އެމްޑީޕީގެ ޒާޔާގެ ފޯނު ފުލުހުން މަގުމަތިން އަތުލައިފި
ފޯނު އަތުލީ ކޯޓު އަމުރެއްގެ ދަށުން
ފަތިމަތު ޒާޔާ
އެމްޑީޕީގެ ގައުމީ މަޖިލީހުގެ މެމްބަރު ފާތުމަތު ޒާޔާގެ ފޯނު މަގު މަތިން ފުލުހުން އަތުލައިފިއެވެ.
މައުލޫމާތު ލިބިފައިވާ ގޮތުގައި ކޯޓު އަމުރެއްގެ ދަށުން އަންގާރަ ދުވަހު ހަވީރު އެމްޑީޕީގެ ހުޅުމާލެ އުތުރު ދާއިރާގެ ރައީސް ޒާޔާގެ ފޯނު އަތުލީ ސޯޝަލް މީޑިއާ ގައި ފުލުހުންނަށް ނިސްބަތްވާ ގޮތައް އެއްޗެއް ލިޔެގެން ކަމަށް ބުނެއެވެ.
ޒާޔާގެ ފޭސްބުކް ޕޯސްޓެއްގައި އެންމެ ފަހުން ލިޔެފައިވަނީ "17 ނޮވެމްބަރަށް ތައްޔާރު ވުމަށް ކަނޑޫދޫ މިރުހުން ސްޕްރޭ ތައްޔާރު ކުރަން ފަށައިފިން، ހަމަ ޖެހީ، ޖެހީ،" ކަމަށެވެ.
މިދިޔަ ހުކުރު ދުވަހުގެ ރޭ އެމްޑީޕީ އިން ބޭއްވި ބޮޑު މުޒާހަރާގައި ޒާޔާގެ މޫނަށް ފުލުހުން ޕެޕަރ ސްޕްރޭ ޖެހިކަން ފާހަގަ ކުރެވެއެވެ.
ޒާޔާގެ ފޯނު ފުލުހުން އަތުލީ އަންގާރަ ދުވަހު ހަވީރު ދަރިފުޅު ގޮވައިގެން މާލޭގެ ކްލިނިކަކަށް ވަންނަން ދަނިކޮށް ކަމަށް އެނގިފައިވެއެވެ.
72 ގަޑިއިރުގެ މުއްދަތައް ދޫކޮށްފައިވާ ކޯޓު އަމުރުގައި ބުނާ ގޮތުން މި މައްސަލަ ތަހުގީގު ކުރަނީ ވައްކަމާ ޚިޔާނާތާ ބެހޭ ފުލުހުންގެ ޑިޕާޓްމަންޓުންނެވެ.
