްފައި ވަނީ އޮކްޓޯބަރ މަހުގެ 12 ވަނަ ދުވަހުއެވެ.
