އެމްޑީޕީ ހަރުގެ ހުންނަ ސަރަހައްދު ބަންދުކޮށް އެސްއޯ ފުލުހުން ނެރެފިއެވެ.

އެމްޑީޕީ ހަރުގެއަކީ ކޮންމެ ރެއަކުހެން ހުޅުވާފައި ޕާޓީގެ އެކި ހަރަކާތްތައް ކުރިއަށް ގެންދާ ހަރުގެއެކެވެ. ނަމަވެސް މީގެ ކުރިން ފުލުހުން އެސަރަހައްދުގައި މިހާ ބޮޑަށް ހަރަކާތްތެރިވެފައި ނުވެއެވެ. ނަމަވެސް އާދީއްތަ ދުވަހުގެރޭ ފުލުހުން ވަނީ އެމްޑީޕީ ހަރުގެ ހުންނަ ޗާންދަނީ މަގު އަމީނިއްޔާ ސްކޫލް ކައިރިން ފެށިގެން އިސްކަންދަރު ސްކޫލު ކަންމައްޗާ ހަމައަށް ބެރިކޭޑް ޖަހާ ބަންދުކޮށްފައެވެ.

ބެރިކޭޑް ޖަހާ ބަންދު ކުރުމުގެ އިތުރުން ގިނަ އަދަދެއްގެ ފުލުހުން ވެސް އެސަރަހައްދުގައި ބެރިކޭޑް ޖަހައިގެން ދިޔައީ ބަލަހައްޓަމުންނެވެ. އަދި ދާރުލް އާސާރު ކުރިމަތީގައި އެސްއޯ ފުލުހުންނާއި އެމީހުން އުފުލާ ވެހިކަލްވެސް އޮތެވެ.

މިހާތަނަށް އައި އިރު ފުލުހުން އެސަރަހައްދުގައި ބެރިކޭޑް ޖަހައިގެން ހަރަކާތްތެރިވަނީ ކީއްވެގެން ކަމެއް އެނގިފައި ނުވެއެވެ. އަދި ފުލުހުންނާއި ސުވާލު ކުރުމުން ވެސް އެކަމަށް ޖަވާބެއް ދީފައި ނުވެއެވެ.

ގިނަ އަދަދެއްގެ ފުލުހުން އެމްޑީޕީ ހަރުގެ ސަރަހައްދުގައި ބެރިކޭޑް ޖަހައިގެން ހަރަކާތްތެރިވެފައިވާ އިރު، މަޖީދީ މަގުގެ ޓްރެފިކް ބަލަހައްޓާ ފުލުހުން ވެސް އެސަރައްހަދަށް މިރޭ ފޮނުވާލާ މަޖީދީ މަގުގެ ޓްރެފިކް ވެސް ބަލަހައްޓާފައި ނުވެއެވެ.

އެމްޑީޕީއިން ހުކުރު ދުވަހުގެ ރޭ ބޭއްވި "ލޫޓުވައިފި ލޫޓުވައިފި" މުޒާހަރާއަށްފަހު ފުލުހުން އަންނަނީ އެމްޑީޕީ ހަރުގެ ހުންނަ ސަރަހައްދުގައި ފުލުހުން ހަރަކާތްތެރިވާ މިންވަރު އިތުރުކޮށްފައެވެ. އެމްޑީޕީއިން ބޭއްވި މުޒާހަރާ ނިންމާލީ ސަރުކާރަށް 5 ޑިމާންޑެއް ކުރުމަށްފަހު އެވެ. އަދި އަންނަ ނޮވެމްބަރު މަހުގެ 17 ގައި ސަރުކާރާ ދެކޮޅަށް ބޮޑު މުޒާހަރާއެއް ބޭއްވުމަށް އެމްޑީޕީގެ ގައުމީ މަޖިލީހުން ވަނީ ފާސްކޮށްފައެވެ.