ރިޝްވަތު ނަގައިގެން ފްލެޓް ދޭކަމުގެ ހެކި އެބަހުރި: ކުޑޫ
ގެޒެޓްކުރެވިފައިވާ ލިސްޓަށް ފްލެޓް ދޭނެކަމަށް ބުނިނަމަވެސް، ލިސްޓް ބާތިލްކޮށް ގާނޫނާ ޚިލާފަށް މީހުން އުނިކުރަމުންދޭ
ރައްޔިތުންގެ މަޖިލީހުގެ ގަލޮޅު އުތުރު ދާއިރާގެ މެންބަރު މުޙައްމަދު އިބްރާހިމް (ކުޑޫ): ވިދާޅުވީ ރިޝްވަތުގެ ފައިސާ ދިނުމުން ފްލެޓް ދޫކުރާ ކަމުގެ ހެކި ލިބިފައިވާ ކަމަށް
ގެދޮރުވެރިޔާ ފްލެޓް ލިބެންޖެހޭ، ޝަރުތު ހަމަނުވާ ފަރާތްތަކަށް ރިޝްވަތުގެ ފައިސާ ނަގައިގެން ފްލެޓް ދޫކުރަމުންދާކަމުގެ ހެކި ލިބިފައިވާކަމަށް ރައްޔިތުންގެ މަޖިލީހުގެ ގަލޮޅު އުތުރު ދާއިރާގެ މެންބަރު މުޙައްމަދު އިބްރާހިމް (ކުޑޫ) ވިދާޅުވެއްޖެ އެވެ.
ބުދަ ދުވަހު ރައްޔިތުންގެ މަޖިލިސް ކުރާގޭގައި އެމްޑީޕީ އެމްޑީޕީގެ ޕާލިމެންޓަރީ ގްރޫޕުން ނޫސްވެރިންނަށް މައުލޫމާތު ދިނުމަށް ބޭއްވި ބައްދަލުވުމުގައި ވާހަދައްވަމުން ކުޑޫ ވިދާޅުވީ ރިޝްވަތުގެ ފައިސާ ނަގައިގެން ފްލެޓް ދޫކުރަމުންދާ ކަމުގެ ހެކި ލިބިފައިވާ ކަމަށާއި މިއީ މި ސަރުކާރުން ކަނޑައެޅިގެން ހިންގާ ބޮޑު ޖަރީމާއެއް ކަމަށެވެ.
"ފްލެޓް ދޫކުރުމުގައި ރިޝްވަތުގެ ފައިސާ ނަގައިގެން ކަންކަން ކުރާކަމުގެ ހެކި އަޅުގަނޑުމެންނަށް ލިބެމުންދޭ. މިކަން މިހާރު ވެސް ކުރަމުންދަނީ އަދި ކުރިއަށް ވެސް ގެންދަނީ. މިއީ މި ސަރުކާރުން ހިންގާ ބޮޑު ޖަރީމާއެއް." ކުޑޫ ވިދާޅުވިއެވެ.
ކުޑޫ ވިދާޅުވީ ރިޝްވަތުގެ ފައިސާ ދިނުމުން ފްލެޓު ދޫކުރަނީ ރައްޔިތުން އުޅޭ ހާލު މި ސަރުކާރުން ބަލާފައި ނުވާތީ ކަމަށާއި ރައްޔިތުން ދިރިއުޅޭ ދަތި ހާލަތު އަމިއްލަ ލޮލުން ދެކެފި ނަމަ އެގޮތަށް ކަންތައް ނުކުރާނޭ ކަމަށެވެ. އަދި މިއީ މި ސަރުކާރުން ގަސްދުގައި ހަދާ ވަރަށް ބޮޑު ގޯހެއް ކަމަށް ވެސް ކުޑޫ ވިދާޅުވި އެވެ.
"އާންމު ރައްޔިތުން ދިރިއުޅޭ ތަންތަނަށް ގޮސް އެމީހުންގެ ހާލަތު ބަލައިލިނަމަ، މިފަދަ ކަމެއް ނުކުރާނެ. މިއީ ގަސްތުގައި ކުރާ ވަރަށް ބޮޑު ކުށެއް. މިކަން ވަނީ މިކަމާ ހަވާލުވެ ތިބި ސަރުކާރުގެ ވަޒީރުންނާވެސް ހިއްސާކޮށްފައި،" ކުޑޫ ވިދާޅުވިއެވެ.
ވެރިކަމާ ހަވާލުވުމުގެ ކުރިން، ރައީސް ޑރ މުހައްމަދު މުޢިއްޒު ވިދާޅުވެފައި ވަނީ ގެޒެޓްކުރެވިފައިވާ ލިސްޓުގައި ތިބި އެންމެންނަށް ފްލެޓް ދޭނެކަމަށެވެ. އެހެން ނަމަވެސް ވެރިކަމަށް އައުމާއި އެކު ދެއްކެވި ވާހަފުޅުތައް މަތިން ހަނދުމަފުޅުނައްތާލައި މުޅި ފްލެޓް ލިސްޓް ވަނީ ގަޑުބަޑުކޮށްފައެވެ.
ގެޒެޓްކުރެވިފައިވާ ލިސްޓަށް ފްލެޓް ދެއްވާނެކަމަށް ރައީސް މުޢިއްޒު ތަކުރާރުކޮށް ވިދާޅުވިނަމަވެސް، އެމަިކުފާނު ގެންދަވަނީ އުސޫލާ ޚިލާފަށް ލިސްޓުން މީހުން އުނިކުރަމުންނެވެ. މިކަމާއި ގުޅިގެން ގިނަ ރައްޔިތުން އަންނަނީ ކަންބޮޑުވުން ފާޅުކުރަމުންނެވެ.
