ވިޔަފާރިވެރިޔާ އަދި މާމިގިލި ދާއިރާގެ މެންބަރު ގާސިމް އިބްރާހިމް އަކީ ކަނޑަށް އެއްލާލީމަ ވަޔާ އޮޔާ އެކު ދެކޮޅަށް ޖެހޭ ބަރުދަނެއް ނެތް ބޮނބިގަނޑެއް ފަދަ ބޭފުޅެއް ކަމަށް ކުރީގެ ރައީސް އަބްދުﷲ ޔާމީން ސިފަ ކުރައްވައިފިއެވެ.

ޕީއެންއެފް ޖަލްސާއެއް ގައި ވާހަކަ ދައްކަވަމުން ރައީސް ޔާމީން ވިދާޅުވީ ރައްޔިތުންގެ ވޯޓު ހޯދުމަށްޓަކައި ވޯޓުގެ ބޭނުމުގައި ރައީސް ޑރ. މުހައްމަދު މުއިއްޒު އިތުރުފުޅު ނުހައްދަވާނެ ކަމަށް ވިޔަފާރިވެރިޔާ ގާސިމް އިބްރާހިމް ވިދާޅުވި ކަމަށެވެ. ޔާމީން ވިދާޅުވީ ކުރީގެ ރައީސް އިބްރާހިމް މުހައްމަދު ޞާލިހުގެ ސަރުކާރުގައި ކާޑެއްދޫ އެއަރޕޯޓު ބޮލުގައި އަޅުވާފައި ދެ ފަޅު އަތުލި ކަމަށާއި، މި ސަރުކާރުން 18 މިލިއަން ޑޮލަރު އަތުލާފައިވާ ކަމަށެވެ.

ޔާމީން ވިދާޅުވީ ރައީސް މުއިއްޒު އދ އަތޮޅަށް ކުރެއްވި ދަތުރުފުޅުގައި ގާސިމް ވަރަށް ވަރުގަދައަށް ވާހަކަފުޅު ދެއްކެވި ކަމަށާއި، ގާސިމް މުއިއްޒު އަށް ހުޝާމަދު ކުރައްވާ ވާހަކަ ދައްކަވާއިރު، ރިޔާސީ އިންތިހާބުގެ ވޯޓު ނިމެންދެން ރައީސް ޞާލިހުގެ ސަރުކާރާއެކު ހުންނެވިކަން އެންމެންނަށް ވެސް އެނގޭ ކަމަށެވެ.

ރައީސް ޔާމީން ވިދާޅުވީ ގާސިމް އުޅެނީ ދެކަމެއް ބޭނުންވެގެން ކަމަށާއި، އޭގެ ތެރެއިން އެއްކަމަކީ އޭނާގެ އަނބިކަނބަލުންނަށް އަނެއްކާ ވެސް މަގާމެއް ހޯދަން ނުވަތަ ވަޒީރުކަން ހޯދައިދޭން ކަމަށާއި، ރައީސް ޞާލިހާއި ވެސް ގާތްކޮށް އުޅުއްވީ އެބޭނުމުގައި ކަމަށެވެ. އަދި އަނެއް ކަމަކީ އޭނާއަކީ ވަރަށް ފަޅުދެކެ ލޯބިވާ މީހެއް ކަމަށާއި، ހީވަނީ ދެތިން ހަތަރު ފަޅެއް ކަޓުވާލެވޭތޯ މަސައްކަތް ކުރަނީ ކަމަށެވެ. ރައީސް ޔާމީން ވިދާޅުވީ މި ނޫންނަމަ ގާސިމް އެވަރުގެ ވާހަކަ ދައްކަން ނުޖެހޭނެ ކަމަށެވެ.

ޔާމީން ވިދާޅުވީ ހުޝާމަދު ކުރުމަކީ ވަރަށް ވަރުގަދަ ހުނަރެއް ކަމަށާއި، އެކަމަށް ބޭހެއް ހޯދަން ޖެހޭ ކަމަށެވެ. ޒުވާންކުދިން ބޭސް ކައިގެން ހައިވީމަ ބުނަނީ ހައިވީ ކަމަށާއި، ގާސިމް މާމިގިލީގައި ދެއްކެވި ވާހަކައަށް އިޝާރާތްކުރައްވާ ޔާމީން ވިދާޅުވީ އެއީވެސް އެކަހަލަ ކަމެއް ކަމަށެވެ.

އދ އަތޮޅަށް ރައީސް މުއިއްޒު ކުރެއްވި ދަތުރުފުޅުގައި އދ. މާމިގިލި ރައްޔިތުންނާއި ބައްދަލުކުރެއްވި ޖަލްސާގައި ގާސިމް ވަނީ ކުރީގެ ރައީސުންނަށް ވަރަށް ބޮޑަށް ފާޑުވިދާޅުވެ، ރައީސް ޑރ. މުހައްމަދު މުއިއްޒަށް ވަރަށް ބޮޑަށް ތައުރީފުކުރައްވައި ސެލިއުޓް ކުރައްވާފައެވެ. ގާސިމްގެ ވާހަކައިގައި ޔާމީނަށް ވަރަށް ބޮޑަށް ފާޑުވިދާޅުވިއެވެ. ގާސިމް ވަރަށް ޖަޒުބާތާ އެކު ވިދާޅުވީ ފާއިތުވި ސަރުކާރުތަކުން އޮތީ ގައުމު ދަރުވާލާފައި ކަމަށެވެ. އެކިއެކި ނަންނަމުގައި ދަރަނި ނަގަމުން ނަގަމުން ގޮސް އޮތީ ބަނގުރޫޓުވާ ހިސާބުގައި ކަމަށެވެ.