ދޫނިދޫ ޖަލުގައި ތިބި މުޒާހަރާގެ ބައިވެރިން ބަނޑުހައިހޫނުކަމުގެ ހަޅުތާލެއް ފަށައިފި

ދޫނިދޫ ޖަލުގައި ބަންދުކޮށްފައި ތިބި މުޒާހަރާގެ ބައިވެރިން، އެފަރާތްތަކާމެދު ޢަމަލުކުރަމުންދާ ގޮތާމެދު ހިތްހަމަނުޖެހިގެން ބަނޑުހައިހޫނުކަމުގެ ހަޅުތާލެއް ފަށައިފިއެވެ.

އެކްސްގައި ކުރެއްވި ޕޯސްޓެއްގައި އެމްޑީޕީގެ ލީގަލް ޑިރެކްޓަރ އަހްމަދު މައުރޫފް ވިދާޅުވީ މި ހަޅުތާލުގައި ބައިވެރިވެފައިވާ ފަރާތްތަކުން ފާހަގަކުރާ ގޮތުގައި، އެފަރާތްތައް ހައްޔަރުކޮށްފައިވަނީ ޤާނޫނާ ޚިލާފަށެވެ. އަދި ތަޙުޤީޤު މަރުހަލާ ލަސްކުރަމުންދާކަމަށާއި، ބޭނުންވާ ޞިއްޙީ ފަރުވާ ނުލިބޭކަމަށް އެފަރާތްތަކުން ބުނެފައިވާކަމުގަވެ.

މޯލްޑިވްސް ޕޮލިސް ސަރވިސްއިން މައްސަލައިގެ ތަޙުޤީޤު އާދަޔާ ޚިލާފަށް ލަސްކުރަމުންދާކަމަށް ބުނެ ބަންދުގައި ތިބި ފަރާތްތަކުގެ ޢާއިލާތަކުން ކަންބޮޑުވުން ފާޅުކޮށްފައިވެއެވެ. އަދި ބައެއް ފަރާތްތަކަށް ބޭނުންވާ މެޑިކަލް އެޓެންޝަން ނުލިބި ލަސްވަމުން ދާކަމަށްވެސް އެފަރާތްތަކުން ބުނެއެވެ.

ހަޅުތާލުގައި ބައިވެރިވި ފަރާތްތަކުން އެދެނީ އެފަރާތްތަކުގެ މައްސަލަތައް އަވަހަށް ތަޙުޤީޤުކޮށް، ޢަދުލުވެރި ގޮތެއްގައި މައްސަލަތައް ނިންމައިދިނުމަށެވެ. އަދި ބަންދުގައި ތިބޭއިރު ލިބެންޖެހޭ އަސާސީ ޙައްޤުތައް ކަށަވަރުކޮށްދިނުމަށެވެ.

މިކަމާ ގުޅިގެން ފުލުހުންގެ ފަރާތުން ބުނެފައިވަނީ ފުލުހުންގެ ބަންދުގައި ތިބި ބަޔަކު ބަނޑުހައިހޫނުކަމުގެ ހަޅުތާލެއް ކުރަމުންދާތީ ޕްރޮފެޝަނަލް ސްޓޭންޑަރޑް ކޮމާންޑުން އެކަން މޮނިޓަރ ކުރަމުންދާކަމުގައެވެ. އަދި މިކަމުގެ މައުލޫމާތު އިންޓަގްރިޓީ ކޮމިޝަން އަދި ހިއުމަން ރައިޓްސް ކޮމިޝަނާ ހިއްސާކުރެވިފައިވާ ކަމަށްވެސް ފުލުހުން ބުނެފައިވެއެވެ.

އެމްޑީޕީި އިން ކުރި މުޒާހަރާއިން ހައްޔަރުކުރެވުނު މީހުންގެ ތެރެއިން 6 މީހެއްގެ ބަންދު މުއްދަތު ކްރިމިނަލް ކޯޓުން ވަނީ 15 ދުވަހަށް އިތުރުކޮށްފައެވެ. މީގެ ތެރޭގައި ރައްޔިތުންގެ މަޖިލީހުގެ ކުރީގެ މެންބަރުން ކަމަށްވާ ޔައުގޫބް އަބްދުﷲ އާއި ޔާސިރު އަބްދުއްލަތީފްގެ އިތުރުން، ކ. މާފުށި ކައުންސިލްގެ ރައީސް ހަސަން ސަލާހު، އަލީ ޖުމާން، އަޒީމް އަލީ އަދި ހަސަން ޝާކިރު ހިމެނެއެވެ. މުއްދަތު ޖެހުމަށްފަހު އެމީހުން ވަނީ ދޫނިދޫ ޖަލަށް ބަދަލުކޮށްފައެވެ.