ބަޑިޖަހާ މަރާއިރު، ކުޑަކުއްޖެއް، އަންހެނެއް، މުސްކުޅިއެއް ބެލުމެއް ނެތް!
ގާތްގަނޑަކަށް 87000 މީހުން ވަނީ ބަންގްލަދޭޝް އަށް ހިޖުރަކޮށްފައި
ރޮހިންޖާ މުސްލިމުން ބަންގްލަދޭޝް އަށް ހިޖުރަކުރަނީ
ރޮހިންޖާ މުސްލިމުންނަށް ދެމުންދާ ލާއިންސާނީ އަނިޔާތަކަށް ކެތް ނުވެގެން އެތަށް ހާސް ރޮހިންޖާ މުސްލިމުން ބަންގްލަދޭޝް ބޯޑަރ ހުރަސްކޮށް އެގައުމަށް ވަންނަމުންދާ އިރު ރޮހިންޖާ މުސްލިމުންނަށް ފަރުުވާދިނުމަށް ބަންގްލަދޭޝްގެެ ހޮސްޕިޓްތަކަށް ނުކަތާ މިންވަރަށް މީހުން ދަނީ ގެންދަމުންނެވެ.
ރޮހިންޖާ މުސްލިމުންގެ ތެރެއިން ބަންގްލަދޭޝް ބޯޑަރ ހުރަސްކޮށް އަންނަ މީހުންގެ ތެރެއިން ގިނަ ބަޔެއްގެ ތަންތަން ބިނދިފައިވެއެވެ. ބައެއް މީހުންގެ ގަޔަށް ބަޑިޖެހުމުގެ ސަބަބުން ހަށިގަނޑު ޒަހަމްވެފައިވެއެވެ. އަދި ހޮސްޕިޓަލުގައި ތަކުގައި މީހުން ގިނަވުމުން އެކަށީގެންވާ ގޮތުގައި ފަރުވާ ދިނުމަށް ދަތިތައް ދަނީ ކުރިމަތިވަމުންނެވެ.
ގާތްގަނޑަކަށް ބަންގްލަދޭޝްއަށް މިހާރު ވެސް 87000 ރޮހިންޖާ މުސްލިމުން ވަދެފައިވާ އިރު އޮގަސްޓް މަހުގެ ފަހުކޮޅުން ފެށިގެން ދަނީ ރޮހިންޖާ ދަރިކޮޅުގެ މުސްލިމުންނަށް ތަފާތު އެކި ކަހަލަ އަނިޔާތައް ކުރިމަތިވަމުންނެވެ.
ބަންގްލަދޭޝްގައި މިހާރު ވެސް ތިން ރެފިއުޖީ ކޭމްޕް ވަނީ ރޮހިންޖާ މުސްލިމުންނަށް އެހީތެރިކަން ފޯރު ކޮށްދިނުމަށް ގާއިމް ކުރެވިފަ އެވެ.
ބަންގްލަދޭޝްއަށް އަންނަ ރޮހިންޖާ މުސްލިމުންނަށް އެހީތެރިކަން ފޯރުކޮށްދޭ އދ ގެ ރެފިއުޖީ އޭޖެންސީން ބުނީ، އެންމެ ބޮޑު ކަަމަކަށް ބޭނުންވަނީ ވަގުތީ ހިޔާތައް އަޅާނެ ބިން ކަމަށެވެ. ރޮހިންޖާ މުސްލިމުންނަށް އެހީތެރިކަން ފޯރުކޮށްދިނުމަށް އދގެ ރެފިއުޖީ އޭޖެންސީން މަސައްކަތް ކުރަމުންދާ އިރު ބަންގްލަދޭޝްގެ ބޯޑަރ ހުރަސްކޮށް އަންނަ ގިނަ ފަރާތްތަކަށް ތަފާތު އެކި ކަހަލަ ނޭވާލާނިޒާމުގެ ބަލިތަކާއި އިންފެކްޝަންގެ އިތުރަށް މަލްނިއުޓްރިޝަން ކުރިމަތިވެފައިވާ ކަމަށް ޑޮކްޓަރުން ބުނެ އެވެ. އަދި އޭގެތެެރެއިން ގިނައީ ވަރުބަލިވެ، ބިރުވެރިކަމާ ކުރިމަތިލާންޖެހިފައިވާ ނަފްސާނީ ގޮތުން އަސަރު ކޮށްފައިވާ މީހުންނެވެ. މީގެއިތުރުން ގިނަ އަދަދެއްގެ ތުއްތު ކުދިންނާއި ކުޑަކުދިން ވެސް ހިމެނޭ ކަމަށް އަދ ގެ ރެފިއުޖީ އޭޖެންސީން ބުނެ އެވެ.
މިޔަންމާގެ ސިފައިން އެއްވެސް ކަމަކާ ނުލާ ރޮހިންޖާ މުސްލިމުންގެ ގަޔަށް ބަނޑިޖަހަމުންދާ ކަމަށް މިހާރު ބަންގްލަދޭޝްއަށް ހިޖުރަކޮށްފައިވާ މީހަކު ކިޔާދިނެވެ. ކުޑަކުއްޖެއް، އަންހެނެއް، މުސްކުޅިއެއް ބެލުމެއްނެތި ދަނީ ތަފާތު އަނިޔާތައް އެމީހުންނަށް ކުރަމުންނެވެ.
" އަހަރެން ދުށިން މައިނެއް ގޮއްވާލުމުގެ ސަަބަބުން އަންހެނެއްގެ ފައި އެއްކޮށް ހަލާކުވެެގެންދިޔަ މަންޒަރު .އަދި އަތުގެބޮޑު ބައަކުން ހުއްޓުމެއް ނެތި ލޭ ފައިބަމުންދިޔަ އިރު އޭނާގެ އާއިލާގެ މީހުން، ރޮއި ހޭރެމުން ރިކްޝޯ އަކަށް ލައިގެން ހޮސްޕިޓަލަށް ގެންދިއުމަށް މަސައްކަތް ކުރިތަން." ބަންގްދަލޭޝްގެ ރެފިއުޖީން ކޭމްޕްއަށް ދިރިއުޅުން ބަދަލު ކޮށްފައިވާ ރޮހިންޖާ މުސްލިމެއް އަސަރާއެކު ކިޔާދިނެވެ.
ބަންގްލަދޭޝްއަށް އައިސްފައިވާ ރޮހިންޖާ ދަރިކޮޅުގެ އާއިލާއަކުން އެސޯސިއޭޓެޑް ޕްރެސްއަށް ކިޔާދިންގޮތުގައި ލޭންޑް މައިނެއް ގޮއްވާލުމުގެ ސަބަބުން، އެއާއިލާގެ ދުވަސްވީ މީހެއްގެ ކަނާތު ފައި އެއްކޮށް ބޭނުން ނުކުރެވޭ ވަރަށް ހަލާކުވެފައިވެއެވެ.
" އަހަރެމެންނަށް މިފެންނަ މަންޒަރަކީ ރޮހިންޖާ މުސްލިމުންނަށް ދިމާވާ ލާއިންސާނީ އަމަލުތަކުގެ ވަރަށް ކުޑަ މިންވަރެއް." ރޮހިންޖާ މުސްލިމުންނަށް އެހީތެރިކަން ފޯރުކޮށްދެމުންދާ ޑޮކްޓަރެއް ކިޔާދިނެވެ.
މިޔަންމާގެ ރޮހިންޖާ މުސްލިމުންނާ މެދު ތަފާތު ކުރުންތައް ކުރިމަތި ކުރަމުންދާތާ އެތަށް އަހަރެއްވެފައިވާ އިރު 2012 ވަނަ އަހަރު ހިނގި ހަމަނުޖެހުންތަކާ އެކު ރޮހިންޖާ ދަރިކޮޅުގެ މުސްލިމުންގެ ތެރެއިން އެއް ލައްކަ އަށް ވުރެ ގިނަ ރައްޔިތުންވަނީ ބަންގްލަދޭޝައަށް ހިޖުރަ ކޮށްފަ އެެވެ.
