ރައީސް ޑރ. މުހައްމަދު މުއިއްޒުގެ މި ސަރުކާރުން ގެންދަނީ ލާމަރުކަޒީ ނިޒާމް ބަލިކަށިކޮށް، ކަމީނާ ކުރުމަށް ވަރަށް ބޮޑަށް މަސައްކަތް ކުރަމުން ކަމަށާއި އެއީ އިންތިހާއަށް ކަންބޮޑުވާ ކަމެއް ކަމަށް ރައްޔިތުންގެ މަޖިލީހުގެ ކުރީގެ ނައިބު ރައީސް އަދި ހޯރަފުށީ ދާއިރާގެ ކުރީގެ މެމްބަރު އަހުމަދު ސަލީމް ވިދާޅުވެއްޖެއެވެ.

ބުދަ ދުވަހުގެ ރޭ އިދިކޮޅު މައި ޕާޓީ އެމްޑީޕީން ބޭއްވި އެ ޕާޓީގެ ގައުމީ މަޖިލީހުގެ ޖަލްސާގައި ވާހަކަދައްކަވަމުން ސަލީމް ވިދާޅުވީ ލާމަރުކަޒީ ނިޒާމް ބަލިކަށިކުރުމަށް ޓަކައި މި ސަރުކާރުން ކުރައްވަމުން ގެންދަވާ މަސައްކަތާއި އެބޭފުޅުންގެ އަމަލުތައް ބަހައްޓަވާ ގޮތާއި މެދު ވަރަށް ބޮޑަށް ކަންބޮޑުވާ ކަމަށެވެ.

ސަލީމް ވިދާޅުވީ މި ސަރުކާރުގެ ސުޕަރ މެޖޯރިޓީ އޮތް ރައްޔިތުންގެ މަޖިލީހުން ކުރައްވަމުން ގެންދަވާ ބަހުސްތަކަށް ބަލާއިރުގައި ވެސް ފެންނަނީ މި ސަރުކާރުން ލާމަރުކަޒީ ނިޒާމް ބަލިކަށިކޮށް، ނިކަމެތިކޮށް، ކަމީނާ ކުރުމަށް މަސައްކަތް ކުރައްވަވާ މަންޒަރު ކަމަށެވެ.

ސަލީމް ވިދާޅުވީ ކައުސިލަރުންގެ އަދަދު މަދުކުރުމަށް މި ސަރުކާރުން ވިސްނަމުން ގެންދާ ގެންދިއުމަކީ ވަރަށް ބޮޑަށް ކަންބޮޑުވާ ކަމެއް ކަމަށާއި އެމްޑީޕީން ބޭނުންވީ ވީހާވެސް ގިނަ ބައަކު ސާމިލްވާ، ގިނަ ބައެއްގެ ބައިވެރިވުން އޮތް ހިންގުމުގެ ނިޒާމެއް ރާއްޖެއަށް ގެންނަން ކަމުގައެވެ.

ސަލީމް ވިދާޅުވީ ކައުންސިލަރުންގެ އަދަދު ނުވަތަ އަންހެނުންގެ ތަރައްގީއަށް މަސައްކަތް ކުރާ ކޮމިޓީ (ޑަބްލިޔުޑީސީ)ގެ މެމްބަރުންގެ އަދަދު މަދުކުރުމަކީ މިދެންނެވި މަގުސަދު ވީރާނާވެ، އެތައް ބައެއްގެ ވަޒީފާތައް ގެއްލިގެން ދާނޭ ކަމެއް ކަމުގައެވެ. އަދި މިހާރު މި ސަރުކާރުގެ ވިސްނުން ހުރިގޮތަށް ސިޓިންގ އެލަވަންސްއެއް ދޭގޮތަށް ބަދަލުކޮށްފި ނަމަ އަނެއްކާވެސް އެއްބައަކަށް އާމްދަނީ ލިބޭނެ މަގުތަނަވަސް ވެގެންދާނެ ކަމުގައި ވެސް ސަލީމް ވިދާޅުވިއެވެ.

ސަލީމް ވިދާޅުވީ އެމްޑީޕީން މީހުން އެމްޕަވަރ ކުރުމުގެ ވާހަދައްކާއިރުގައި އެންމެ މުހިންމު ކަމަކީ ގިނަ ބައަކަށް އާމްދަނީ ލިބުމުގެ ފުރުސަތު ތަނަވަސްވެފައި އޮތުން ކަމަށާއި މި ފުރުސަތު ހަނިކުރުމަށް މި ސަރުކާރުން މަސައްކަތް ކުރާނަމަ އެމްޑީޕީން އެކަމާއި ދެކޮޅަށް ތެދުވާނޭ ކަމާއި މެދު ޝައްކުނުކުރައްވާ ކަމަށެވެ.

މީގެ އިތުރުން ސަލީމް ވިދާޅުވީ މެމްބަރުންގެ މުސާރަތައް ކުދަކުރުމުގެ ވާހަތަކެއް ވެސް ދެކެވެމުން އަންނަކަމަށާއި އެކަމަކީ ވެސް އިންތިހާއަށް ކަންބޮޑުވުން ހުރިކަމެއް ކަމުގައެވެ. އޭގެ ބަދަލުގައި އެއްވެސް މަސައްކަތެއް ނެތް ސިޔާސީ މަގާމުތައް މި ގައުމުން މަދުކުރުން މާ ބުއްދިވެރިކަމުގައި ދެކޭކަމަށް ވެސް އޭނާ ވިދާޅުވިއެވެ.

އަދި އެފަދަ މަގާމުތައް މަދުކުރުމަކީ ގައުމަށް ވެސް އެންމެ ފައިދާ ހުރިގޮތް ކަމަށާއި އެހެން ނަމަވެސް އިވެމުން މިދަނީ ކައުންސިލަރުންގެ މުސާރަ ބޮޑުވެގެން ގައުމަށް ގެއްލުންތަކެއް ލިބެމުން އަންނަ ވާހަކަ މި ސަރުކާރުން ދައްކަމުން ގެންދާ ތަން ކަމުގައި ސަލީމް ވިދާޅުވިއެވެ.

ސަލީމް އިތުރަށް ވިދާޅުވީ އެމްޑީޕީ ނޫން ޕާޓީއެއް މި ގައުމުގެ ވެރިކަމަށް އަންނަ ކޮންމެ ފަހަރަކު ފެނިގެން ދަނީ ލާމަރުކަޒީ ނިޒާމާއި ދެކޮޅަށް މަސައްކަތް ކުރަމުން ގެންދާ ތަން ކަމަށެވެ. ކަން މިހެން ހުރި އިރު، މި ނިޒާމް ބަލިކަށިވިޔަ ނުދިނުމަށްޓަކައި އެމްޑީޕީން ވަރަށް ބޮޑަށް މަސައްކަތް ކުރަން އެވަޖެހޭ ކަމަށް ވެސް އޭނާ ވިދާޅުވިއެވެ.

އަދި މިފަހަރު ގައުމުގެ އެންމެހާ ރައްޔިތުން މިހާރު މިއޮތް ސަރުކާރަށް ނޫނެކޭ ބުނާނޭ ކަމުގައި ވަރަށް ބޮޑަށް އުންމީދު ކުރައްވާ ކަމުގައި ވެސް ސަލީމް ވިދާޅުވިއެވެ. އަދި ޚާއްސަކޮށް މި ސަރުކާރުން ލާމަރުކަޒީ ނިޒާމާއި ދެކޮޅަށް ކުރަމުންގެންދާ މަސައްކަތަކަށް ރައްޔިތުން ރަނގަޅު ރައްދެއް ދޭނޭ ކަމުގައި އުންމީދު ކުރައްވާ ކަމުގައި ވެސް އޭނާ ވިދާޅުވިއެވެ.