ފީފާގެ ޓެކްނިކަލް ޑިވެލޮޕްމަންޓް ކޮމެޓީ އަށް ރާއްޖޭގެ ޓޮމް

ދުނިޔޭގެ ފުޓުބޯޅައިގެ މައި އިދާރާ (ފީފާ)ގެ ޓެކްނިކަލް ޑިވެލޮޕްމަންޓް ކޮމެޓީ އަށް، ފުޓުބޯޅަ އެސޯސިއޭޝަން އޮފް މޯލްޑިވްސް (އެފްއޭއެމް)ގެ ރައީސް އަޙުމަދު ޠާރިޤު (ޓޮމް) އައްޔަން ކުރައްވައިފި އެވެ.

މިއަހަރުގެ ޖުލައި މަހުގެ ތެރޭގައި އެފްއޭއެމްގެ ރައީސް އަކަށް އިންތިޚާބު ކުރި ޓޮމް، ފީފާގެ ޓެކްނިކަލް ޑިވެލޮޕްމަންޓް ކޮމެޓީ އަށް އައްޔަން ކޮށްފައި ވަނީ އޮކްޓޫބަރު މަހުގެ ދެ ވަނަ ދުވަހު ބޭއްވި ފީފާގެ ކައުންސިލް ބައްދަލުވުމުގަ އެވެ. މިއީ ފީފާގެ މި ފަދަ ކޮމެޓީއެއްގައި ރާއްޖެ އަށް ނިސްބަތްވާ މީހަކު ހިމެނުނު ފުރަތަމަ ފަހަރެވެ.

ފީފާގެ ޓެކްނިކަލް ޑިވެލޮޕްމަންޓް ކޮމެޓީގެ ދައުރަކީ ހަތަރު އަހަރުގެ މުއްދަތެކެވެ. އެހެންކަމުން މި ހިނގާ 2025 ވަނަ އަހަރުން ފެށިގެން، 2029 ވަނަ އަހަރާ ހަމަ އަށް އެ ކޮމެޓީގައި ޓޮމް ހިމެނި ވަޑައިގަންނަވާނެ އެވެ.

ފީފާ ޓެކްނިކަލް ޑިވެލޮޕްމަންޓް ކޮމެޓީ އަށް ޓޮމް އައްޔަން ކުރައްވާފައިވާއިރު، މިހާރު ޓޮމް އަންނަނީ އެފްއޭއެމްގެ ރައީސް ކަމުގެ ދެ ވަނަ ދައުރު އަދާ ކުރައްވަމުންނެވެ. މިއަހަރުގެ ޖުލައި މަހު އޮތް އެފްއޭއެމްގެ އިންތިޚާބުގައި، އެ އެސޯސިއޭޝަންގެ ރައީސް ކަމުގެ މަޤާމަށް ޓޮމް އިންތިޚާބު ކޮށްފައި ވަނީ ހުރިހާ ކުލަބު ތަކެއްގެ ތާއީދާ އެކު އެވެ.

ދެ ވަނަ ފަހަަރަށް އެފްއޭއެމްގެ ރައީސްކަމާ ހަވާލުވެ ޓޮމް އަންނަނީ ގިނަ މަސައްކަތް ތަކެއް ކުރަމުންނެވެ. އެގޮތުން އެފްއޭއެމް ވެއްޓިފައިވާ އަނދަވަޅުން އަރައި ގަތުމުގެ މަސައްކަތާއި، ގެއްލިފައިވާ ފުޓުބޯޅައިގެ ފޯރި އަލުން ގެނެސް، ދިވެހި ފުޓުބޯޅަ އަށް ދިރުމެއް ހޯދައި ދިނުމުގެ މަސައްކަތް ޓޮމް އަންނަނީ ކުރަމުންނެވެ.

އެފްއޭއެމްގެ ރައީސް ކަމަށް ވަޑައިގެންނެވުމަށް ފަހު، މިދިޔަ ސެޕްޓެމްބަރު މަހުގެ ތެރޭގައި ޓޮމް ވަނީ ފީފާގެ ރައީސް ޖިއާނީ އިންފަންޓީނޯއާ ވެސް ބައްދަލު ކުރައްވައިފަ އެވެ. އިންފަންޓީނޯ ވަނީ އެފްއޭއެމްގެ ރައީސް ކަމުގައި ޓޮމް ކުރައްވަމުން އަންނަ މަސައްކަތް ފާހަގަ ކުރައްވައި، ޓޮމް އާއި އޭނާގެ ޓީމުގެ މަސައްކަތަށް ތައުރީފު ކުރައްވައިފަ އެވެ.

މީގެ ކުރިން ވެސް ޓޮމް ވަނީ އެފްއޭއެމްގެ ރައީސްކަން ކުރައްވައިފަ އެވެ. އެގޮތުން 2016 ވަނަ އަހަރު އެފްއޭއެމްގެ ރައީސް ކަމަށް ޓޮމް ވަޑައިގެންނެވިއިރު، އެ ފަހަރު މަގާމުގައި ހުންނެވުނީ ކުޑަ ދުވަސް ކޮޅަކު އެވެ. ޓޮމްގެ ހިންގާ ކޮމެޓީގެ މެމްބަރުން ތަކެއް އިސްތިއުފާ ދިނުމާ ގުޅިގެން ޓޮމްގެ މަގާމު ވަނީ ގެއްލިފަ އެވެ.

އެއާއެކު ދެން ބޭއްވި އިންތިޚާބުގައި ވެސް ޓޮމް ވާދަ ކުރެއްވި އެވެ. ނަމަވެސް އެ އިންތިޚާބުގައި ޓޮމްގެ މައްޗަށް ކުރި ހޯއްދަވައި އެފްއޭއެމްގެ ރައީސް ކަމަށް ވަޑައިގެންނެވީ ބައްސާމް އަދީލް ޖަލީލް އެވެ.