ވަކި ކަމެއް ނުވާތީ މުޅި ނިޒާމު ރޫޅާލުމަކީ ހައްލެއް ކަމަށް ދެކިގެން ނުވާނެ: އިމާދު ސޯލިހު
ކައުންސިލް އެކަތިގަނޑެއްގެ ގޮތުގައި އޮވެގެން ލިބޭ ފައިދާތަކުގެ ވާހަކަ ވެސް ދައްކަން ޖެހޭ ކަމަށް
އެންޑީއޭގެ ސީއީއޯ އިމާދު ޞާލިހު
ވަކި ކަމެއް ނުވާތީ ކަމަށް ބުނެ މުޅި ނިޒާމު ރޫޅާލަން ނުޖެހޭ ކަމަށާ ކޮންމެ ކަމެއް ދިމާވާއިރަށް އެ އޮންނަ ނިޒާމެއް ރޫޅާލުމަކީ ހައްލެއް ކަމަށް ގަބޫލުކޮށްގެން ނުވާނެ ކަމަށް އައްޑޫ ސިޓީ ކައުންސިލްގެ ސެކްރެޓަރީ ޖެނެރަލް އިމާދު ސޯލިހް ވިދާޅުވެއްޖެއެވެ.
އައްޑޫ ސިޓީ ބައިބައިކޮށްލަން ސަރުކާރުން ނަގަން އުޅޭ ފެންނަ ނުފެންނަ ވޯޓާއި ގުޅިގެން ރާއްޖެޓީވީ އިން ގެނެސްދިން ބަހުސްގައި ވާހަކަ ދައްކަވަމުން އިމާދު ވިދާޅުވީ ވަކިވަކި ކައުންސިލްތައް އޮތުމުން ލިބޭނެ ފައިދާއާއި ބްލޮކް ގްރާންޓުގެ މައްސަލަ ނިޒާމުގެ ތެރެއިން ވެސް ހައްލު ކުރެވޭނެ ކަމަށެވެ.
އިމާދު ވިދާޅުވީ ވަކިވަކި ކައުންސިލްތައް އޮވެގެން ބްލޮކް ގްރާންޓުގެ މައްސަލައަށް ހައްލު ލިބޭނެ ކަން ފާހަގަކުރާއިރު ކައުންސިލް އެކަތިގަނޑެއްގެ ގޮތުގައި އޮވެގެން ލިބޭ ފައިދާތަކުގެ ވާހަކަ ވެސް ދައްކަން ޖެހޭ ކަމަށެވެ.
މިހާރުވެސް ކައުންސިލްގެ މައި އިދާރާގެ ހުރިހާ މަސައްކަތެއްގެ 80 އިންސައްތަ ކުރަނީ އެ ކައުންސިލް އެކަތިގަނޑެއްގެ ގޮތުގައި އޮވެގެންކަން އޭނާ ފާހަގަކުރެއްވިއެވެ.
އަވަށު އޮފީސްތަކަށް އަނެއްކާ ވެސް އެ ހުރިހާ މުވައްޒަފުން ލާންވެއްޖެޔާ އަޅުގަނޑުމެންނަށް ލިބޭ ބްލޮކް ގްރާންޓުން މިއަދު އަޅުގަނޑުމެންގެ މުސާރައަށް ޚަރަދުކުރަނީ 70 އިންސައްތަކަމަށް ވާނަމަ އަޅުގަނޑުމެންނަށް ލިބޭ ބްލޮކް ގްރާންޓުގައި ނޯންނާނެ އެއްވެސް އެއްޗެއް ބާކީ. ބްލޮކް ގްރާންޓު ދިނުމުގަ އޮންނަ މައްސަލަ، އައްޑޫ ހަ ރަށް އެއްކޮށްގެން 96 ބިލިއަން ރުފިޔާ ލިބޭ ކަމަށް ވާނަމަ އެއީ ދައުލަތުގެ މައްސަލައެއް. ސިސްޓަމުގެ މައްސަލައެއް. ސިޓީ ކައުންސިލްގެ މައްސަލައެއް ނޫން. އަލީ ނިޒާރުގެ މައްސަލައެއް ނޫން.އައްޑޫ ސިޓީ ކައުންސިލްގެ ސެކްރެޓަރީ ޖެނެރަލް އިމާދު ސޯލިހް
އިމާދު ވިދާޅުވީ މައްސަލައެއް އޮތިއްޔާ އެކަމަށް ވެސް ހައްލު ހޯދޭނެ ގޮތްތަކެއް ނިޒާމުގެ ތެރެއިން ފަހިވެފައިވާ ކަމަށެވެ.
އެ ބަހުސްގައި އެކަމާ ގުޅިގެން ވާހަކަދައްކަވަމުން އެ ސިޓީގެ މޭޔަރު އަލީ ނިޒާރު ވިދާޅުވީ ސިޓީއެއްގެ ގޮތުގައި އޮތުމުން ރާއްޖެގެ އެހެންތަނަކަށް ނުކުރާހާ ބޮޑު ހަރަދު އައްޑޫ ސިޓީއަށް ކޮށްފައިވާ ކަމަށާއި، މިހާތަނަށް އެންމެ ބޮޑު ގްރާންޓެއް ލިބިފައިވަނީވެސް އައްޑޫ ސިޓީއަށް ކަމަށެވެ.
އައްޑޫ ސިޓީ ބައިބައިކޮށް ބައެއް ރަށްރަށުގައި ވަކި ވަކި ކައުންސިލް އުފެއްދުމަށް ސަރުކާރުން މަސައްކަތް ކުރަމުންދާ މިދަނޑިވަޅުގައި ގިނަ ބަޔަކު ދަނީ މިކަމާއި ދެކޮޅަށް ވާހަކަ ދައްކާ ކަންބޮޑުވުން ފާޅުކުރަމުންނެވެ.
އެގޮތުން ރައީސް މުއިއްޒުގެ މަގްސަދަކީ ނިޒާމުގެ ތެރެއިން، ދިމާވާ ދަތިތައް ހައްލުކޮށްދެއްވުން ކަމަށް ވާނަމަ އެންމެ ފުރަތަމަ ބައްދަލު ކުރާނީ އައްޑޫ ސިޓީ ކައުންސިލް އާއި ކަމަށާއި ހުޅުމީދޫ ވަކިން އޮތުމުން ދިމާވާ ދަތިތަކުގެ ވާހަކަ ރައީސް މުއިއްޒު ނާއްސަވާ ކަމަށް އައްޑޫ ސިޓީ ހުޅުދޫ ކައުންސިލަރ ހުސެއިން ފައިޒުއްރަޙްމާނު ވަނީ ވިދާޅުވެފަ އެވެ.
އެންމެ ބޮޑު ކަންބޮޑުވުމަކީ ރައްޔިތުންނަށް މިކަމުގައި އެކަށީގެންވާ މައުލޫމާތު ނުލިބި، ވާން މިއުޅެނީ ކޮން ކަމެއްކަން ނޭނގި، އަވަސް އަރުވާލައިގެން މިދަފަ ވޯޓެއް ނަގަން ކުރަމުންދާ މަސައްކަތް ކަމަށާއި، އެކަށީގެންވާ ވަގުތު ދިނުމަކާއި ނުލައި މިފަދަ ވޯޓެއް ނަގަން މަސައްކަތް ކުރަމުން ދާއިރު، މިވޯޓްގައި ގިނަ ބަޔަކު ބައިވެރިނުވެ، މައިނޯރިޓީގެ ވޯޓް އަކުން ކަންކަން ބަދަލުވެގެން ދިއުމަކީ އެކަށީގެންވާ ކަމެއް ކަމަށް އޭނާ ވިދާޅުވި އެވެ.
