މުޒާހަރާގައި ހައްޔަރުކުރި މީހުން ދޫކޮޮށްލުމަށް ގޮވާލާ އެމްޑިޕީ އިން ހާއްސަ ހަރަކާތެއް ފަށައިފި

އޮކްޓޯބަރު 3 ވަނަ ދުވަހުގެރޭ އެމްޑީޕީގެ ފަރާތުން މާލޭގައި ބޭއްވި ލޫޓުވައިފި ބޮޑު އެއްވުމުގެ ތެރެއިން ހައްޔަރުކުރި ފަރާތްތައް ދޫކޮށްލުމަށް ގޮވަލާ ހާއްސަ ހަރަކާތެއް އެމްޑިޕީ އިން ފަށަައިފިއެވެ.

މިހަރަކާތް ފަށާފައިވަނީ ބުދަ ދުވަހުގެރޭ އެމްޑީޕީގެ ދަނޑިކޮށި ހަރުގޭގައެވެ. މިހަރަކާތުގެ ތެރެއިން ދަނޑިކޮށި ހަރުގޭ ބޭރުގައި، މިހާރު ދޫނިދޫ ޖަލުގައި ބަންދުކޮށްފައިވާ މުޒާހަރާގެ 6 ބައިވެރިންގެ ފޮޓޯ ހިމެނޭގޮތައް، އެފަރާތްތައް ދޫކޮށްލުމަށް ގޮވާލާ ބޮޑު ޕޯސްޓަރެއް ވަނީ ހަރުކޮށްފައެވެ. އަދި ދޫނިދޫގައި ބަންދުކޮށްފައިވާ ސިޔާސީ ހައްޔަރީން ދޫކޮށްލުމަށް ގޮވާލާ އެމްޑިޕީ ހަރުގެ ކުރިމަތީގައި އެމްޑީޕީގެ މެމްބަރުން ވަނީ ޝުއޫރު ފާޅު ކޮށް އިހުތިޖާޖުވެސް ކޮށްފައެވެ.

މިހަރަކާތާ ގުޅޭގޮތުން މާއުލޫމާތު ދެއްވަމުން އެމްޑީޕީގެ ކުރީގެ ޑެޕިއުޓީ ޗެއަރޕާސަން އަލީ ނިޔާޒް ވިދާޅުވީ އޮކްޓޯބަރު 3 ވަނަ ދުވަހުގެރޭ ކުރި މުޒާހަރާގެ ތެރެއިން ހައްޔަރުކުރި ފަރާތްތަކުގެ ތެރެއިން 6 މީހަކު ޖަލައްލާފައި އެތިބީ ސިޔާސީ ބޭނުމަކަށްކަމުގައެވެ. ސިޔާސީ ހައްޔަރީން އެބޭފުޅާގެ ވެރިމަކުގައި ނުތިބޭނެ ކަމަށް ވިދާޅުވެ ކެމްޕޭނުގައި ރައީސް މުއިއްޒު ވައުދުވެ ވަޑައިގެންފަވާކަން ނިޔާޒް ވަނީ ފާހަގަކުރައްވާފައެވެ.

ރައީސް މުއިއްޒު އެއްޗެއް ވިދާޅުވީމާ އޭގެ އަނެއްކޮޅަށް މިހާރު ވިސްނެނީ. އެހެން ކަމުން ކުރިޔަށް އޮތްތަނުގަ މި ހައެއް އިތުރު ވެގެންދާނެ އެތައް ގުނައަކަށް. އެހެން ނަމަވެސް އެމްޑިޕީއިން އަބަދުވެސް މަސައްކަތް ކުރަނީ ހައްގުތައް ހިމާޔަތް ކުރުމަށް އަދި ސިޔާސީ ހައްޔަރީންގެ ގޮތުގައިތިބޭ މީހުންގެ ދިފާއުގައި މީގެ ކުރިން ވެސް އެމްޑީޕީ އިން ނިކުމެފަވާނެ. އިރާދަކުރެއްވިއްޔާ މިފެށޭ ހަރަކާތަކީ މި 6 މީހުން ދޫކޮށްލުމަށް ގޮވާލާ ހިންގޭ ހާއްސަ ހަރަކާތެއް.

އެމްޑީޕީގެ ކުރީގެ ޑެޕިއުޓީ ޗެއަރޕާސަން އަލީ ނިޔާޒް

އަދުލު އިންސާފުގެ ނިޒާމު މިހާރު ސިޔާސީވެފައިވާ ކަމަށާއި، ކުރަމުންދާ ހުކުން ތަކުންނާއި ކުށުގެ ތުހުމަތުގައި ބަންދު ކުރާ މީހުންނާ މެދު މި ސަރުކާރުން ކަން ކުރަމުން ގެންދާ ގޮތުން މިކަން ވަރަށް ސާފު ކަމަށް ނިޔާޒު ވިދާޅުވިއެވެ.

މީގެ އިތުރުން ޕޯސްޓަރު ހަރުކުރުމާ، ބަންދުކޮށްފައި ތިބި ފަރާތްތަށް ދޫކޮށްލުމަށް ގޮވާލާ މާލޭގެ އިތުރުން އެފަރާތްތައް ނިސަބަތްވާ ރަށްރަށުގައިވެސް މިހަރަކާތްތައް ކުރިޔަށް ގެންދިޔުމަށް ނިންމާފަވާކަން ނިޔާޒް ވަނީ ފާހަގަ ކުރައްވާފައެވެ.

އެމްޑީޕީި އިން ކުރި މުޒާހަރާއިން ހައްޔަރުކުރެވުނު މީހުންގެ ތެރެއިން 6 މީހެއްގެ ބަންދު މުއްދަތު ކްރިމިނަލް ކޯޓުން ވަނީ 15 ދުވަހަށް އިތުރުކޮށްފައެވެ. މީގެ ތެރޭގައި ރައްޔިތުންގެ މަޖިލީހުގެ ކުރީގެ މެންބަރުން ކަމަށްވާ ޔައުގޫބް އަބްދުﷲ އާއި ޔާސިރު އަބްދުއްލަތީފްގެ އިތުރުން، ކ. މާފުށި ކައުންސިލްގެ ރައީސް ހަސަން ސަލާހު، އަލީ ޖުމާން، އަޒީމް އަލީ އަދި ހަސަން ޝާކިރު ހިމެނެއެވެ. މުއްދަތު ޖެހުމަށްފަހު ބަންދު ކުރި އެންމެން ވަނީ ދޫނިދޫ ޖަލަށް ބަދަލުކޮށްފައެވެ.

ބަންދު ކުރި ފަރާތްތަކުގެ ތެރެއިން މާފުށި ކައުންސިލުގެ ރައީސް ހަސަން ސަލާހުގެ އިނގިލި ބިންދާލާފައިވާއިރު، ސޯޝަލް މީޑިއާގައި އާންމުވެފައިވާ ވީޑިއޯ އެއްގައި ކުރީގެ މެމްބަރު ޔާސިރު ބިޑި އަޅުވައިގެން ގެންގުޅޭ މަންޒަރު ވަނީ ފެނިފައެވެ.