ކުރިމަތިވި ފާޑުކިޔުންތަކާއެކު، ބެނާ ދެމުމުގެ ހުއްދަ ސިޓީ ކައުންސިލުން އެމްޑީޕީއަށް ދީފީ

އޮކްޓޯބަރ މަހުގެ ތިންވަނަ ދުވަހު، އިދިކޮޅު މައި ޕާޓީ މޯލްޑިވިއަން ޑިމޮކްރެޓިކް ޕާޓީ (އެމްޑީޕީ) އިން ބާއްވަން ތައްޔާރުވަމުން ގެންދާ ބޮޑު މުޒާހަރާއަށް، މާލޭގެ މަގުތަކުގައި ހަރުކޮށްފައި ހުރި ބެނާތައް ނެގުމުގެ މަސައްކަތް މާލޭ ސިޓީ ކައުންސިލުން ފެށުމުން ކުރިމަތިވި ފާޑުކިޔުންތަކާއެކު، މަގުތަކުގައި ބެނާ ދެމުމުގެ ހުއްދަ މާލޭ ސިޓީ ކައުންސިލުން އެމްޑީޕީ އަށް ދީފިއެވެ.

މިކަމާ ގުޅިގެން މާލެ ސިޓީ ކައުންސިލްގެ ސީނިއަރ ކައުންސިލް އެގްޒެކެޓިވް، އިބްރާހިމް ރަޝީދު ސޮއި ކުރައްވާ އެމްޑީޕީ އަށް ފޮނުވި ސިޓީގައިވަނީ 14 ސެޕްޓެމްބަރ 2025 ގައި އެމްޑިޕީ އިން ފޮނުވި ސިޓީގައި އެދުނު ފަދައިން، އެމްޑިޕީގެ ފަަރާތުން 3 އޮކްޓޯބަރު 2025 ވާ ހުކުރު ދުވަހުގައި ބޭއްވުމަށް ހަމަޖެހިފައިވާ ބޮޑު މުޒާހަރާ އިސްތިހާރުކުރުމަށް، 27 ސެޕްޓެމްބަރު 2025 ވަނަ ދުވަހުން ފެށިގެން 3 އޮކްޓޯބަރު 2025 ވަނަ ދުވަހުގެ ނިޔަލަށް، އާންމު ރައްޔިތުންނަށް ދަތިނުވާގޮތަށް އިސްތިހާރު ބެނާ އަދި ޕޯސްޓަރުތައް ހަރުކުރުމާމެދު މާލެ ސިޓީ ކައުންސިލުގެ އިއުތިރާޒެއް ނެތް ކަމުގައެވެ. އަދި މުޒާހަރާ ނިމުމުން ހަރުކުރެވިފައިވާ ބެނާތަކާ ޕޯސްޓަރުތައް 1 ދުވަސްތެރޭ ނެގުމަށް ސިޓީ ކައުންސިލުން އެމްޑީޕީ ގައި އެދިފައިވެއެވެ.

މީގެ އިތުރުން ބޭނާތައް ހަރުކުރުމަށް އެދިފައިވާ މުއްދަތުގައި، މާލޭ މަގުތަކުގައި އަޑުގަދަކުރާ ބޭނުންކުރުމުގެ ހުއްދައަށްވެސް އެމްޑިޕީ އިން އެދިފައިވާތީ، އެކަމުގެ ހުއްދަ ހޯދުމަށް ދިވެހި ފުލުހުންގެ ހިދުމަތާ ގުޅައިގެން ކުރިޔަށް ގެންދިއުމަށް ސިޓީ ކައުންސިލްގެ ފަރާތުން އެމްޑީޕީ އަށް ވަނީ އަންގާފައެވެ.

"ލޫޓުވައިފި ލޫޓުވައި" ނަމުގައި އެމްޑީޕީން އޮކްޓޯބަރު މަހުގެ 3 ވަނަ ދުވަހު މާލޭގައި ބޮޑު އެއްވުމެއް ބާއްވަން ނިންމައި، އެކަމަށް ތައްޔާރުވުމުގެ މަސައްކަތް އަންނަނީ ވަރަށް ފޯރިއާއެކު ކުރަމުންނެވެ. އެގޮތުން މާލެއާއި ހުޅުމާލޭގެ ބޮޑެތި މަގުތަކުގައި އެމްޑީޕީން އަންނަނީ ޕޯސްޓަރުތަކާއި ބެނާތައް ހަރުކުރަމުންނެވެ.

ނަމަވެސް ހުކުރު ދުވަހު ސިޓީ ކައުންސިލުން ވަނީ މާލޭގެ މަގުތަކުގައި އެމްޑީޕީއިން ދަމާފައި ހުރި ބެނާތައް ކަނޑަން ފަށައިފައެވެ. އެގޮތުން މަޖީދީ މަގުގައި ހުރި ބައެއް ބެނާތައް ކަނޑާފައި ވާއިރު، އެ މަންޒަރުތައް ސޯޝަލް މީޑިއާގައި ދައުރުވާން ފެށުމުން ގިނަބައެއްގެ ފާޑުކިޔުން ވަނީ ސިޓީ ކައުންސިލަށް އަމާޒުވެފައެވެ.

މިކަމާއި ގުޅިގެން އެމްޑީޕީގެ ބަހެއް ހޯދާލުމަށް ރާއްޖެ އެމްވީ އިން ގުޅުމުން އެ ޕާޓީގެ ޑެޕިއުޓީ ޗެއަރޕަރސަން އިބްރާހިމް ވަހީދު (އިބުރޭ) ވިދާޅުވީ އެ ޕާޓީން ބޮޑު މުޒާހަރާއަށް ތައްޔާރުވުމަށް މާލޭގެ މަގުތަކުގައި ހަރުކޮށްފައި ހުރި ބެނާތަށް ނަގާފައިވަަނީ މާލޭ ސިޓީ ކައުންސިލުން އަންގައިގެން ކަމަށެވެ. އިބުރޭ ވިދާޅުވީ ރާއްޖޭގެ ގާނޫނު އަސާސީން މަނާ ނުކުރާ ކޮންމެ ކަމަކީ ކުރެވޭނޭ ކަމެއް ކަމަށާއި އެގޮތުން ބެނާތަށް ދެމުމަށް ހުއްދަ އޮންނަ ސަރަހައްދުތަކުގައި ބެނާތަށް ދަމާފައި ވަނީ އެގޮތުގެ މަތިން ކަމަށެވެ. އަދި މާލޭ ސިޓީ ކަންއުންސިލުން ބެނާތަށް ނެގިނަމަވެސް އަލުން ބެނާތަށް ހަރުކުރާނެ ކަމަށެވެ. އަދި އެކަން ނުހުއްޓުވޭނޭ ކަމަށް އިބުރޭ ވިދާޅުވި އެވެ.

ފާހަގަކޮށްލެވޭ ގޮޮތުގައި މިވަގުތު މާލެ ސިޓީގެ މޭޔަރު އާދަމް އާޒިމް އަދި ޑެޕިއުޓީ މޭޔަރު މުހައްމަދު އަރީޝް ރަސްމީ ދަތުރެއްގައި އުޅުއްވާތީ މޭޔަރު ކަމުގެ މަސްއޫލިއްޔަތު އަދާކުރައްވަމުންދަނީ ހުޅުމާލޭގެ ކައުންސިލަރު އަލީ އައިމަން އެވެ. އެމްޑީޕީއަށް ނިސްބަތްވާ މޭޔަރަކު ސިޓީ ކައުންސިލުގައި ހުންނެވި ނަަމަވެސް، ކައުންސިލްގެ މެޖޯރިޓީ މިހާރު އޮތީ ވެރިކަން ކުރާ ޕީއެންސީއަށެވެ.